Read cisena 2 SAMUELE 13 Bible Online

2 SAMUELE 13 - cisena bible

2 SAMUELE 13

¹Abisalomu mwana Davite akhali na nyamaingache wakubalika pyakwanga dzinache Tamara. Aminoni akhali mwana unango wa Davite, tenepo iye adamfuna pyakwanga mtsikanayo.

²Iye adamfuna pyakwanga pene mwakuti iye adafeluka thangwi pikhaoneka pyakukhonda kwanisika kuti achite naye pikhafuna iye, podi mtsikanayo akhali mwali okhonda dziwa mamuna.

³Mbwenye iye akhali na shamwaliache dzinache Yonadabu mwana wamamuna wa Shimea, mbaleache Davite. Yonadabu akhali munthu wakushashalika pyakwanga.

⁴Yonadabu adalonga kuna Aminoni mbati, “Iwe ndiwe mwana wa mfumu, kwache nsiku na nsiku iwe umbaoneka wakutsukwala. Ninji chinakunensa?” Iye adatawira mbati, “Ine ndamfuna pyakwanga Tamara nyamaingache mbaleanga Abisalomu.”

⁵Yonadabu adalonga kuna iye mbati, “Usangizire kufeluka mbuende kagona patalimba. Tenepo babako angadza dzakuona, ulonge kuna iye kuti, ‘Ndaphata miyendo ndipangireni nyamainganga Tamara kuti andipase pyakudya. Ndinafuna kuti asasanye pyakudyapyo pamaso panga, angamala penepo iye ene andifiliviri.’ ”

⁶Natenepo Aminoni adasangizira kufeluka mbaenda kagona patalimba. Mfumu Davite adenda kamuona, tenepo Aminoni adalonga kuna iye mbati, “Ndaphata miyendo mtawiriseni nyamainganga Tamara kudzandisasanyira pitumbuwa pamaso panga, angamala penepo iye ene andifiliviri yekha ene.”

⁷Natenepo Davite adatuma mphangwa kuna Tamara kunyumbache yachifumu zakuti: “Ndoko kugelo kwa Aminoni ukamsasanyire pyakudya.”

⁸Tamara adendadi kweneko mbamgumana agona patalimba. Iye adamunya mpambo mbasasanya pitumbuwa mwenemo, iye mbali kuona. Kubuluka penepo iye adaphika pitumbuwa.

⁹Iye adakwata chiwaya mbapakula pitumbuwa pile pamaso pache kuti adye, kwache Aminoni adakhonda kudya. Iye adalonga mbati, “Bulusa munthu onsene panja.” Tenepo onsene adamala buluka panja.

¹⁰Aminoni adalonga kuna iye mbati, “Idza na pitumbuwapyo patalimba panga pano mbundifiliviri.” Iye adakwata pitumbuwa pile mbaenda napyo chifupi na talimbacheyo.

¹¹Sindzidzi nkhumpasa pitumbuwa pile, iye adamphata mbalonga mbati, “Tende ndigone nawe.”

¹²Tamara adalonga mbati, “Tayu, nkhoswe yanga. Leka kundikhakhamiza kuchita chinthu ninga chenechi, chinthu chokhonda tawiriswa mu Israele muno. Leka chita chinthu chakuipa ninga chenechi.

¹³Apo ine, ndinaenda kupi kuthawa pinthu pyakuchitisa manyadzopi? Mphapo iwembo, unakhala ninga mbodzi wa mapupwe akudawika mu Israele muno. Ndaphata miyendo, ndoko ukalonge na mfumu iye nkhabe kukukhondesa tayu kuti undisembe.”

¹⁴Kwache iye hadamvesere tayu. Podi iye akhali wamphamvu kupiringana Tamara, iye adamkunda mbamphatirira.

¹⁵Kubuluka penepo Aminoni adamzonda pyakwanga pene Tamara; ndzidzi wenewu iye adamzonda pyakwanga pene kupiringana kumfuna kudachita iye pakutoma. Tenepo adalonga kuna iye mbati, “Lamuka ubuluke panja.”

¹⁶Iye adatawira mbati, “Nyonyo pyanga! Kundibulusa panja ninga tenepa ngupandu ukulu pyakwanga kupita pyandichita iwe chinchinopi!” Kwache Aminoni hadamvesere tayu.

¹⁷Tenepo iye adachemeresa nyabasache mbalonga kuna iye mbati, “Bulusa mkaziyu pamaso panga. Mponyere kunja mbufunge msuwo na mphinga!”

