Read cisena Kutoma 46 Bible Online

Kutoma 46 - cisena bible

Kutoma 46

¹Israele adakwata pyonsene pikhali na iye mbaenda ku Beeresheba, kule kudapereka iye nsembe kuna Mulungu wa babache, Isake.

²Mulungu adalonga naye mosiku kumasomphenya mbachemera mbati, “Yakobo, Yakobo!” Iye adatawira mbati, “Ndili pano.”

³Mulungu adalonga mbati, “Ine ndine Mulungu, Mulungu wa babako. Leka gopa kwenda ku Iguputo. Kweneko ndinachitisa pidzukulu pyako kukhala dzinza ikulu.

⁴Ine ndinati ndiende nawe kudziko ya Iguputo, pontho pidzukulu pyako ndinati ndipibwezere pontho kudziko ino. Pandzidzi wa kufa kwako Yosefe anakhala m'khundu mwako.”

⁵Yakobo adabuluka ku Beeresheba. Anache ale adakwizika iye, anawo ang'ono-ang'ono na akazawo m'pingolo pikhadamtumizira mfumu wa ku Iguputo pile.

⁶Iwo adakwata pifuyo pyawo na pinthu pyawo pikhadagumana iwo m'dziko ya Kanani mbaenda ku Iguputo. Yakobo adakwata pidzukulu pyache pyonsene kwenda napyo pabodzi:

⁷anache achimuna na pidzukulu pyache pyachimuna; anache achikazi na pidzukulu pyache pyachikazi.

⁸Madzina a Aisraelei, Yakobo na pidzukulu pyache, adenda ku Iguputo ale mbawa: Rubeni, mwana wautombo wa Yakobo pabodzi pene na anache achimuna a Rubeni

⁹Hanoki, Palu, Hezironi na Karimi.

¹⁰Simioni na anache achimuna: Yemuele, Yamini, Ohadi, Yakini, Zohari na Shauli, mwana adabala iye na mkazi wa Chikanani.

¹¹Levi na anache achimuna: Gereshoni, Kohati na Merari.

¹²Yuda na anache achimuna: Eri, Onani, Shela, Perezi na Zera (mbwenye Eri na Onani akhadefera m'dziko ya Kanani). Perezimbo, na anache achimuna: Hezironi na Hamuli.

¹³Isakara na anache achimuna: Tola, Pua, Yashubu na Shimironi.

¹⁴Zebuloni na anache achimuna: Seredi, Eloni na Yaheleele.

¹⁵Enewa ndiye akhali ana a Yakobo adabala iye na Lea m'dziko ya Mesopotamia, kupambula mwanache wamkazi Dina. Anache onsene achimuna na achikazi adabala iye na Lea pabodzi pene na pidzukulu pyache akhalipo makumatatu na atatu.

¹⁶Gadi na anache achimuna: Zefoni, Hagi, Shuni, Eziboni, Eri, Arodi na Areli.

¹⁷Asheri na anache achimuna: Imina, Ishiva, Ishivi na Beria. Nyamaingawo akhali Sera. Beriambo na anache achimuna: Heberi na Malikiele.

¹⁸Ana enewa akhali ana a Yakobo adabala iye na Zilipa, bitchu wachikazi ule akhadaperekwa na Labani kuna mwanache wamkazi Lea. Onsene pabodzi pene na pidzukulu pyache akhalipo khumi na atanthatu.

¹⁹Ana a Yakobo adabala iye na Rakele mbawa: Yosefe na Benjemani.

²⁰Mu Iguputo Yosefe akhali na ana awiri achimuna, Manase na Eferemu, adabala iye na Asenati, mwana wa Potifera, nyansembe wa mu Heliopolisi.

²¹Ana achimuna a Benjemani mbawa: Bela, Bekeri, Ashibele, Gera, Naamani, Ehi, Roshi, Mupimu, Hupimu na Aridi.

²²Enewa ndiye akhali ana achimuna a Yakobo adabala iye na Rakele. Onsene pabodzi pene na pidzukulu pyache akhalipo khumi na anayi.

²³Dani na mwanache wamamuna Hushimu.

²⁴Nafitali na anache achimuna Yazeele, Guni, Yezeri na Shilemu.

²⁵Enewa ndiye akhali ana a Yakobo adabala iye na Biliha, bitchu wachikazi ule akhadaperekwa na Labani kuna Rakele. Onsene pabodzi pene na pidzukulu pyache akhalipo anomwe.

²⁶Pidzukulu chadi-chadi pyonsene pya Yakobo pabodzi pene na anache akhadenda na iye pabodzi ku Iguputo ale, akhalipo makumatanthatu na atanthatu kupambula akwenyache.

²⁷Ana achimuna awiri a Yosefe adabalwa mu Iguputo, tenepo kuvungaza onsene pabodzi a m'banja ya Yakobo adenda ku Iguputo ale, akhalipo makumanomwe.

²⁸Yakobo adatuma Yuda patsogolo pawo kampempha Yosefe kuti agumanikane nawo m'nthemba ya Gosheni. Pidafika iwo m'Gosheni,

²⁹Yosefe adapakira m'chingolo mwache mbaenda ku Gosheni kagumanikana na babache. Pidagumanikana iwo, Yosefe adakhumbatira babache m'khosi mbalira ndzidzi ukulu ene.

³⁰Yakobo adalonga kuna Yosefe mbati, “Chinchino pano ndasasanyika kufa pyanga, thangwi ndakuona, pontho ndadziwa kuti na lero una moyo.”

³¹Tenepo Yosefe adalonga kuna abale ache na onsene a m'banja ya Yakobo mbati, “Ndathema kwenda kuna mfumu kampanga kuti abale anga na onsene a m'nyumba ya baba, ale akhakhala m'dziko ya Kanani, afika kuna ine.

³²Ndinakampanga kuti imwe ndimwe amakabuswa, anyakuyang'anira pifuyo, pontho kuti mwadza na mikumbi ya pifuyo pyanu na pinthu pyanu pyonsene.

³³Mfumuyo angakuchemeresani mbakuvunzani kuti basa imbadziwa imwe njanji,

³⁴onesesani mumpange kuti ndimwe amakabuswa kutomera uwananu, ninga mudachitira makolo anu. Na thangwi yeneyi iye anakutawirisani kukhala m'nthemba ya Gosheni.” Yosefe adalonga penepi thangwi adadziwa kuti Aiguputo ambanyansirwa nawo amakabuswa onsene.