Read cisena Kutoma 6 Bible Online

Kutoma 6 - cisena bible

Kutoma 6

¹Pidainjipa anthu padziko yonsene yapansi, pontho na pikhabalwa atsikana,

²pyakulengwa pinango pyauzimu[22] pidaona kuti atsikana a anthu akhali akubalika pyakwanga, natenepo ipyo pidakwata atsikana pikhafuna ipyowo kukhala akazawo.

³Tenepo MBUYA adalonga mbati, “Mzimu wanga nkhabe khalave muna anthu kwenda na kwenda tayu, thangwi iwo ngakuipa. Kutomera lero kwenda m'tsogolo iwo hanakhalave pyaka kupiringana dzana ibodzi na makumawiri tayu.”

⁴Nsiku zenezo pontho kubuluka penepo padziko yapansi pakhali anthu akukhuma, ale akhali pidzukulu pya pyakulengwa pyauzimu, pontho ana achikazi a anthu. Ana enewo akhali anthu amphamvu akale-kale, pontho akuveka.

⁵Pidaona MBUYA kudawika pikulu kudachita anthu onsene a padziko yapansi, pontho kuipa kudachita manyerezero awo ndzidzi onsene,

⁶MBUYA adatsukwala kuti adasasanya munthu mbamuikha padziko yapansi. Mtimache udampha pyakwanga mwakuti

⁷adalonga mbati, “Ndinati ndiapuluze anthu adasasanya inewa pabodzi pene na nyama pontho mbalame, thangwi ndikutsukwala kuti ndidaasasanya.”

⁸Mbwenye MBUYA adakomerwa na Nowa.

⁹ Ishi ndi mbiri ya Nowa. Iye akhali na ana atatu achimuna, Semu, Hamu na Yafeti. Nowa akhali munthu wakulungama pontho wakusowa chakumpokanyisa pakati pa anthu ndzidzi wachewo. Iye akhali munthu wakuphatizana na Mulungu,

¹¹mbwenye anthu anango onsene akhali akuipa pamaso pa Mulungu, pontho ugandanga ukhali konsene kwene.

¹²Mulungu adayang'ana dziko yapansi mbaona kuti njakuipa, thangwi anthu akhakhala na makhaliro akudawika.

¹³Mulungu adalonga kuna Nowa mbati, “Ndinati ndipuluze anthu onsenewa. Ndinati ndiavunge monsene mwene, thangwi dziko yonsene yapansi yadzala na ugandanga thangwi ya iwo.

¹⁴Natenepo pisasanyire wekha ene chimwadiya kubulukira kumatabwa anjale; usasanye masubi m'bwalo mwachemo, pontho uzirime na upula kunja na m'bwalo mwene.

¹⁵Chimwadiyacho ulaphi wache ukhale makhono dzana na makumanayi, umimbache ukhale makhono makumawiri na atatu, pontho thungache ikhale makhono khumi na atatu.

¹⁶Usasanye nsoyi[23] ya chimwadiyacho, pontho usiye mbuto yakukwana kati ya khono pakati pa nsoyi na mafufu a chimwadiyacho. Uikhe msuwo pakhundu ya chimwadiyacho. Uchisasanye kuti chikhale na nyumba zitatu zakusanjikizana, yapansi, yapakati na yam'dzulu.

¹⁷Ine ndikufuna kuvumbisa mvula padziko yonsene yapansi kuvunga pinthu pyonsene pyamoyo. Pinthu pyonsene pya padziko yapansi pinati pife,

¹⁸mbwenye ndinasasanya chiverano na iwe. Pita m'chimwadiyamo, iwe, mkazako, anako achimuna na akazawo ene.

¹⁹M'chimwadiyamo upitisemo pyonsene pyakukhala na moyo piwiri-piwiri chikazi na chimuna, towera pisale mbewu.

²⁰Mbalame, nyama na pyakukambadza piwiri-piwiri pya mtundu onsene, towera pisale mbewu.

²¹Ukwate pontho phoso ya mtundu onsene, yako na ya nyama zene.”

²²Tenepo Nowa adachita pinthu pyonsene pidampanga Mulungu pile.