Read cisena Kutoma 48 Bible Online

Kutoma 48 - cisena bible

Kutoma 48

¹Pidagwanda ndzidzi ene, Yosefe adapangwa kuti babache akhadwala. Natenepo adakwata anache awiri, Manase na Eferemu, mbaenda kaona Yakobo.

²Pidava Yakobo kuti mwanache Yosefe abwera dzamuona, adaphanisira kulamuka mbakhala na matako patalimba.

³Yakobo adalonga kuna Yosefe mbati, “Mulungu Wamphamvu zonsene adaonekera kuna ine pa Luzi, m'dziko ya Kanani mbanditsanzayisa.

⁴Iye adalonga kuna ine mbati, ‘Ndinati ndikupase ana azinji, tenepo pidzukulu pyako pinasanduka madzinza a anthu azinji; ndinapereka dzikoyi kuna pidzukulu pyako kuti ikhale yawo ene kwenda na kwenda.’ ”

⁵Yakobo adathimiza kulonga mbati, “Yosefe anako awiri abala iwe muno mu Iguputo, ine ndidzati fika, anawerengwa ninga anga; Eferemu na Manase mbananga sasawa ninga Rubeni na Simioni.

⁶Ngakhala una ana anango, enewo nkhabe werengerwa ninga ananga tayu; dziko inafuna iwo siyirwa inadzera muna Eferemu na Manase.

⁷Ndikuchita tenepo thangwi ya mako Rakele. Na kutsukwala kwanga iye adafa m'dziko ya Kanani, chifupi na Efurata, pikhabwerera ine kubulukira ku Mesopotamia. Ine ndidamuikha penepo m'khundu-khundu mwa njira ya ku Efurata.” (Efurata ndzidzi uno ukudziwika na Betelehemu).

⁸Pidaona Israele ana a Yosefe ale, adavunza mbati, “Aphale enewa mbani?”

⁹Yosefe adatawira mbati, “Enewa mbananga, ale andipasa Mulungu m'dziko ino ya Iguputo.” Israele adatawira mbati, “Dza nawo kuna ine towera ndiatsanzayise.”

¹⁰Maso a Israele adachita uzimola, thangwi iye akhadakalamba pyakwanga, tenepo iye hadakwanise kuona mwadidi tayu. Yosefe adadza nawo aphale ale kuna iye, tenepo iye adaakhumbatira mbaampsompsona.

¹¹Israele adalonga kuna Yosefe mbati, “Ine nee ndikhanyerezera kuti ndinakuona pontho tayu, tenepo Mulungu lero anditawirisa kuona na anako ene.”

¹²Tenepo Yosefe adaabulusa ana pamiyendo pa Israele mbalamba.

¹³Yosefe adakwata ana awiri ale mbadza nawo chifupi na Israele. Manase adamuikha kukhundu yakumadyo, Eferemu mbamuikha kumabzere kwa Israele.

¹⁴Mbwenye Israele adagwangwanyisa manjache mbasanjika dzanjache yamadyo pamsolo wa Eferemu, podi kwene kuti akhali wachiwiri kubalwa, mbakwata dzanjache yamabzere mbaisanjika pamsolo wa Manase, podi kwene kuti akhali wautombo.

¹⁵Tenepo iye adatsanzayisa Yosefe[95] mbalonga mbati, “Mulungu adatumikira ababanga Abrahamu na Isake ule, mbatsanzayise aphalewa! Mulungu adanditsogolera kufikirana lero ule mbaatsanzayise.

¹⁶Mngelo ule adandipulumusa kuna pyakugoswa pyonsene mbaatsanzayise! Dzinanga na madzina a ababanga, Abrahamu na Isake, mbaveke kudzera muna aphalewa. Iwo mbakhale na ana azinji, pontho na pidzukulu pizinji.”

¹⁷Yosefe adaipirwa napyo, pidaona iye kuti babache akhadasanjika dzanjache yamadyo pamsolo wa Eferemu, natenepo iye adabulusa dzanja ya babache pamsolo pa Eferemu mbaiikha pamsolo wa Manase.

¹⁸Iye adalonga kuna babache mbati, “Si mwenemo tayu, baba: ushu ndiye mwana wautombo, ikhani dzanjanu yamadyo pamsolo pache.”

¹⁹Babache adakhonda mbalonga mbati, “Ndikupidziwa, mwananga, ndikupidziwa. Pidzukulu pya Manase pinakhalambo mtundu ukulu. Mbwenye mphwacheyi anakhala wamkulu kupiringana iye, pontho pidzukulu pyache pinakhala madzinza akulu.”

²⁰Natenepo iye adaatsanzayisa nsiku yeneyo mbalonga mbati, “Aisraele anaphatisa basa madzina anu angalonga mafala akutsanzayisa. Iwo analonga kuti, ‘Mulungu mbakuchitise kukhala ninga Eferemu na Manase.’ ” Na njira yeneyi Israele adaikha Eferemu patsogolo pa Manase.

²¹Tenepo Israele adalonga kuna Yosefe mbati, “Ninga munaonera iwe, ine ndili chifupi kufa, mbwenye Mulungu anakhala nawe, pontho anakubwezera kudziko ya makolo ako.

²²Ine ndikupereka nthemba ya Shekemu kuna iwe, nee kuna abale ako tayu, nthemba yakukhala na mataka akubalisa pinthu, ile idapokosera ine Aamori pakuphatisa basa talasada pontho utanga.”