Read cisena Kutoma 7 Bible Online

Kutoma 7 - cisena bible

Kutoma 7

¹MBUYA adalonga kuna Nowa mbati, “Pita m'chimwadiya pabodzi pene na banjako yonsene; ine ndagumana kuti ndiwe ene basi ule ambachita pinthu pyakulungama mfendu wenewu.

²Ukwate nyama khumi na zinayi, zikazi zinomwe na zimunambo zinomwe za mtundu onsene zakuchena pamaso pa Mulungu, mbwenye ukwate nyama ziwiri zokha mamuna na mkazi za mtundu onsene zokhonda chena pamaso pa Mulungu.

³Ukwate pontho mbalame khumi na zinayi, zikazi zinomwe na zimuna zinomwe za mtundu onsene. Chita tenepo kuti nyama na mbalame za mtundu onsene zisale mbewu kuti zibalane pontho padziko yapansi.

⁴Nsiku zinomwe zingagwanda ndinati ndivumbise mvula ikulu, ile inavumba nsiku makumanayi mosiku na masikati, towera ivunge pinthu pyonsene pyamoyo pyasasanya ine pile.”

⁵Natenepo Nowa adachita pinthu pyonsene pidampanga MBUYA.

⁶Nowa akhali na pyaka madzana matanthatu pidadza madzi makulu padziko yapansi.

⁷Iye na mkazache, anache achimuna na akazawombo, adapita m'chimwadiya mule kuthawa madzi makulu ale.

⁸Nyama, mbalame, na pyakukambadza pya mtundu onsene, chimuna na chikazi, piwiri-piwiri, zakuchena na zokhonda chena zene pamaso pa Mulungu

⁹zidapita m'chimwadiya pabodzi pene na Nowa ninga mudalongera Mulungu.

¹⁰Pidagwanda nsiku zinomwe madzi makulu adadza.

¹¹Pandzidzi ukhakwanisa Nowa pyaka madzana matanthatu, pansiku yakhumi na chinomwe ya mwezi wachiwiri mphuno zonsene za nyanza ikulu pansi pa mataka zidatumbuka, pontho misuwo yonsene ya madzi makulu kudzulu adafungulwa.

¹²Tenepo mvula idavumba padziko yapansi nsiku makumanayi, mosiku na masikati.

¹³Pansiku yontho-yonthoyo Nowa na mkazache, anache achimuna atatu, Semu, Hamu na Yafeti, pontho na akazawo ene adapita m'chimwadiya mule.

¹⁴Iwo adapita m'chimwadiyamo pabodzi pene na nyama za mtundu onsene, zam'tsanga na zakufuyiwa, zakukambadza malingana na mtundu wache, pontho na mbalame za mtundu onsene na pyonsene pya maphaphido.

¹⁵Pinthu pyonsene pyamoyo, chikazi na chimuna, piwiri-piwiri pidapita m'chimwadiyamo pabodzi pene na Nowa,

¹⁶ninga mudalongera Mulungu. Tenepo MBUYA adafunga msuwo wa chimwadiya Nowa mbali mwenemo.

¹⁷Madzi makulu adathimiza kudza padziko yapansi nsiku makumanayi. Natenepo madziwo adazwika mwakuti chimwadiyacho chidathukuka mbachitoma kubeluka.

¹⁸Madzi adadzala pyakwanga mbathimizika pikulu padziko yapansi, natenepo chimwadiya chidabeluka pamadzi.

¹⁹Madzi adainjipa kufikirana mapiri onsene akulaphaletu konsene kwene pansi pa thambo adabizwa.

²⁰Madzi adathimiza kudzala kufikirana makhono manomwe kubulukira pa nsonga ya mapiri akulapha ale kwenda m'dzulu.

²¹Pinthu pyonsene pyamoyo padziko yapansi, mbalame zonsene, nyama zam'tsanga na zakufuyiwa, zakukambadza zakufamba m'magulu na anthu onsene pidafa.

²²Pinthu pyonsene pyakupuma m'dziko yapansi pidafa.

²³MBUYA adavunga pinthu pyonsene pyamoyo m'dziko yapansi; anthu, nyama, pyakukambadza, na mbalame. Akhadasala ndi Nowa ene na onsene akhali na iye m'chimwadiya mule basi.

²⁴Madzi makulu ale adakhala nsiku dzana na makumashanu hadzati kupwa.