Read cisena Kutoma 50 Bible Online

Kutoma 50 - cisena bible

Kutoma 50

¹Yosefe adapigwisa pana babache mbalira na kumpsompsona nkhope ya babacheyo.

²Tenepo Yosefe adatonga anyaluso kuti asasanye mtembo wa babache na mtombwe, towera aleke vunda.

³Kusasanywa kwa mtembo kudakwata nsiku makumanayi, ndzidzi wache wakusasanya mtembo. Aiguputo adamulira nsiku makumanomwe.

⁴Pidamala ndzidzi wakusintili, Yosefe adalonga kuna mathubu a mfumu mbati, “Ndaphata miyendo ndikomerenimbo mtima pakundipangirambo mfumu kuti,

⁵‘Pikhali babanga chifupi kufa adandidumbirisa kuti ndimuikhe m'masiye, ale akhadasasanya iye kale m'dziko ya Kanani. Natenepo nditawiriseni ndiende kaikha babanga. Ndingamala ndinati ndibwere pontho.’ ”

⁶Mfumu adatawira mbati, “Ndoko kamuikhe babako ninga mudamdumbirira iwe kuna iye.”

⁷Natenepo Yosefe adenda kamuikha babache. Mathubu onsene a mfumu, atongi a thando yamiseru, na akadamu onsene m'dziko ya Iguputo adenda naye pabodzi Yosefe.

⁸Banjache, abale ache na onsene a m'nyumba ya babache adenda naye pabodzi. Mbwenye anawo ang'ono na mabira, mbuzi na ng'ombe zawo zidasala m'nthemba ya Gosheni.

⁹Amuna anango akukwira pingolo na anango akupakira akavalo adendambo pabodzi na Yosefe; ukhali mwinji ukulu ene.

¹⁰Pidafika iwo pambuwa ya Atadi kumabulukiro dzuwa a mkulo wa Yorodani, iwo adasintili mwakugaluza fala ndzidzi ukulu ene. Tenepo Yosefe adachita mwambo wakusintili nsiku zinomwe.

¹¹Pidaona mzika za mu Kanani kuti anthu ale akhasintili pa Atadi, adalonga mbati, “Mwambo wakusintili unachita Aiguputo ngwanji?” Ndi thangwi yache mbuto ile idathulwa Abele-Mizraimu.[102]

¹²Natenepo ana a Yakobo adachitadi ninga mukhadapangirwa iwo;

¹³iwo adathukula mtembo wache mbaenda nawo ku Kanani kauikha m'nkhwimba ya Makipela, kumabulukiro dzuwa a Mamure, m'munda ukhadagula Abrahamu kubulukira m'manja mwa Eferoni wa Chihiti kuti ukhale masiye ule.

¹⁴Pidamala Yosefe ikha babache, adabwerera ku Iguputo pabodzi pene na abale ache, pontho na onsene akhadenda naye pabodzi kumaliroko ale.

¹⁵Pidafa babawo, abale ache Yosefe adalonga mbati, “Tinachita tani ife ngakhala Yosefe akukoya mangawa basi, pontho anafuna kutibwezera pyakuipa pidamchitira ife pile?”

¹⁶Natenepo iwo adatuma mphangwa kuna Yosefe mbati, “Babathu mbadzati kufa

¹⁷adatipanga kuti tikupempheni kuti, ‘Ndaphata miyendo mulekerere pyakudawa pya abale anu pidakuchitirani iwo pile.’ Tenepo ife taphata miyendo, tilekerereni pyakudawa pidakuchitirani ife anyabasa a Mulungu wa babanu.” Yosefe adalira pidatambira iye mphangwa zenezi.

¹⁸Tenepo abale ache okha ene adadza mbalamba pamaso pache. Iwo adalonga mbati, “Ife tili pano pamaso panu ninga mabitchu anu.”

¹⁹Mbwenye Yosefe adalonga kuna iwo mbati, “Lekani chita mantha; ine nkhabe kwanisa kupiikha ndekha ene tayu pambuto ya Mulungu.

²⁰Imwe mudaphatizana kundichitira chinthu chakuipa, mbwenye Mulungu adachisanduza kukhala chadidi, towera kupulumusa moyo wa anthu azinji ana moyo lerowa, thangwi ya pidachitika pile.

²¹Imwe lekani chita mantha. Ine ndinati ndikutsalakaneni pabodzi pene na ananu ene.” Natenepo iye adaawangisa mtima na mafala adidi akuaphata mtima.

²²Yosefe adathimiza kukhala m'dziko ya Iguputo pabodzi pene na banja ya babache; pikhafa iye akhali na pyaka dzana na khumi.

²³Iye adaona ana a Eferemu na pidzukulu pyache. Pontho iye adaona ana a Makiri, mwana Manase, mbakhala nawo m'nyumba mwache.

²⁴Iye adalonga kuna abale ache mbati, “Ine ndili chifupi kufa, mbwenye Mulungu anati akuyang'anireni mwadidi mbakutsogolerani kukubulusani m'dziko muno kwenda namwe kudziko idadumbira iye kuna Abrahamu, Isake na Yakobo ile.”

²⁵Tenepo Yosefe adapempha abale ache kuti adumbire, mbalonga mbati, “Dumbirani kuti Mulungu angakutsogolereni kwenda namwe kudziko yeneyo munakwata magogodo anga kwenda nawo.”

²⁶Natenepo Yosefe adafa mu Iguputo uku ana pyaka dzana na khumi pyakubalwa. Iwo adasasanya mtembo wache na mtombwe kuti uleke vunda mbauikha m'baulu.