Read cisena Kutoma 47 Bible Online

Kutoma 47 - cisena bible

Kutoma 47

¹Natenepo Yosefe adakwata ashanu mwa abale ache mbaenda nawo kuna mfumu. Iye adalonga kuna mfumuyo mbati, “Babanga na abale anga abwera kubulukira ku Kanani pabodzi pene na mikumbi ya pifuyo pyawo, pontho na pinthu pyawo pyonsene. Iwo ali m'nthemba ya Gosheni.” Tenepo iye adaaonesa abale achewo kuna mfumu.

³Mfumu adaavunza mbati, “Basa imbadziwa imwe njanji?” Iwo adatawira mbati, “Mfumu, ife ndife amakabuswa ninga mudachitira makolo athu akale.

⁴Ife tadza dzakhala m'dziko muno thangwi m'dziko ya Kanani njala yakula pyakwanga mwakuti nkhabe maudzu akuti pifuyo pyathu pidye. Taphata miyendo, mfumu, titawiriseni kukhala m'nthemba ya Gosheni.”

⁵Mfumu ule adalonga kuna Yosefe mbati, “Podi babako na abale ako afika,

⁶pontho dziko ya Iguputo ili pamaso pako, kapase babako na abale ako mbuto yadidiletu m'dziko muno. Atawirise kukhazikika m'nthemba ya Gosheni. Pontho ngakhala unadziwa anyaluso anango pakati pawopa, uaikhe kukhala akadamu akuyang'anira pifuyo pyanga.”

⁷Natenepo Yosefe adadza naye babache, Yakobo mbamuonesa kuna mfumu. Yakobo adapereka mtsanzayiso wache kuna mfumu,

⁸tenepo mfumu adamvunza mbati, “Una pyaka pingasi pyakubalwa?”

⁹Yakobo adatawira mbati, “Pyaka pyanga pyakutsalakatika ndi dzana ibodzi na makumatatu. Pyaka pyanga mphyakuchepa, pontho mphya nyatwa. Tenepo nkhabe khala sasawa na pyaka pyakufamba-famba pya makolo anga tayu.”

¹⁰Tenepo Yakobo adamtsanzayisa pontho mfumu mbabuluka pamaso pache.

¹¹Natenepo Yosefe adakhazikisa babache na abale ache m'dziko ya Iguputo mbaapasa mbuto yadidiletu ya m'dzikomo, chifupi na mzinda ya Ramesesi ninga mudalongera mfumu.

¹²Yosefe adapereka pontho kuna babache, abale ache na onsene a m'nyumba ya babache phoso yakukwana malingana na kuinjipa kwa anawo.

¹³Njala ikhadandendeya pyakwanga mwakuti konsene kwene kukhali nkhabe phoso. Tenepo anthu a mu Iguputo na Kanani adatondwa nayo njala.

¹⁴Pikhagula anthu phoso mu Iguputo mule, Yosefe akhagumanyisa kobiri zonsene mbaenda nazo kunyumba ya mfumu.

¹⁵Pidamala kobiri zonsene za mu Iguputo na Kanani, anthu a mu Iguputo adadza kuna Yosefe mbalonga mbati, “Tipaseni ife phoso! Lekani kutiyang'ana kwene kufa na njala. Chitanipo pinthu; kobiri zathu zonsene zamala.”

¹⁶Yosefe adatawira mbati, “Bwerani napyo kuno pifuyo pyanu. Ngakhala kobiri zanu zamaliratu, ine ndinakupasani phoso mwakuchita kuchinjisana.”

¹⁷Natenepo iwo adadza napyo pifuyo pyawo kuna Yosefe, iyembo adaapasa phoso mwakuchita kuchinjisana na akavalo awo, mabirawo, mbuzi zawo, ng'ombe zawo na mabulu awo. Chaka chenecho iye adapereka phoso kuna anthu mwakuchita kuchinjisana na pifuyo pyawo.

¹⁸Chaka chinangocho anthu ale adadza kuna Yosefe mbalonga mbati, “Mbuyathu, ife nee tinakubisirani tayu kuti kobiri zathu zonsene zamala, pontho pifuyo pyathu pyasanduka pyanu. Nkhabe pontho chakuti tikupaseni kupambula manungo athu na mindathu ene basi.

¹⁹Lekani kutiyang'ana kwene kufa na njala. Chitanipo pinthu! Lekani yang'ana kwene mindathu isanduke thando yatchetcha. Tiguleni ife pabodzi na mindathu ene mwakuchita kuchinjisana na phoso. Tonsene tinakhala pyathu mabitchu a mfumu, pontho mindathu mbikhale yache. Tipaseni phoso kuti tileke kufa, pontho tipaseni mbewu kuti tikabzale m'minda mwathu.”

²⁰Yosefe adagula dziko yonsene ya Iguputo kugulira mfumu. Munthu onsene wa mu Iguputo akhakhakhamizwa kuti agulise mindache thangwi njala idandendeya pyakwanga, tenepo dziko yonsene idasanduka ya mfumu.

²¹Yosefe adachitisa anthu kukhala mabitchu kubulukira nkhomo na nkhomo ya Iguputo.

²²Mbwenye mbuto idakhonda iye kwene gula ikhali ya anyansembe. Iwo hadatheme kuigulisa tayu thangwi mfumu akhaapasa phoso yakuti adye kuapagali thangwi ya basa ikhaphata iwo.

²³Yosefe adalonga kuna anthu ale mbati, “Podi ine ndakugulani pabodzi pene na mindanu kugulira mfumu, tenepo kwatani mbewuyi mukabzale m'minda mwanu.

²⁴Mbwenye phoso ingatokota mupereke kuna mfumu chachishanu cha pyakuvuna pyanu pyonsene. Pyakusalirapyo mphyanu kuti mudye, imwe, ananu na onsene a pabanja panu, pontho kuti muchite mbewu kubzala m'minda mwanu.”

²⁵Iwo adatawira mbati, “Mwatipulumusa; imwe mwatichitira udidi pikulu, mbuyathu, pontho tinakhala mabitchu a mfumu.”

²⁶Natenepo Yosefe adapereka mwambo m'dziko yonsene ya Iguputo wakuti chachishanu chonsene cha pinthu pinavuna iwo pikhale pya mfumu. Mwambo wenewu ulipo na lero. Dziko ene ya anyansembe ndiye hidasanduke ya mfumu tayu.

²⁷Aisraele adakhala m'dziko ya Iguputo m'nthemba ya Gosheni, kule kudabala iwo ana azinji mbafumako.

²⁸Yakobo adakhala m'dziko ya Iguputo pyaka makumanomwe mpakana iye adakwanisa pyaka dzana na makumanayi na pinomwe pyakubalwa.

²⁹Pikhali Israele chifupi kufa, adachemeresa mwanache Yosefe mbampanga mbati, “Ikha manjako pantchafu pangapa mbudumbire kuti ndingafa hunandiikha m'masiye a muno mu Iguputo tayu.[94]

³⁰Ndinafuna ndikaikhwe kudaikhwa makolo anga; undithukule kundibulusa muno mu Iguputo mbukandiikhe kudaikhwa iwo.” Yosefe adatawira mbati, “Ndinachita ninga munandipangira imwemu.”

³¹Israele adalonga mbati, “Dumbira kuti unapichita.” Yosefe adadumbiradi, tenepo Israele adapereka takhuta kuna MBUYA uku mbali patalimba pache.