Read cisena Kutoma 43 Bible Online

Kutoma 43 - cisena bible

Kutoma 43

¹Njala idandendeya m'dziko ya Kanani.

²Natenepo pidamala iwo kudya phoso ikhadabwera na iwo kubulukira ku Iguputo ile, babawo Yakobo adaapanga anache ale mbati, “Ndokoni pontho mukatigulire phoso pang'ono.”

³Mbwenye Yuda adalonga kuna iye mbati, “Mamuna ule adaticheuza pikulu pene kuti tingakhonda kwene kwenda naye mbaleathuyu, nkhope yache nee tinaionabi.

⁴Ngakhala munamtuma mbaleathuyi pabodzi na ife, tinati tiende kakugulirani phoso.

⁵Mbwenye ngakhala munakhonda kumtuma pabodzi na ife, ifembo nee tinaendakobi, thangwi mamunayo adalonga kuti ngakhala mbaleathu tinakhonda kwenda naye, nkhope yache nee tinaionabi.”

⁶Israele adavunza mbati, “Thangwi yache ninji mudandidzesera nyatwa pakupanga munthuyo kuti mukhali na mbaleanu unango?”

⁷Iwo adatawira mbati, “Munthuyo adativunza pya ife na banjathu kuti, ‘Ayi babanu ana moyo na lero? Ayi muna mbaleanu unango?’ Ife tikhamtawira kwene pikhativunza iyepyo. Apo mbatidadziwa tani kuti analonga kuti, ‘Mudze naye pabodzi mbaleanu kuno?’ ”

⁸Yuda adalonga kuna Israele babache mbati, “Mgwinyeni mphaleyi pabodzi na ine, tenepo ife tinati tiende kabodzi kene, towera ife, imwe na anathu, tikhale na moyo mbatileke kufa.

⁹Ine ndinapereka moyo wanga m'mbuto mwache, pontho pyonsene pinafuna kamchitikira dzavunzeni ine pano. Ngakhala sinabwerera naye mwadidi kuna imwe mbandimpereka m'manja mwanu, penepo muthonye chala ine pano moyo wanga onsene.

¹⁰Ife mbatidakhonda dembuka, pano mbatidenda kale, pontho ninga taendako kawiri.”

¹¹Tenepo babawo Israele adaapanga mbati, “Ngakhala pili tenepo, chitani ipi: kwatani pinthu pyadidi pya dziko ino mupiikhe m'masakha mwanu mbamuende napyo ninga mitukwa kuna mkulu wa boma wa dzikoyo. Kwatani resini pang'ono, uchi pang'ono, pyakukomesera muliwo, manduyi ninga a apistakio na alimondi.

¹²Kwatani kobiri zinango zapapezi ninga zontho zidakwata imwe pakutoma thangwi mwathema kabwezera kobiri zidabwezerwa imwe padzulu m'masakha mwanu. Mwinango kukhali kudodomeka.

¹³Kwatani mbaleanu mbamubwerere kabodzi kene.

¹⁴Tenepo Mulungu Wamphamvu zonsene mbachitise munthuyo kuva namwe nsisi, towera akutawiriseni kubwerera naye Benjemani na mbaleanu unangoyo. Kulonga pya ine, ngakhala kweneku nkhutaya ana, mbatayike pyawo.”

¹⁵Natenepo amuna ale adakwata mitukwa ile, kobiri zile na zinango zapapezi, pontho na Benjemani mbaenda ku Iguputo mbakaonekera pamaso pa Yosefe.

¹⁶Pidaona Yosefe kuti Benjemani akhali nawo pabodzi adapanga nyakumfiliviri wamkulu wa kumusa kwache mbati, “Kwata anthuwa uende nawo kumusa kwanga. Kaphe nyama, pontho kasasanye kudya. Iwo anadya na ine masikati ano.”

¹⁷Iye adachitadi ninga mudampangira Yosefe mbakwatira anthu ale kumusa kwa Yosefe.

