Read cisena 2 SAMUELE 10 Bible Online

2 SAMUELE 10 - cisena bible

2 SAMUELE 10

¹Pidagwanda ndzidzi pang'ono Mfumu Nahashi wa Amoni adafa, tenepo mwanache Hanuni adapita ufumu m'mbuto mwache.

²Davite adalonga mbati, “Ine ndinati ndikomere mtima Hanuni mwana Nahashi ningambo mudandikomera mtima babache.” Tenepo Davite adatuma anyamphangwa kuonesa nsisi zache. Pidafika iwo ku Amoni,

³akadamu a ku Amoni adalonga kuna mfumu mbati, “Ayi mukunyerezera kuti Davite atuma anyamphangwa kuna imwe kuonesa nsisi zache thangwi ya kufuna kulemedza babanu? Nkhabe, tayu! Iye adaatuma kuno ninga anyakuzonda mzinda towera aupokosere!”

⁴Hanuni adaphata anyamphangwa adatumwa na Davite ale mbaachinga khundu ibodzi ya ndevu zawo mbang'amba nguwo zawo mpakana m'matako mbaagwinya kuti aende pyawo.

⁵Iwo akhachita manyadzo pyakwanga kuti abwerere kwawo. Pidava Davite pinthu pidachitika pile, iye adatuma mphangwa kaapanga kuti abange khala pyawo ku Yeriko mbabwerera mwenemo ndevu zawo zamera pontho.

⁶Aamoni adadzindikira kuti iwo akhadachitisa Davite kukhala nyamalwawo, tenepo iwo adalemba anyankhondo aganyo a Chiaramu pikwi makumawiri a ku Beterehobu na Zoba, amuna pikwi khumi na piwiri a ku Tobu, pontho na mfumu wa ku Maaka na amuna chikwi chibodzi.

⁷Pidapiva Davite, adatuma Yoabu pabodzi pene na anyankhondo onsene kamenya nkhondo.

⁸Aamoni adabuluka mbakakhala m'mbuto zawo zankhondo pamsuwo wa mzindawo ukulu wa Raba, mwenemo anango, pabodzi pene na Aaramu na amuna a ku Tobu na Maaka adakhala m'mbuto zawo m'minda.

⁹Yoabu adaona kuti patsogolo pache na m'nduli mwache pakhali magulu anyankhondo, tenepo iye adasankhula magulu ankhondo akunyindirika mu Israele mbaaikha m'mbuto zawo zankhondo mwakuyang'anisana na Aaramu.

¹⁰Iye adaikha anyankhondoche anango akusalirawo pansi pa utongi wa Abishai mbaleache, ulembo adaaikha m'mbuto zawo zankhondo mwakuyang'anisana na Aamoni.

¹¹Yoabu adalonga kuna iye mbati, “Ngakhala unaona Aaramu akundikunda, idza undiphedze, tenepo inembo ndingaona Aamoni akukukunda, ndinati ndidze dzakuphedza.

¹²Wangisa pontho wanga mtima! Tende timenyere nkhondo anthu athu, pontho na mizinda ya Mulungu wathu mwakuwangisa. Kufuna kwa MBUYA mbakuchitike!”

¹³Yoabu na amunache adenda kasosa, tenepo Aaramu adathawa.

¹⁴Pidaona Aamoni kuti Aaramu akuthawa, iwombo adathawa pamaso pa Abishai mbaenda kumzindawo. Tenepo Yoabu adabwerera kubulukira kamenyana na Aamoni mbaenda ku Yerusalemu.

¹⁵Pidadzindikira Aaramu kuti iwo adakundwa na Aisraele, adagumanyisa magulu awo onsene ankhondo kudza pabodzi pene.

¹⁶Mfumu Hadadezere adatumira mphangwa Aaramu, ale akhali kukhundu inango ya mkulo wa Yufurate, tenepo iwo adadza ku Helamu pansi pa utongi wa Shobaki, mkadamu wa anyankhondo a Mfumu Hadadezere wa ku Zoba.

¹⁷Pidava Davite penepi, adagumanyisa pabodzi magulu ankhondo a Aisraele. Iwo adawambuka mkulo wa Yorodani mbaenda ku Helamu, kule kudakhala Aaramu m'mbuto zawo zankhondo mwakuyang'anisana naye. Nkhondo idaotoka,

¹⁸tenepo Aisraele adathamangisa anyankhondo a Aaramu kuabwezera m'nduli. Davite na amunache adapha anyakufambisa pingolo madzana manomwe na amuna akupakira akavalo pikwi makumanayi, pontho adakuwaza Shobaki, mkadamu wa anyankhondo mbaferatu ponthopo.

¹⁹Pidadzindikira mafumu, ale akhali pansi pa utongi wa Hadadezere kuti iwo akhadakundwa na Aisraele, adachita mtendere na Aisraele mbakhala pansi pa utongi wawo. Tenepo Aaramu adachita mantha kuphedza pontho Aamoni.