Read cisena 2 SAMUELE 15 Bible Online

2 SAMUELE 15 - cisena bible

2 SAMUELE 15

¹Pidagwanda ndzidzi Abisalomu adapigumanira yekha ene chingolo na akavalo na amuna makumashanu anyakufamba naye.

²Iye akhalamuka na machibese mbaimira pamsuwo wa mzinda. Munthu onsene angadza na mseru kuti mfumu autonge, Abisalomu akhamchemera kuti adze kuna iye mbamvunza kudabulukira iye. Tenepo munthu angamala kumpanga dzinache na kudabulukira iye,

³Abisalomu akhalonga mbati, “Yang'ana, mseru wako ngwamaso, pontho wakuveka, kwache nkhabe nyakuimirira wa mfumu kuti ave mseru wenewu tayu.”

⁴Iye adathimiza kulonga mbati, “Ndikhapifuna pyakwanga kuti ndikhale mtongi! Tenepo munthu onsene ule ana mseru penu kufuna kudungunya adze kuna ine, inembo mbidamtongera mwachilungamo.”

⁵Munthu angadza kuna Abisalomu kulamba pamaso pache, Iye akhafuthula dzanjache mbamphata, pontho kumpsompsona.

⁶Abisalomu adachita penepi kuna Aisraele onsene ale akhadza kuna mfumu kufuna chilungamo mwakuti iye adatendeusa mtima a Aisraele.

⁷Pidagwanda pyaka pinayi[21] Abisalomu adalonga kuna Mfumu Davite mbati, “Mbuya, nditawiriseni ndiende ku Hebroni kuti ndikachite kudumbira kudachita ine kuna MBUYA kukwana-kwana.

⁸Ndzidzi ukhali ine ku Geshuri m'dziko ya Aaramu ndidadumbira kuna MBUYA kuti ngakhala anandibwezera ku Yerusalemu, ndinampembedza mu Hebroni.”[22]

⁹Mfumu adalonga mbati, “Ndoko na mtendere.” Tenepo Abisalomu adenda ku Hebroni.

¹⁰Kwache iye adatuma anyamphangwa kuna madzinza a ku Israele kalonga kuti, “Mungava kulira kwa ngoma, longani kuti, ‘Abisalomu apita ufumu ku Hebroni!’ ”

¹¹Pakhali amuna madzana mawiri, ale akhadachemerwa na Abisalomu kuti aende naye pabodzi ku Yerusalemu; iwo hadadziwe na chinthu chene tayu pya pinthu pikhafuna chita iye pile mbaenda chimpune-mpune.

¹²Tenepo pikhapereka iye nsembe, Abisalomu adachemeresa Ahitofelo wa kuluwani ya Gilo, ule akhali mbodzi wa mapungu a Davite. Manyerezero akufuna kupha mfumu adawanga-wanga, pontho anyakutewera Abisalomu adainjipa.

¹³Nyamphangwa adadza kuna Davite mbalonga mbati, “Mitima ya amuna a Israele ikutewera Abisalomu.”

¹⁴Tenepo Davite adalonga kuna mathubu ache onsene akhakhala mu Yerusalemu ale mbati, “Tathema kuthawa, gopesera nkhabe munthu na mbodzi ene anakwanisa kupulumuka m'manja mwa Abisalomu tayu. Ife tathema kuthawa kabodzi kene, gopesera anafika chinchino pano mbatikunda pontho mbapha munthu onsene mumzinda muno!”

¹⁵Iwo adatawira mbati, “Ande, Mfumu, ife tasasanyika kuchita pyonsene pinalonga imwe.”

¹⁶Natenepo mfumu adabuluka mwakutsagana na banjache yonsene pontho na mathubu ache khumi kupambulapo akazi ache achibitchu khumi, ale adasalira m'nduli kuyang'anira nyumba ya mfumu.

¹⁷Pikhabuluka mfumu na amunache onsene mumzinda mule adaimira panyumba yakumalisira.

¹⁸Mathubu ache onsene adaimira chifupi pabodzi pene na iye, uku anyakulondali a Chikereti na a Chipeleti, pontho na Agiti; onsene madzana matanthatu, ale akhali naye kubulukira ku Gati, adafamba patsogolo pa mfumu.