¹⁸Amuna ale akhali na mantha pikhaendeswa iwo kumusa kwa Yosefe. Iwo akhanyerezera kuti akhaendeswa kweneko thangwi ya kobiri zidabwezerwa iwo m'masakha mwawo pandzidzi wakutoma ule. Iwo adanyerezera pontho kuti mwinango akhafuna kaaphata mbaachitisa kukhala mabitchu ache, pontho kaapokosera mabulu awo.

¹⁹Natenepo iwo adenda kumsuwo kwa Yosefe kuna nyakumfiliviri ule mbampanga mbati,

²⁰“Mbuyathu, taphata miyendo, ife tidadza kale pakutoma kuno dzagula phoso.

²¹Mbwenye pambuto idaimira ife mbatigona, tidasudzula masakhathu tonsenefe mbatigumana kobiri zonthozo zidagula na ife phoso zili padzulu m'masakha mwathu. Natenepo ife tabwerere nazo kuna imwe.

²²Tabwera pontho na kobiri zinango zapapezi zakugulira phoso. Ife nkhabe dziwa ule adaikha kobirizo m'masakha mwathu.”

²³Nyabasa ule adatawira mbati, “Lekani swipa mtima! Pontho lekani chita mantha. Mulungu wanu, pontho Mulungu wa babanu ndiye akupasani mfuma yeneyo m'masakha mwanu; ine ndidatambira kobiri zidapagalira imwe phosoyo.” Natenepo iye adaabulusira Simioni.

²⁴Iye adapitisa anthu ale m'nyumba mwa Yosefe mule. Iye adapereka madzi kuna iwo kuti atsuke manyalo awo, pontho iye adadyesa mabulu awo.

²⁵Iwo adasasanya mitukwawo kuti aipereke kuna Yosefe angabwera na kumasikati, thangwi iwo akhadava kuti iwo anadya pabodzi na Yosefe.

²⁶Pidadza Yosefe kumusako, iwo adapereka kuna iye mitukwa ikhadadza na iwo ile mbalamba pamaso pache.

²⁷Iye adaavunza ngakhala manungo awo akhali akuwanga ene, pontho adalonga mbati, “Imwe mudandipanga pya babanu wakukalamba ule. Iye ali tani? Ayi ana moyo na lero?”

²⁸Iwo adatawira mbati, “Nyabasanu babathu ana moyo basi, pontho ngwakuwanga ene.” Natenepo iwo adalamba kumulemedza.

²⁹Pidaona Yosefe Benjemani mbaleache wa mimba ibodzi, adavunza mbati, “Ayi weneyu ndiye chimalisira bele chanu adandipanga imwe pya iye ule?” Iye adalonga pontho mbati, “Mulungu mbakutsanzayise, mwananga.”

³⁰Yosefe adabuluka kabodzi kene, thangwi mtimache udadzala na chitchuwo na mbaleache. Tenepo iye adenda kusubi kwache mbakalira.

³¹Pikhadamala iye samba nkhope, adabuluka. Tenepo adauphata mtima mbalonga mbati, “Tipaseni pyakudya tidye.”

³²Natenepo iwo adamuikhira pyakudya pile payekha ene, abale ache ale adaaikhira pa okha enembo, pontho Aiguputo akhali na iye ale adaaikhira pa okha enembo, thangwi Aiguputo hambafuna kudya na Aheberi tayu, thangwi Aiguputo pimbaanyanyasa kudya pabodzi na Aheberi.

³³Pikhadakhazikwa abale ache pansi pamaso pa Yosefe, iwo adakhala nyandandanda malingana na pyaka pyawo pyakubalwa, kutomera wautombo mpakana chimalisira bele, natenepo akhayang'anizana unango na mwanzache mwakudodoma.

³⁴Pikhagawiwa pyakudya kubulukira pakhadakhala Yosefe pale kuperekwa kuna iwo, Benjemani adapaswa pyakuinjipa kashanu kupiringana anthu onsene mwenemo. Natenepo iwo adadya na kumwa pabodzi na Yosefe mbakomerwa.