Read cisena Kutoma 42 Bible Online

Kutoma 42 - cisena bible

Kutoma 42

¹Pidadziwa Yakobo kuti ku Iguputo kukhali phoso, adalonga kuna anache achimuna mbati, “Thangwi yache ninji munalila yang'anizana kwene?

²Ine ndava kuti kuna phoso m'dziko ya Iguputo; ndokoni kweneko mukatigulirembo pang'ono, towera tileke kunenseka na njala gopa tinafa.”

³Tenepo abale ache Yosefe khumi ale adenda ku Iguputo kagula phoso,

⁴kwache Yakobo hadamtume Benjemani, mphwache Yosefe wa mimba ibodzi, pabodzi na abale ache anango ale tayu, thangwi akhagopa kuti mwinango chinthu chakuipa chinamgwera.

⁵Ana a Yakobo pabodzi na anthu anango adadza kagula phoso thangwi m'dziko ya Kanani mukhali njala.

⁶Yosefe ninga mkulu wa boma wa dziko yonsene ya Iguputo akhagulisa phoso kuna anthu onsene a padziko yapansi. Natenepo abale ache Yosefe adadza mbalamba pamaso pache.

⁷Pidachita Yosefe oneni abale ache ale, adaadzindikira, mbwenye iye adachita ninga nee akhaadziwabi. Iye adavunza mwakuatuzulira maso mbati, “Mukubulukira kupi?” Iwo adatawira mbati, “Ife tabulukira kudziko ya Kanani dzagula phoso.”

⁸Podi kwene kuti Yosefe adaadzindikira abale ache, mbwenye iwo hadamdzindikire tayu.

⁹Iye adakumbuka ndoto zache zikhadalota iye pya iwo, tenepo adalonga kuna iwo mbati, “Imwe ndimwe anyakuzonda; mwadza dzazonda khundu zakusowa mphamvu za dziko yathu ino.”

¹⁰Iwo adatawira mbati, “Nkhabe tayu, mbuyanga! Ife tadza kuno ninga mabitchu anu dzagula phoso.

¹¹Tonsenefe ngubaleathu. Ife si ife anyakuzonda tayu. Anyabasanufe ndife amuna akulonga pyakuona.”

¹²Yosefe adalonga kuna iwo mbati, “Nkhabe! Imwe mwadza dzaona khundu zakusowa mphamvu za dziko yathu ino.”

¹³Iwo adatawira mbati, “Anyabasanufe tonsene ubaleathu tikhalipo khumi na awiri, ana a baba mbodzi m'dziko ya Kanani. Mbaleathu mbodzi adafa, mbwenye chimalisira bele chasala na babathu.”

¹⁴Yosefe adatawira mbati, “Mwenemo ndi montho ninga mudalongera ine kuti imwe ndimwe anyakuzonda.

¹⁵Umu ndi mule munafuna imwe kuyeswa: ine ndinadumbira na dzina ya mfumu kuti imwe munaenda tayu mpakana mphwanuyo abwere kuno.

¹⁶Mbodzi wa imwe aende kamkwata. Monsenemwe munabanga koyiwa m'perezo mpakana tione ngakhala mafala alonga imwe ngakuonadi. Mbwenye bibibi, na dzina ya mfumu ndimomwene kuti ndimwe anyakuzonda.”

¹⁷Natenepo iye adaaikha m'perezo mbakhala mwenemo nsiku zitatu.

¹⁸Pansiku yachitatu Yosefe adalonga kuna iwo mbati, “Ine ndine munthu wakugopa Mulungu, natenepo chitani chinafuna kukupangani inechi kuti muleke kuphiwa.

¹⁹Ngakhala ndimwedi anthu akulonga pyakuona, munthu mbodzi wa imwe asale m'perezo, monsene anangomwe muende mbamukapereke phoso kuna mabanjanu akunenseka na njalawo.

²⁰Kwache mudze naye kuno mphwanu wakumalisiraletuyo, towera ndikhulupire kuti mafalanu alonga imwewa ngakuonadi, pontho kuti imwe muleke kuphiwa.” Iwo adatawira kuchita tenepo

²¹mbalonga kuna unango na mwanzache mbati, “Ande, lero tikuona nyatwa kupagali pinthu pidamchitira ife mbaleathu pile. Ife tidaiona nyatwache ikulu pikhadatidungunyirira iye kuti tileke kuvunga moyo wache, mbwenye ife hatidapiikhe konta tayu. Ndi thangwi yache lero tikuona nyatwa yeneyi.”

