Read cisena Kutoma 44 Bible Online

Kutoma 44 - cisena bible

Kutoma 44

¹Yosefe adapanga nyakumfiliviri m'nyumba mwache ule mbati, “Dzaza masakha a anthuwa na phoso ninga munakwanisa iwo kuthukula. Pontho uikhe kobiri za munthu onsene padzulu m'sakha mwache.

²Uikhe khomitcho yanga yasiliva padzulu m'sakha ya chimalisira bele pabodzi na kobiri zache zene zikhafuna iye gulira phoso.” Iye adachitadi ninga mudampangira Yosefe.

³Bzobzo mangwana mwache amuna ale adagwinywa kwawo pabodzi na mabulu awo.

⁴Pikhadafamba iwo kansinzo pang'ono kubulukira mumzinda, Yosefe adalonga kuna nyakumfiliviri ule mbati, “Chimbiza, athamangire amuna ale, ungaaphata uavunze kuti, ‘Thangwi yache ninji mwabwezera chakuipa pa chadidi?

⁵Thangwi yache ninji mwaba khomitcho yasiliva ya mbuyanga?[93] Yeneyo ndiye khomitcho imbamwera iye, ile imbaphatisa iye basa pakuombedza. Imwe mwadawa pikulu!’ ”

⁶Pidaaphata nyakufiliviri ule, adalonga mafala onthowo adalonga mbuyachewo.

⁷Iwo adamtawira mbati, “Thangwi yache ninji, mbuyanga, munalonga tenepa? Ife tinadumbira kuti nee tachita chinthu ninga chenecho tayu.

⁸Imwe mukupidziwa kuti kobiri zidagumana ife m'masakha mwathu pakutoma, tidabwerera nazo kuna imwe kubulukira kudziko ya Kanani. Mphapo, thangwi yache njanji kuti tibe siliva penu golidi wa m'nyumba mwa mbuyanu.

⁹Ngakhala unango pakati pa anyabasanufe munamgumana nayo, weneyo aphiwe, pontho tonsene akusala tisanduke mabitchu anu.”

¹⁰Iye adatawira mbati, “Ande, ndatawira; mbwenye munthu anafuna ine kumgumana na khomitchoyo, weneyo ndiye anakhala bitchu wanga; anango akusaliramwe munakwanisa kwenda pyanu.”

¹¹Natenepo iwo adachimbiza kutchithisa masakhawo pansi, munthu onsene mbasudzula sakhache.

¹²Nyakufiliviri Yosefe ule adafufunula mwadidi, kutoma na mkululetu kumalisira na mwanaletu. Tenepo khomitchoyo idamgumanwa m'sakha mwa Benjemani.

¹³Amuna ale adang'amba nguwo zawo mwakutsukwala. Tenepo onsene adakwizika mitolo yawo pamabulu awo mbabwerera kumzinda kule.

¹⁴Yosefe akhali m'nyumbamo basi pikhapita Yuda na abale ache ale, tenepo iwo adapigwisa okha ene pansi pa manyalo a Yosefe.

¹⁵Yosefe adalonga kuna iwo mbati, “Chachita imwechi ninji? Imwe nkhabe dziwa tayu kuti munthu ninga ine ndinakwanisa kugumana chinthu pakuchita kuombedza.”

¹⁶Yuda adatawira mbati, “Tinalonga tani kuna imwe, Mbuyathu? Tinalonganji? Tinalonga tani kuti tioneke okhonda dawa? Mulungu abulusa pakwecha pyakudawa pya anyabasanu. Lero ndife mabitchu a mbuyanga, tonsenefe pabodzi pene na ule agumanwa na khomitcho.”

¹⁷Yosefe adatawira mbati, “Tayu, podi na kutani kwene, ine nkhabe chita chinthu ninga chenecho tayu. Weneyo ene akhadakwata khomitchoyo ndiye anakhala bitchu wanga. Monsene akusaliramwe munakwanisa kubwerera pyanu kuna babanu mumtendere.”

¹⁸Yuda adenda pana Yosefe mbalonga mbati, “Mbuyanga, ndaphata miyendo, nditawiriseni nyabasanu kulonga namwe. Lekani kundizhangalira. Imwe mwakhala ninga mfumu eneyo.

¹⁹Mbuyanga, imwe mudativunza kuti, ‘Kadi imwe muna babanu, penu mbaleanu unango?’

²⁰Ife tidatawira kuti, ‘Ande, tina babathu; iye ngwakukalamba, pontho tina mbaleathu unango ule adabalwa mwenemo babathuyi mbali nkhalamba kale. Mbaleache mphaleyo adafa, tenepo asala na moyo m'mimba mwawo ngweneyo ene basi; ambafunwa pyakwanga na babache!’

²¹Imwe mudatipanga anyabasanufe kuti tidze naye kuno, towera mumuone,

²²tenepo ife tidalonga kuti mphaleyo hanakwanisa tayu kusiyana na babache; angachita tenepo, babacheyo anafa.

²³Tenepo imwe mudalonga kuti, ‘Imwe nee munatawiriswa kudza pamaso panga tayu mungakhonda kudza naye kuno mbaleanuyo.’

²⁴“Pidabwerera ife kuna babathu, tidampanga pikhadalonga imwe pile.

²⁵Tenepo babathu adatipanga kuti tidze pontho kuno kuti tigule phoso pang'ono.

²⁶Ife tidatawira kuti, ‘Ife nkhabe kwanisa kwendako tayu; thangwi tinakatawiriswa tayu kuonana na munthu ule tingakhonda khala na mbaleathu wakumalisirayi. Ife tinakwanisa kwenda ngakhala mbaleathu wakumalisirayi anaende nafe pabodzi.’

²⁷Babathu adalonga mbati, ‘Imwe mukupidziwa kuti mkazanga Rakele adandibalira kwene ana awiri achimuna.

²⁸Mbodzi wa iwo andisiya kale. Mwinango adadyiwa na pirombo pyam'tsanga, thangwi nee ndamuonabi chibulukiro chache.

²⁹Ngakhala chinchino munandikwatira pontho ushu, chinthu chinango chakuipa mbichimchitikira, kutsukwala kunafuna imwe kundichitisa kunandiendesa kudziko ya anyakufa na unkhalambangawu.’ ”

³⁰Yuda adathimiza kulonga mbati, “Natenepo ngakhala ndinabwerera kuna baba wakusowa mphaleyu, sindzidzi iye nkhundiona kuti mphaleyu hali na ine tayu, iye anati akafe. Moyo wache wakukutizwa pabodzi na moyo wa mphaleyu, pontho iye akalamba pyakwanga mwakuti iye anaenda kudziko ya anyakufa na kutsukwala kunafuna ife kumchitisako.

³²Chinango ntchakuti, ine ndapereka moyo wanga kuna baba m'mbuto mwa mphaleyu. Ine ndidampanga kuti ngakhala mphaleyu sinadza naye pontho kuna imwe tayu, ndine ndathema kuthonywa chala moyo wanga onsene.

³³Tenepo nyabasanune ndinasala kuno ndine kukhala bitchu wanu m'mbuto mwa mphaleyu; mtawirise abwerere pyache mudzi na abale achewa.

³⁴Ndinakwanisa tani kubwerera kuna baba ngakhala mphale hali na ine tayu? Ine nkhabe kwanisa kupirira kuona nyatwa inafuna kamgwera baba.”