¹⁹Tenepo mfumu adalonga kuna mkadamu wawo Itai mbati, “Watani unaenda na ife pabodzi? Bwerera ukakhale na mfumu wachinchinoyi. Iwe ndiwe mlendo, pontho munthu wakuthawa kwawo.

²⁰Iwe wakhala kwene kuno ndzidzi ene pang'ono basi. Apo watani ndikuchitise kunzenza-nzenza na ine? Ine nkhabe dziwa na pang'ono pene tayu kunaenda ine. Ndoko ukakhale na abale ako, pontho MBUYA mbakuonese kukufuna kwache kokhonda mala, pontho mbakhulupirike kuna iwe.”[23]

²¹Mbwenye Itai adatawira mbati, “Mfumu ndinadumbira na dzina ya MBUYA kuti ndinaenda namwe konsene kwene kunaenda imwe podi na kufa kwene.”

²²Davite adalonga mbati, “Pyakoma tende.” Tenepo Itai adenda pabodzi pene na amunache onsene pontho na mabanja ale akhali na iye.

²³Anthu adalira mwakugaluza fala mukhaenda anyakutewera a Davite. Mfumu adawambuka mkhwawa wa Kidroni, m'nduli mwache mukhali amunache, tenepo onsene pabodzi pene adendera kuthando yatchetcha.

²⁴Zadoki nyansembe akhali penepo pabodzi pene na Alevi akhathukula Bokosi ya Chiverano. Iwo adaitula pansi kudikhira kuti anthu onsene amale buluka mumzindamo. Abiatara nyansembe akhali penepombo.

²⁵Tenepo mfumu adalonga kuna Zadoki mbati, “Kwatani Bokosi ya Chiverano mubwerere nayo mumzinda. Ngakhala MBUYA akomerwa nane anandichitisa kubwerera kuiona, pontho na mbuto pakhala iyopo.

²⁶Mbwenye angakhonda komerwa nane, penepo achite pyonsene pinafuna iye kuna ine.”

²⁷Tenepo iye adenda kuna Zadoki mbalonga mbati, “Yang'ana,[24] kwata mwanako Ahimaazi na Abiatara mwana Yonatani mbamubwerere kumzinda na mtendere.

²⁸Ine ndinadikhira pakuwambukira mkulo m'thando yatchetcha mpakana ndive kubulukira kuna iwe.”

²⁹Tenepo Zadoki na Abiatara adakwata Bokosi ya Chiverano mbabwerera nayo ku Yerusalemu mbakhala kweneko.

³⁰Davite adathimiza kukwira paphiri ya Olivi uku akulira; iye akhafamba wakusowa nkhwaira mbampsampsika kumsolo kwache thangwi ya kutsukwala. Onsene akhamtewera adampsampsikambo kumsolo kwawo mbalira.

³¹Davite adapangwa kuti Ahitofelo adaphatizana na Abisalomu. Tenepo iye adapemphera mbati, “MBUYA pupwisani uphungu wa Ahitofelo kuna Abisalomu.”

³²Pidafika Davite pansonga ya phiri, pale pakhali mbuto yakupembedzerapo Mulungu, Hushai wa Chiariki akhali penepo dzagumanikana naye uku avala mkhanjo wakung'ambika pontho fumbi mumsolo mwache kuonesa kutsukwala.

³³Davite adalonga kuna iye mbati, “Ngakhala iwe unaenda nane unati undinense.

³⁴Mbwenye ungabwerera ku Yerusalemu unati undiphedze pakupanga Abisalomu kuti iwe unamtumikira mwakukhulupirika ninga mukhatumikira iwe babache. Tenepo chita pyonsene pyakukwanisika kupupwisa uphungu wa Ahitofelo.

³⁵Zadoki nyansembe na Abiatara anakhala penepo; apange pyonsene pinava iwe m'nyumba ya mfumu.

³⁶Iwo ana anawo achimuna Ahimaazi na Yonatani, tenepo iwe unakwanisa kuatuma kuna ine na pyonsene pinava iwe.”

³⁷Tenepo Hushai, shamwaliache Davite adabwerera kumzinda na ndzidzi onthowo ukhafika Abisalomu.