²²Rubeni adalonga mbati, “Ine ndidakupanganitu kuti muleke kumchitira chinthu chakuipa mphaleyu, mbwenye imwe nee mudandiverebi. Apo lero yang'anani, ife tikupagalwisi thangwi ya kufa kudachita iyeko.”

²³Yosefe akhapiva pyonsene pikhalonga iwopyo, kwache iwo hadapidziwe tayu, thangwi iwo akhalonga naye mwakuchita kuthumbusulirwa na munthu unango.

²⁴Yosefe adabuluka pakhali iwo pale mbatoma kulira. Pidakhuludzika iye, adabwerera mbalonga nawo pontho. Tenepo adakwata Simioni mbammanga pamaso pa iwo onsene.

²⁵Yosefe adatonga kuti masakha a abale ache adzazwe phoso, pontho kuti kobiri za munthu onsene aziikhe m'masakha, pontho nakuti aapase phoso yakudyera m'njira. Penepi pidachitwadi.

²⁶Abale ache Yosefe ale adakwizika pamabulu awo phoso ikhadagula iwo ile mbalamuka kwenda kwawo.

²⁷Pambuto ikhadagona iwo mosiku unango, mbodzi wa iwo adasudzula sakhache kuti adyese bulu wache, tenepo iye adagumana kobiri zache padzulu m'sakha mwachemo.

²⁸Iye adalonga kuna abale ache mbati, “Ine ndabwezerwa kobiri zanga; ngayang'anani izi zili m'sakha mwangazi!” Mitimawo idaswipa, natenepo na mantha na mantha adavunzana okhokha mbati, “Mulungu chatichitira iyechi ninji?”

²⁹Pidafika iwo kuna babawo Yakobo m'dziko ya Kanani, adalonga pyonsene pikhadachitika kuna iwo.

³⁰Iwo adalonga mbati, “Mkulu wa boma wa dziko ya Iguputo akhalonga nafe mwakutituzulira maso mbatipambizira kuti tikhali anyakuzonda dziko yache.

³¹Mbwenye tidatawira kuti, ‘Ife si ife anyakuzonda tayu; ndife anthu akulonga pyakuona.

³²Ife tonsene ubaleathu tikhalipo khumi na awiri, pontho babathu ndi mbodzi ene. Mbaleathu mbodzi adafa, mbwenye chimalisira bele chasala na babathu m'dziko ya Kanani.’

³³Tenepo mamuna ule adatitawira kuti, ‘Kuti ndionedi kuti pinalonga imwepi mphyakuona ndinachita tenepa: mbodzi wa imwe asale na ine kuno; monsenemwe mukwate phoso muende nayo kapasa mabanjanu akunenseka na njalawo.

³⁴Mbwenye mudze naye chimalisira bele chanucho kuna ine, towera ndidziwedi kuti si imwe anyakuzonda tayu, mbwenye ndimwedi anthu akulonga pyakuona. Tenepo ndinakubwezerani mbaleanu, pontho munakwanisa kuchita malonda m'dziko muno.’ ”

³⁵Pikhakhuthula iwo masakhawo, munthu onsene m'sakha mwache adagumanamo kabudu ka kobiri. Pidaona iwo kobirizo, iwo pabodzi pene na babawo adachita mantha.

³⁶Babawoyo adalonga kuna iwo mbati, “Kadi imwe munafuna kuti nditaye ananga onsene? Yosefe nkhabepo, Simioni nkhabepo; apo lero munafuna mundikwatire pontho Benjemani? Nyatwa zonsene zikugwera ine pano.”

³⁷Tenepo Rubeni adalonga kuna babache mbati, “Ngakhala Benjemani sinabwerera naye kuna imwe tayu, imwe munakwanisa kupha pyanu ananga awiri achimunawa. Ndipaseni ndimuyang'anire ndine, tenepo ndinabwerera naye kuna imwe.”

³⁸Mbwenye Yakobo adalonga mbati, “Mwananga munaenda naye tayu; mbaleache afa, tenepo asala ngwekha ene basi. Chinthu chakuipa chinakwanisa kumchitikira m'njiramu. Ine ndakalamba, tenepo kutsukwala kunafuna imwe kundichitisa kunandiendesa kudziko ya anyakufa.”