Read cisena 2 SAMUELE 12 Bible Online

2 SAMUELE 12 - cisena bible

2 SAMUELE 12

¹MBUYA adatuma mprofeti Natani kuna Davite. Tenepo pidadza iye kuna Davite adalonga mbati, “Pidachitwa na amuna anango awiri muluwani inango; mbodzi akhali nyakufuma, unangomboyu akhali nyakutcherenga.

²Nyakufumayi akhali na ng'ombe na mabira mazinji.

³Mbwenye nyakutcherenga akhali na mwanabirache mbodzi ene basi, akhadagula iye ule. Iye adamuyang'anira mwadidi mbakula pamsuwo pache na anache. Mwanabirayo akhadya pyakudya pikhadya iye mbamwesera na m'khomitcho mwache, pontho akhamuikha pamiyendo pache. Kuna iye mwanabirayo akhakhala ninga mwanache wachikazi.

⁴Nsiku inango kumsuwo wa nyakufuma kudafika mlendo. Nyakufuma ule hadafune pyakupha chibodzi mwa pifuyo pyache tayu kuti asasanyire mlendo wache ule. M'mbuto mwache iye adakwata mwanabira wa nyakutcherenga ule mbamphikira mlendo wache ule.”

⁵Davite adazhangali pyakwanga na nyamfuma ule mbalonga mbati, “Ndinadumbira na dzina ya MBUYA wamoyo kuti munthu adachita penepiyi athema kufa.

⁶Na thangwi ya pinthu pyakukala mtima pidachita iyepi, athema kupagali kanayi kupiringana pidakwata iye pile.”

⁷Natani adalonga kuna Davite mbati, “Munthu wache ndiwe ene.” Tenepo MBUYA Mulungu wa Israele akulonga kuti: “Ine ndidakupitisa ufumu wa Israele mbandikupulumusa m'manja mwa Sauli.

⁸Ine ndidakupasa ufumu wache na akazache ene; ndidakuikha kukhala mfumu wa Israele na Yuda ene. Ngakhala penepi pidakukwane tayu ine mbidakupasa pyakuinjipa kupiringana penepi.

⁹Apo thangwi yache ninji wakhonda kuvera matongero anga? Iwe wachitiranji chinthu chakuipa ninga chenechi? Iwe waphesa Uria pankhondo na talasada ya Aamoni mbukwata mkazache.

¹⁰Tenepo chinchino anango mwa pidzukulu pyako anafa na imfa yakugoswa thangwi iwe wakhonda kundivera mbukwata mkazi wa Uria.

¹¹Ndinadumbira kuna iwe kuti ndinachitisa mbodzi wa m'banja mwako kudzesa nyatwa pana iwe. Iwe unapiona ndingapokosera akazako mbandiapasa munthu unango, tenepo iye anagona nawo pakwecha dzuwa ikuswa miti.

¹²Iwe wachita penepi chibiso-biso, kwache ine ndinapichitisa penepi kuchitika pakwecha dzuwa ikuswa miti kuti Aisraele onsene aone.”

¹³Davite adalonga mbati, “Ine ndadawira MBUYA.” Natani adatawira mbati, “MBUYA akulekerera; iwe hunafa tayu.

¹⁴Kwache na thangwi yakuti iwe waonesa kukhonda gopa MBUYA na pyachita iwepi mwanayo anati afe.”

¹⁵Kubuluka penepo Natani adabwerera kwawo. MBUYA adachitisa mwana Davite, ule adabala iye na mkazi Uria kudwala pyakwanga.

¹⁶Davite adapemphera kuna Mulungu kuti mwanayo awange. Iye adakhonda kudya na chinthu chene pontho mosiku onsene iye akhaenda kusubi kwache mbagona pyache pansi.

¹⁷Mathubu ache adenda kuna iye mbayesa kumulamusa, kwache iye adakhonda kudya na chinthu chene pabodzi nawo.

¹⁸Pidagwanda dimingu ibodzi mwana ule adafa, tenepo mathubu a Davite adachita mantha kumpanga pidachitika pile. Iwo adalonga mbati, “Mwanayu mbali moyo, Davite hakhatitawira tayu tingalonga naye. Apo tinampanga tani kuti mwanache afa? Iye anakwanisa kupikuwaza yekha ene!”

¹⁹Pidadzindikira Davite kuti iwo akhalonga chipansi-pansi kuna unango na mwanzache adadzindikira kuti mwanayo adafa. Tenepo iye adavunza mbati, “Kani mwana afa?” Iwo adatawira mbati, “Ande, afa.”

²⁰Davite adalamuka pansi padagona iye pale, adasamba, adasapula tsisi yache mbavala nguwo zinango. Natenepo adapembedza m'nyumba ya MBUYA. Pidabwerera iye kunyumba kwache iye adapempha kuti adye, tenepo iye adadya na ndzidzi onthowo udapaswa iye pyakudyawo.

²¹Mathubu ache adalonga kuna iye mbati, “Ife nkhabe kuvesa pinachitikapi tayu. Ndzidzi ukhali mwanayi na moyo imwe mukhalira mbamukhonda kudya; mbwenye lero sindzidzi mwanayo nkhufa mwalamuka mbamudya!”

²²Davite adatawira mbati, “Ande, ine ndidapimana kudya na kulira ndzidzi ukhali mwanayo na moyo. Ine ndidanyerezera kuti MBUYA anandivera nsisi kuti mwana aleke kufa.

²³Chinchino podi iye afa, thangwi yache ninji kuti ndipimane kudya? Apo ine ndinakwanisa kumulamusa kuimfa? Ine ndikupidziwa kuti nsiku inango ndinati ndiende kuna iyeko, kwache iye nkhabe kwanisa kubwerera kuna ine tayu.”

²⁴Tenepo Davite adathondoza mkazache Batesheba. Iye adapita naye m'bonde mbabala naye mwana wamamuna mbamthula Solomoni. MBUYA adamfuna pyakwanga mphaleyo

²⁵mbapanga mprofeti Natani kuti amthule mphaleyo dzina yakuti Yedidia,[15] thangwi MBUYA adamfuna.

²⁶Pandzidzi wenewu Yoabu adathimiza kumenyana na Raba mzinda ukulu wa Aamoni mbasala chifupi kuupokosera.

²⁷Iye adatuma mphangwa kuna Davite kumpanga kuti: “Ine ndasosa mzinda wa Raba mbandipokosera mbuto zonsene zakuudzesera madzi.

²⁸Tenepo gumanyisani magulu anu ankhondo anango onsene akausose mbaupokosera kuti ukhale wanu gopesera ine ndinaupokosera mbuthulwa na dzinanga.”

²⁹Davite adagumanyisa anyankhondo ache mbaenda ku Raba, tenepo adausosa mbaupokosera.

³⁰Kubulukira pa msolo wa mfanikizo wa milungu Moleki, Davite adakwata chipewu chachifumu chagolidi chile chidalemera makilogramu makumashanu na mashanu mbachikhala pontho na mwala wakudula mwenemo. Davite adachikwata mbachivala mumsolo mwache. Iye adakwata pontho pinthu pizinji pidapokoserwa mumzindamo

³¹mbakwata anthu akhali mwenemowo mbaapasa kuti aphate basa ya macheka, mapaza na mbadzo mbaakhakhamiza kuumba njerwa. Iye adachita chibodzi-bodzi kuna anthu a m'maluwani onsene a Amoni. Kubuluka penepo iye na amunache adabwerera ku Yerusalemu.