Read cisena Kutoma 9 Bible Online

Kutoma 9 - cisena bible

Kutoma 9

¹Mulungu adatsanzayisa Nowa na anache achimuna ale mbalonga kuna iwo mbati, “Khalani na ana azinji, towera pidzukulu pyanu pikhale m'dziko yonsene yapansi.

²Nyama zonsene, pyakukambadza pyonsene, mbalame zonsene na nsomba zonsene zinakugopani. Ipyo pyonsene pyaikhwa pansi pa utongi wanu.

³Tenepo munakwanisa kudya pyonsenepyo ninga mudakupasira ine mbewu zonsene ziwisi kuti mudye; chinchino ndakupasani pyonsene kuti pikhale phoso yanu.

⁴Mbwenye lekani kudya nyama uku chiropa chache chili mwenemo, thangwi moyo wache wa nyama umbakhala m'chiropa.

⁵Ngakhala munthu anapha munthu mnzache, iye anati atchunyuswe. Ine ndinati nditchunyuse na imfa nyama zonsene zinapha munthu, pontho na munthu onsene anapha mwanzacheyo.

⁶Mulungu adasasanya munthu mwakulandana na iye, natenepo munthu onsene anapha mwanzacheyo, iye anaphiwambo na munthu mnzache.

⁷“Imwe mwathema kukhala na ana azinji, towera pidzukulu pyanu pikhale padziko yonsene yapansi.”

⁸Mulungu adalonga kuna Nowa na anache achimuna mbati,

⁹“Ine chinchino ndikusasanya chiverano na iwe, pontho na pidzukulu pyanu,

¹⁰pontho na pinthu pyonsene pyamoyo; mbalame zonsene, nyama zam'tsanga na zakufuyiwa zonsene, pyonsene pidabuluka na iwe pabodzi m'chimwadiya mule.

¹¹Ndikusasanya chiverano changa na iwe: Ine nkhabeve pontho kuvunga pinthu pyonsene pyamoyo na madzi makulu tayu; ine nkhabeve pontho kudzesa madzi makulu kuvunga dziko yapansi tayu.”

¹²Natenepo Mulungu adalonga mbati, “Ichi ntchidzindikiro cha chiverano chinachita ine pakati pa iwe na ine, pontho na papyonsene pyamoyo pina iwe, chiverano cha mifendu yonsene inadzayo:

¹³Ine ndinaikha taleza m'makole. Chenechi chinakhala chidzindikiro cha chiverano chathu pakati pa ine na dziko yapansi.

¹⁴Ndzidzi onsene unagudumira ine thambo na makole, pontho taleza mbuoneka m'makolemu

¹⁵penepo ndinakumbuka chiverano changa pana iwe na pana pinthu pyonsene pyamoyo. Ine nkhabeve pontho kuvunga moyo wa pyonsene na madzi makulu tayu.

¹⁶Ndzidzi onsene unaoneka talezawo m'makole, ndinati ndikumbuke chiverano chakukhonda mala pakati pa ine na pinthu pyonsene pyamoyo pya mtundu onsene pya padziko yapansi.”

¹⁷Tenepo Mulungu adalonga kuna Nowa mbati, “Ichi ntchidzindikiro cha chiverano chasasanya ine pakati pa pinthu pyonsene pyamoyo padziko yapansi.”

¹⁸Ana achimuna a Nowa, ale adabuluka m'chimwadiya akhali, Semu, Hamu na Yafeti. Hamu adabala Kanani.

¹⁹Enewa akhali ana atatu achimuna a Nowa, tenepo kubuluka muna iwo anthu azinji adabalwa ale adadzala dziko yonsene yapansi.

²⁰Nowa akhali nyakulima. Iye akhali munthu wakutoma kubzala mfesa.

²¹Pikhadamwa iye pang'ono vinyu wacheyo, iye adaledzera, tenepo adadula nguwo zache mbagona pyache chipezi-pezi m'khumbi mwache mule.

²²Pidaona Hamu, babache Kanani, kuti babache akhali chipezi-pezi, adabuluka panja mbakapanga abale ache awiri ale.

²³Tenepo Semu na Yafeti adakwata chakufinika mbachiikha kunduli paphewa pawo, adafamba chinduli nduli kupita m'khumbi mule mbamfinikiza babawo ule uku maso awo ayang'ana kukhabulukira iwo, towera aleke kumuona pezi babawo.

²⁴Pidakungunuka Nowa, pontho pidadziwa iye pikhadachita mwanache wakumalisira pile,

²⁵iye adalonga mbati, “Kanani mbatembererwe! Iye anakhala bitchu wa mabitchuletu kuna abale ache.”

²⁶Iye adathimiza kulonga mbati, “Kuzani MBUYA, Mulungu wa Semu. Kanani anakhala bitchu wa Semu.

²⁷Mulungu mbachitise nthemba ya Yafeti[24] kukula! Pidzukulu pyache pinakhala pabodzi na anthu a Semu! Kanani anakhala bitchu wa Yafeti.”

²⁸Pidamala madzi makulu Nowa adakhala pontho pyaka madzana matatu na makumashanu

²⁹mbafa ana pyaka madzana mafemba na makumashanu.