Read cisena Kutoma 45 Bible Online

Kutoma 45 - cisena bible

Kutoma 45

¹Yosefe hadakwaniseve kuuphata mtima pamaso pa anyabasache, natenepo adaatonga onsenewo kuti abuluke m'subimo. Nkhabe munthu na mbodzi ene akhali penepo pikhapitchulula Yosefe kuna abale ache.

²Iye adalira pikulu mwakugaluza fala mwakuti Aiguputo adava, natenepo anthu a kunyumba ya mfumu adapangwa.

³Yosefe adalonga kuna abale ache ale mbati, “Ndine Yosefe. Ayi baba ana moyo na lero?” Mbwenye pidava abale ache ale penepi, adagoswerwa pyakwanga mwakuti adachimwana kumtawira.

⁴Natenepo Yosefe adalonga kuna iwo mbati, “Fedzani chifupi na ine.” Iwo adafedzadi, tenepo Yosefe adalonga mbati, “Ine ndine mbaleanu Yosefe adagulisa imwe mu Iguputo ule.

⁵Natenepo lekani swipa mtima, penu kupisumulula mwekha ene kuti mudandigulisa kuno. Weneyo akhali Mulungu, ule adandituma patsogolo panu kupulumusa moyo wa anthu.

⁶Chaka chino ntchachiwiri kwene cha njala m'dziko muno. Panakhala pontho pyaka pinango pishanu pya njala, pile pyakuti anthu nee analima, penu kuvuna tayu.

⁷Mulungu adandituma patsogolo panu kuti akupulumuseni na njira yakudodomesayi, pontho kuti imwe na pidzukulu pyanu mupulumuke.

⁸Natenepo hakhali imwe tayu adandituma kuno ule, mbwenye akhali Mulungu. Iye adandiikha kukhala mkulu wa boma kupiringana akadamu onsene a mfumu. Ine ndine nyakuyang'anira pinthu pyonsene m'dziko mwache, pontho ndine mtongi wa dziko yonsene ya Iguputo.

⁹“Chimbizani, bwererani kuna babanga mukampange kuti pyalonga mwanako Yosefe mphipi: ‘Mulungu andichitisa kukhala mtongi wa dziko yonsene ya Iguputo. Lekani chita nthontho kudza kuna ine.

¹⁰Munakwanisa kukhala chifupi na ine m'nthemba ya Gosheni; imwe, ananu, pidzukulu pyanu, mabiranu, mbuzi zanu, ng'ombe zanu na pyonsene pina imwe.

¹¹Ngakhala munakhala mu Gosheni ndinakwanisa kukuyang'anirani mwadidi. Kutsogoloku kwasala pyaka pishanu pya njala; tenepo ine sinafuna kuti imwe, mabanjanu na pifuyo pyanu mutcherengeletu tayu.’ ”

¹²Yosefe adathimiza kulonga mbati, “Tenepo imwe monsene, pontho na iwe ene, Benjemani, munakwanisa kuona kuti ndinedi Yosefe.

¹³Kampangeni babanga pya chilemedzo chikulu china ine muno mu Iguputo, pontho kampangeni pya pyonsene pyaona imwe. Natenepo chimbizani mukabwere naye kuno.”

¹⁴Iye adamkhumbatira mbaleache, Benjemani, mbatoma kulira. Benjemani adalirambo pikhakhumbatirana iwo.

¹⁵Tenepo iye adaampsompsona abale ache onsene uku akulira. Pakumalisira pache abale ache adatoma kulonga naye.

¹⁶Pidafika mbiri kuna mfumu yakuti abale ache Yosefe afika, mfumu pabodzi pene na mathubu ache onsene adakomerwa pyakwanga.

¹⁷Iye adalonga kuna Yosefe mbati, “Apange abale ako kuti akwizike mitolo yawo pamabulu awo kuti abwerere kudziko ya Kanani.

¹⁸Atawirise kakwata babawo, na mabanjawo ene kuti abwere nawo kuno. Ine ndinaapasa mbuto yadidiletu mu Iguputo muno, pontho iwo anadya pyadidi pya m'dzikoyi.

¹⁹Apange pontho kuti akwate pingolo pya muno mu Iguputo, towera akakwatiremo anawo, mabanjawo, pontho na babawo kubwera nawo kuno.

²⁰Iwo aleke swipa mtima kusiya pinthu pyawo m'nduli; mbuto yadidiletu ya muno mu Iguputo inakhala yawo.”

²¹Ana Israele ale adachitadi ninga mudapangirwa iwo mule. Yosefe adaapasa pingolo na phoso ya m'njira ninga mudalongera mfumu.

²²Iye adapereka pontho kuna abale ache ale nguwo zinango zapapezi, mbwenye Benjemani adampasa kobiri zasiliva madzana matatu na nguwo zinango zishanu zapapezi.

²³Iye adatumiza kuna babache mabulu khumi akuthukula mitolo ya pinthu pyadidiletu pya m'dziko ya Iguputo na mabulu khumi akuthukula mitolo ya mapira, mikate, na phoso inango ya m'njira.

²⁴Iye adaagwinya abale ache ale, tenepo pikhalamuka iwo kwenda, Yosefe adaapanga mbati, “Lekani kulongolozana m'njiramu.”

²⁵Iwo adabuluka mu Iguputo mbabwerera kuna babawo Yakobo m'dziko ya Kanani.

²⁶Iwo adampanga babawo mbati, “Yosefe, na lero ana moyo. Iye ndi mtongi wa dziko ya Iguputo!” Yakobo adatutumuka pyakwanga, tenepo iye hadaakhulupire tayu.

²⁷Mbwenye pidampanga iwo pyonsene pikhadalonga Yosefe kuna iwo, pontho na pidaona iye pingolo pikhadatumiza Yosefe kuti amkwate kwenda naye ku Iguputo, iye adasisimuka.

²⁸Iye adalonga mbati, “Ndatsikimiza, mwananga Yosefe na lero ana moyo! Ine ndathema kwenda kuti ndikamuone mbandidzati kufa.”