Read cisena Kutoma 8 Bible Online

Kutoma 8 - cisena bible

Kutoma 8

¹Mbwenye Mulungu hadaduwalire Nowa na nyama zonsene, zakufuyiwa na zam'tsanga, zikhali na iye m'chimwadiya mule tayu, natenepo adatekenya mphepo padziko yapansi madzi mbatoma kupwa.

²Mphuno zonsene za madzi akubulukira pansi na misuwo yonsene ya madzi kudzulu pidafungwa. Natenepo mvula idaleka.

³Tenepo madzi adakwata nsiku dzana na makumashanu kuti apwe.

⁴Pansiku yakhumi na chinomwe ya mwezi wachinomwe, mwadiya udadza mbutchama pamapiri a Ararati.

⁵Madzi adathimiza kwenda mbapwa, tenepo pansiku yakutoma ya mwezi wakhumi nsonga za mapiri zidaoneka.

⁶Pidagwanda nsiku makumanayi Nowa adafungula zhanera ya chimwadiya chile

⁷mbabulusira kunja khungubwe kumtuma. Iye hadabwerereve tayu, mbwenye akhambuluka-mbuluka kwene pyache kufikirana madzi akhadapwa padziko yapansi.

⁸Tenepo Nowa adagwinya nkhangaiwa kaona ngakhala madzi akhadapwa padziko yapansi.

⁹Mbwenye nkhangaiwa ile hidakwanise kugumana mbuto yakuphamapo tayu, thangwi pakhali madzi okhokha padzulu ponsene padziko yapansi. Natenepo iye adabwerera kuna Nowa m'chimwadiya mule. Nowa adabulusa mkono wache panja mbakwata nkhangaiwa ile mbaipitisa m'chimwadiya mule.

¹⁰Nowa adadikhira nsiku zinango zinomwe mbagwinya pontho kunja nkhangaiwa ile bulukira m'chimwadiya mule.

¹¹Na kumawulo nkhangaiwa ile idabwerera kuna Nowa uku yapanangira tsamba iwisi ya muti waolivi kumolomo kwache. Natenepo Nowa adadzindikira kuti madzi akhadapwa.

¹²Tenepo adadikhira pontho nsiku zinomwe mbaigwinya kunja nkhangaiwa ile kachitatu. Ndzidzi wenewu iyo hidabwerereve tayu.

¹³Pikhali Nowa pyaka madzana matanthatu na chibodzi pyakubalwa, pansiku yakutoma ya mwezi wakutoma, madzi akhadapweratu padziko yapansi. Nowa adabulusa chakufungira cha chimwadiya chile mbasuzumira kunja mbaona kuti pansi pakhauma.

¹⁴Pansiku yamakumawiri na achinomwe ya mwezi wachiwiri dziko yapansi idaumiratu.

¹⁵Mulungu adalonga kuna Nowa mbati,

¹⁶“Buluka kunja kwa chimwadiya iwe na mkazako, anako achimuna, na akazawo ene.

¹⁷Bulusa kunja pyakulengwa pyonsene pina iwepyo, mbalame, nyama, na pyakukambadza, towera ziteyane pontho zidzale padziko yonsene yapansi.”

¹⁸Natenepo Nowa, mkazache, anache achimuna na akazawo adabulukambo kunja.

¹⁹Nyama zonsene, pyakukambadza pyonsene, na mbalame zonsene; pyonsene pyakufamba padziko yapansi pidabuluka m'chimwadiya mule magulu-magulu malingana na mtundu wawo.

²⁰Nowa adamangira MBUYA guwa; iye adakwata ibodzi ibodzi pamtundu onsene wa nyama na mbalame zakuchena pamaso pa Mulungu mbaziotcha zonsene ninga nsembe paguwapo.

²¹Khwema yadidi ya nsembeyo idamkomera MBUYA, natenepo iye adalonga yekha ene mbati, “Ine nkhabeve pontho kutemberera dziko yapansi thangwi ya pinthu pimbachita munthu tayu; ndikupidziwa kuti kutomera uwanache na lero manyerezero ache ngakuipa. Ine nkhabeve pontho kuvunga pyakulengwa pyonsene ninga mwachitira ine ndzidzi uno tayu.

²²Dziko yapansi mbilipo, panati pakhale ndzidzi wakubzala na ndzidzi wakuvuna. Ndzidzi onsene panakhala kutonthola na kupisa, malimwe na mainja, mosiku na masikati.”