Read cisena 2 SAMUELE 1 Bible Online

2 SAMUELE 1 - cisena bible

2 SAMUELE 1

¹Pidafa Sauli, Davite adabwerera kudakunda iye Aamaleki kule mbakhala ku Zikilagi nsiku ziwiri.

²Mangwana mwache mphale unango adadza kubulukira kumsasa wa Sauli. Iye adang'amba nguwo zache na kuwaza fumbi mumsolo mwache kuonesa kutsukwala. Iye adenda kuna Davite mbalamba kupereka chilemedzo.

³Davite adamvunza mbati, “Wabulukira kupi?” Iye adatawira mbati, “Ndachita kuthawa kumsasa wa Aisraele.”

⁴Davite adalonga mbati, “Ngandipange chachitika ninji?” Iye adatawira mbati, “Anyankhondo athu athawa kunkhondo, pontho amuna athu azinji aphiwa. Sauli na mwanache ene Yonatani afa.”

⁵Davite adamvunza mbati, “Ukupidziwa tani kuti Sauli na mwanache ene Yonatani afa?”

⁶Iye adatawira mbati, “Pidachitika kuti ndikhali paphiri ya Giliboa, tenepo ndidaona Sauli atsamira dipache pontho pingolo na anyakupakira akavalo a anyamalwa akumzungulira.

⁷Tenepo iye adacheuka mbandiona, tenepo iye adandichemera. Ine ndidatawira kuti, ‘Ndichitenji, Mbuya?’

⁸Iye adandivunza mbati, ‘Ndiwe ani?’ Ine ndidatawira kuti, ‘Ndine Muamaleki.’

⁹Tenepo iye adalonga kuna ine mbati, ‘Idza kuno undiphe! Ine ndakuwazwa pikulu pene tenepo ndili chifupi kufa.’

¹⁰Tenepo ndidenda kuna iye mbandimpha thangwi ndikhadapidziwa kuti sindzidzi nkhugwa iye mbadafa basi. Tenepo ndidakwata chipewu chache chachifumu mumsolo mwache na goza ikhali mumkono mwache mbandidza napyo kuno kuna imwe, mbuyanga.”

¹¹Davite adang'amba nguwo zache na kutsukwala, pontho amunache adachitambo chibodzi-bodzi.

¹²Iwo adatsukwala, kusintili na kupimana kudya mpakana mawulo, thangwi ya Sauli na Yonatani, pontho na Aisraele, anthu a Mulungu, thangwi azinji akhadaphiwa pankhondo.

¹³Davite adavunza mphale adadza na mphangwa ule mbati, “Wabulukira kupi?” Iye adatawira mbati, “Ndine Muamaleki. Kwache ndimbakhala m'dziko mwanu muno.”

¹⁴Davite adamvunza mbati, “Udawanga tani mtima kupha mfumu wakusankhulwa na MBUYA?”

¹⁵Tenepo Davite adachemera mamuna mbodzi mbampanga mbati, “Imphe.” Munthu ule adampha mphaleyo pakumkhamwadza.

¹⁶Thangwi Davite akhadalonga kuna iye mbati, “Chiropa chako chigwere pamsolo pako. Mulomo wako uchitire umboni wakupokanyisana nawe pidalonga iwe kuti, ‘Ine ndidapha mfumu wakusankhulwa na MBUYA?’ ”

¹⁷Davite adaimba nyimbo ya maliro kuimbira Sauli na mwanache Yonatani,

¹⁸mbatonga kuti nyimbo yeneyi ifunziswe anthu a ku Yuda. (Nyimbo yeneyi idalembwa m'bukhu ya Yashara.)

¹⁹“Pamapiri a Israele akadamu athu afapo! Anyankhondo athu akuwanga mtimaletu amala kugwa!

²⁰Leka kupilonga mu Gati, penu kupilalika njira za mu Ashikeloni. Leka kuchitisa akazi a Chifilisti kukomerwa; Leka kuchitisa akazi a anthu okhonda dziwa Mulungu ale kusekera.

²¹“Mbapaleke kuvumba mvula penu kugwa bume pamapiri a Giliboa; mindache mbileke bala pinthu! Thangwi chakugedera matswimo cha anyakuwanga mtima, chili gwenjere mwakuchitisa manyadzo; chakugedera matswimo cha Sauli nkhabeve musiriswa na mafuta tayu.

²²Kuna mnofu wa anyamphamvu, kuna chiropa cha anyakulaswa, uta wa Yonatani hukhakhwitcha tayu, pontho talasada ya Sauli ikhali yakusowa nsisi.

²³“Sauli na Yonatani akhali anthu akufunwa na anthu ndzidzi wa moyo wawo pontho akukoma mtima; pabodzi pene m'moyo uno, pabodzi pene na pakufa; akudziwa kuthamanga kupiringana mphamba, akhali amphamvu kupiringana nkhalamu.

²⁴“Akazi a mu Israele, sintilini Sauli! Iye adakuvazikani nguwo zakufira zakubalika mbakuchitisani kuoneka akubalika na pyakuthemesera pyagolidi.

²⁵“Anyankhondo akuwanga mtima agwa, iwo adaphiwa pankhondo. Yonatani ali tambza afa m'mapiri.

²⁶“Ndikulirira iwe mbaleanga Yonatani; iwe ukhali wa pamtima panga! Kundifuna kwako kukhali kwakudodomesa pyakwanga kuna ine, nkhwadidi kupiringana kufuna kumbachita akazi.

²⁷“Anyankhondo akuwanga mtima agwa, pida pyawo pyasiyiwa, pontho nkhabe basa tayu.”