Read cisena 2 SAMUELE 11 Bible Online

2 SAMUELE 11 - cisena bible

2 SAMUELE 11

¹Pandzidzi wakuphwitha miti, ndzidzi ukhaenda mafumu kunkhondo, Davite adatuma Yoabu na mathubu ache pabodzi pene na anyankhondo a Chiisraele; iwo adakunda Aamoni mbazungulira mzinda wa Raba na anyankhondo awo. Mbwenye Davite adasalira mu Yerusalemu.

²Nsiku inango na mawulo, Davite adalamuka pakadera pache mbathamula miyendo pansoyi ya nyumbache ya chifumu. Na penepo iye adaona mkazi akusamba, ule akhali wakubalika pyakwanga.

³Tenepo iye adatuma munthu kukaona kuti mkaziyo akhali ani mbapidziwa kuti akhali Batesheba mwana wamkazi wa Eliamu, pontho mkazache Uria Mhiti.

⁴Tenepo Davite adatuma munthu kuti akachemere mkaziyo; iye adadzeswa kuna iye mbapita naye m'bonde. Mkaziyo akhadamalisa kwene kupichenesa yekha ene kuteweza mwambo thangwi ya kusamba kwache. Kubuluka penepo iye adabwerera kwawo.

⁵M'nduli mwache mkazi ule adadzindikira kuti adakwata mimba, tenepo adatuma mphangwa kuna Davite kumpanga penepi.

⁶Davite adatuma mphangwa kuna Yoabu mbati, “Tumiza kuno Uria Mhiti.” Natenepo Yoabu adamtumizadi kuna Davite.

⁷Pidafika Uria, Davite adamvunza ngakhala Yoabu na anyankhondo akhali mwadidi, pontho kuti nkhondo ikhafamba tani.

⁸Iye adalonga kuna Uria mbati, “Ndoko kumusa kwako ukabange kapuma.” Tenepo Uria adenda, m'nduli mwache mfumu adamtumira mtukwa.

⁹Kwache Uria hadende kumusa kwache tayu. M'mbuto mwache iye adagona pyache pamsuwo wa nyumba ya mfumu pabodzi pene na anyakulondali a mfumu.

¹⁰Pidapiva Davite kuti Uria hadende kumusa kwache tayu, adamvunza mbati, “Iwe wafamba nsinzo wakulapha pyakwanga, apo watani wakhonda kwenda kumusa kwako?”

¹¹Uria adatawira mbati, “Amuna a ku Israele na Yuda ali kunkhondo pontho Bokosi ya Chiverano ina iwo, mkadamu wanga Yoabu na mathubu ache amanga msasa pamtetete. Apo ndinakwanisa tani kwenda kumusa kwanga kadya, kamwa na kugona na mkazanga. Ine ndinadumbira na kutani kwene kuti ine nkhabe chita chinthu ninga chenechi tayu!”

¹²Tenepo Davite adalonga mbati, “Khala na ine lero tenepo mangwana ndinati ndikutumize kubwerera.” Natenepo Uria adakhala ku Yerusalemu nsiku yeneyo na mangwana mwache.

¹³Davite adamchemera kuti akadye pyakudya pya mawulo mbamuledzeresa. Kwache mosiku wenewo pontho Uria hadende kumusa kwache tayu, m'mbuto mwache iye adagonera pachakufindika[14] chache m'subi ya anyakulondali nyumba ya mfumu.

¹⁴Mangwana mwache na machibese Davite adalembera Yoabu kalata mbaitumiza na Uria.

¹⁵Iye adalemba tenepa: “Ikha Uria pamzera wakutsogolo kule kumbakaka nkhondo, tenepo msiyeni yekha ene towera aphiwe.”

¹⁶Tenepo pikhazungulira Yoabu mzinda na nkhondo, adatumiza Uria pambuto pale padakakisa anyamalwawo nkhondo.

¹⁷Anyamalwa adabuluka mumzinda mbamenyana na anyankhondo a Yoabu, anango mwa anyankhondo a Davite adaphiwa, na Uria Mhiti enembo adaphiwa.

¹⁸Yoabu adatuma mphangwa kuna Davite kumpanga pya nkhondo;

¹⁹mbampanga munthu adenda na mphangwayo mbati, “Ungamala kumpanga mfumu pyonsene pya nkhondo,

²⁰iye anakwanisa kuzhangali mbakuvunza kuti, ‘Thangwi yache ninji imwe mudenda chifupi na mzinda kamenya nawo nkhondo?

²¹Ayi imwe mudadzindikire tayu kuti iwo anaponya matswimo na m'mafufu a mpanda? Imwe mudakumbuke tayu mudaphera iwo Abimeleki mwana Gideoni? Kukhali ku Tebezi kule kudaponya mkazi libwe na pampanda mbampha nayo. Apo thangwi yache ninji imwe mudenda chifupi na mpanda ninga tenepa?’ Ngakhala mfumu anakavunza penepi kampange kuti, ‘Uria nyabasanu aphiwambo basi.’ ”

²²Tenepo nyamphangwa adenda kuna Davite mbampanga pyonsene pidampanga Yoabu.

²³Iye adalonga mbati, “Anyamalwathu akhali na mphamvu pyakwanga kupiringana ife; iwo adabuluka mumzinda mwawo mbamenyana nafe pamtetete. Kwache ife tidaathamangisira kumsuwo wa mzinda.

²⁴Tenepo iwo adatiponyera matswimo na pampanda, natenepo anyankhondo anu anango aphiwa. Uria nyabasanu aphiwambo basi.”

²⁵Davite adalonga kuna nyamphangwa ule mbati, “Kawangise mtima Yoabu pontho kampange kuti aleke sanyika napyo mtima, podi iwe nkhabe dziwa tayu kuti mbani anafuna kufa kunkhondo. Mpange kuti akakise nkhondo mbapokosera mzindawo.”

²⁶Pidapiva Batesheba kuti mamunache akhadaphiwa kunkhondo, iye adamsintili.

²⁷Pidamala ndzidzi wakusintili, Davite adamchemeresa kunyumba kwache; iye adasanduka mkazache mbabala naye mwana wa mamuna. Kwache pidachita Davite pile MBUYA pidamuipirwa.