¹⁸Nyabasa ule adambulusa panja mbafunga msuwo. Tamara adavala mkhanjo wache wamikono,[16] nguwo zakuvala mwana mfumu okhonda dziwa mamuna nsiku zonsenezo.

¹⁹Iye adapiwaza dotha mumsolo mwache mbang'amba mkhanjo wache, pontho adabisa nkhope na manjache mbaenda pyache uku akulira.

²⁰Pidamuona nkhoswe yache Abisalomu adamvunza mbati, “Kani Aminoni akuchitira pyakuzuda? Matama nyamainganga. Leka sanyika napyo mtima, iye ndi nkhoswe yako. Tenepo Tamara adakhala m'nyumba mwa Abisalomu wakutsukwala pontho yekha ene.”

²¹Pidapiva Mfumu Davite pidachitika pile adazhangali napyo pyakwanga.

²²Tenepo Abisalomu adamzonda pyakwanga pene Aminoni thangwi ya kuphatirira Tamara nyamaingache mwakuti hadalonge naye tayu.

²³Pidagwanda pyaka piwiri Abisalomu akhachingisa mabirache ku Baala-Hazori chifupi na luwani ya Eferemu, tenepo iye adachemera ana onsene a mfumu kukhala penepo.

²⁴Iye adenda kuna Mfumu Davite mbalonga mbati, “Mfumu, ine ndikuchingisa mabiranga. Imwe na mathubu anu munakwanisa dzakhala nawo paphwandopo.”

²⁵Mfumu adatawira mbati, “Nkhabe, mwananga, tonsenefe nkhabe kwendako tayu gopesera tinakunensa.” Podi kwene kuti Abisalomu adamkhakhamiza, iye adakhonda kwendako, kwache iye adamtsanzayisa.

²⁶Abisalomu adalonga mbati, “Ngakhala imwe munaendako tayu, ndaphata miyendo mtawiriseni mbaleanga Aminoni kwendako.” Mfumu adavunza mbati, “Thangwi yanji?”

²⁷Mbwenye Abisalomu adakakamira kupempha mpakana mfumu adatawirisa Aminoni na anache onsene achimuna kwenda na Abisalomu. Abisalomu adasasanya phwando yakuthemerana na mfumu[17]

²⁸mbapanga anyabasache pyakuchita mbati, “Ngavani kuno, Aminoni angaledzera na vinyu, pontho ine ndingakupangani kuti mumphe, mpheni. Lekani chita mantha. Pilekeni pigwere ine pano. Wangani mtima pontho lekani chita chidodo.”

²⁹Tenepo anyabasa adachita ninga montho mudaapangira Abisalomu mbapha Aminoni. Penepo pene ana anango a mfumu adapakira mabulu awo mbathawa.

³⁰Mukhaenda iwo kwawo, Davite adapangwa mbati, “Abisalomu amala kupha anako onsene, pontho nkhabe na mbodzi ene asala na moyo tayu!”

³¹Mfumu adalamuka mbang'amba nguwo zache na kutsukwala mbapigwisa pansi. Anyabasa akhali na iye penepo adang'ambambo nguwo zawo.

³²Mbwenye Yonadabu mwana Shimea mbaleache Davite adalonga mbati, “Mfumu, iye hadaphe ananu onsene tayu, aphiwa ndi Aminoni ene basi. Munthu onsene anakwanisa kudziwa pakuuona nkhope yache kuti Abisalomu adasasanya kuchita penepi kubulukira ndzidzi udaphatirira Aminoni nyamaingache Tamara.

³³Natenepo pyakuti ananu onsene amala phiwa mphyakunama; aphiwa ndi Aminoni ene basi.”

³⁴Ndzidzi wenewo Abisalomu adathawa. Penepo pene nyakuyang'anira pamsuwo adaona anthu azinji akutchitha phiri na njira kubulukira ku Horonaimu. Tenepo iye adenda kapanga mfumu pidaona iye pile.[18]

³⁵Yonadabu adalonga kuna Davite mbati, “Yang'ana, enewo mbananu akudza ninga montho mudakupangirani ine mule kuti anabwera.”

³⁶Sindzidzi iye nkhulonga, ana a Davite adafika; iwo adatoma kulira tenepo mathubu ache adalirambo pikulu pene.

³⁷Abisalomu adathawa mbaenda kuna mfumu wa ku Geshuri, dzinache Talimai mwana Amihudi mbakhala kweneko pyaka pitatu. Davite adasintili mwanache Aminoni ndzidzi ukulu ene.

³⁹Mbwenye pidaduwalira iye pya imfa ya Aminoni, Davite adamtchuwa pyakwanga mwanache Abisalomu.