Read cisena 2 SAMUELE 16 Bible Online

2 SAMUELE 16 - cisena bible

2 SAMUELE 16

¹Pikhadapiringana Davite nsonga ya phiri pang'ono vumbu-vumbu adagumanika na Ziba, nyabasa Mefiboseti, ule akhali na mabulu akuthukula mikate madzana mawiri, matsaputu dzana ibodzi a mfesa zakuuma, matsaputu dzana ibodzi a nsapo, na budu ya nthembe yakudzala na vinyu.

²Mfumu Davite adavunza mbati, “Thangwi yache ninji iwe wadza na pyonsenepi?” Ziba adatawira mbati, “Mabuluwa ngakuti mabanjanu mfumu apakirepo, mikate na nsapo mphyakuti amuna adye, vinyu ngwakuti iwo amwe angatopa m'thando yatchetcha muno.”

³Mfumu adavunza mbati, “Chidzukulu cha mbuyako chili kupi?” Ziba adatawira mbati, “Iye akukhala ku Yerusalemu thangwi iye akunyerezera kuti lero Aisraele anabwezera ufumu wa mbuyache.”

⁴Tenepo mfumu adalonga kuna Ziba mbati, “Pyonsene pya Mefiboseti chinchino mphyako.” Ziba adalonga mbati, “Ine ndine nyabasanu; ndzidzi onsene, Mfumu mbuyanga, mbandikomere mtima.”

⁵Pikhafika Mfumu Davite ku Bahurimu mbodzi wa abale ache Sauli dzinache Shimei mwana Gera adabuluka kagumanikana naye mbamtemberera pikhadza iye.

⁶Shimei adatoma kuponyera miyala Davite na mathubu ache, podi kwene kuti Davite adazungulirwa na amunache na anyakumuyang'anira.

⁷Shimei adamtemberera mbati, “Buluka, buluka nyachiropewe, pontho mphandu!

⁸MBUYA akukubwezera thangwi ya chiropa chonsene chachuchisa iwe m'banja ya Sauli ule m'mbuto mwache iwe ukutonga. MBUYA apereka ufumu kuna mwanako Abisalomu. Iwe ukuvungika, thangwi ndiwe mphandu!”

⁹Abishai ule mache akhali Zeruia adalonga kuna mfumu mbati, “Mfumu, thangwi yache ninji mukutawirisa mwanambwa wakufayu kukutembererani. Nditawiriseni kuti ndiende kagwanda msolo wache!”

¹⁰Mfumu adalonga kuna Abishai na mbaleache Yoabu mbati, “Iwe nkhabe pinthu na penepi tayu. Ngakhala iye akunditemberera na thangwi yakuti ampanga ndi MBUYA kuchita tenepo, mbani ana utongi kuvunza kuti anachitiranji penepi?”

¹¹Davite adalonga pontho kuna Abishai na kuna mathubu ache onsene mbati, “Mwananga ene anafuna pyakundipha, apo watani unadodoma na munthu wa dzinza ya Benjemani? Ngakhala ampanga ndi MBUYA kuti anditemberere tenepa, mulekeni pyache apichite.

¹²Mwinango MBUYA anaona kusanyika[25] kwanga mbandipagali na pyadidi m'mbuto mwa kunditemberera kunachita iye leroku.”

¹³Tenepo Davite na amunache adathimiza kwenda na njira, mwenemo Shimei akhafamba ngwangwangwa m'khundu-khundu mwa phiri. Iye akhamtemberera, mbamponyera miyala na kumuwazira fumbi pikhaenda iye.

¹⁴Mfumu na anthu ache onsene adamala topa pidafika iwo pa Yorodani,[26] tenepo adakhala penepo mbapuma.

¹⁵Abisalomu na Aisraele onsene akhali na iye adapita mu Yerusalemu. Penepo pakhali pontho Ahitofelo.

¹⁶Hushai shamwaliache Davite wakunyindirika adagumanikana na Abisalomu mbakhuwa mbati, “Dondowe Mfumu! Dondowe Mfumu!”

¹⁷Abisalomu adavunza mbati, “Ayi kukhulupirika kwako kuna shamwaliako Davite nkhweneku? Watani wakhonda kwenda naye pabodzi?”

¹⁸Hushai adatawira mbati, “Ndichitirenji tenepo? Ine ndili kukhundu kwa nyakusankhulwa na MBUYA, na anthu enewa, pontho na Aisraele onsene. Ine ndinati ndikhale nawe.

¹⁹Padzulu pache mbani pontho anatumikira ine kupambula mwana mbuyanga? Ine ndinakutumikira ninga montho mudatumikira ine babako.”

²⁰Tenepo Abisalomu adazungunukira kuna Ahitofelo mbalonga mbati, “Podi chinchino ife tili pano ngatipangeni, mphapo pyathema ife kuchita.”

²¹Ahitofelo adatawira mbati, “Ndoko ukagone na akazi achibitchu a babako adasiya iye m'nduli kuyang'anira nyumbache ale. Penepo Aisraele onsene anapidziwa kuti babako ambakuyesa ninga nyamalwache, pontho anyakukutewera anawangiswa mtima pyakwanga pene.”

²²Tenepo iwo adamangira khumbi Abisalomu pansoyi panyumba ya chifumu. Natenepo pamaso pa anthu onsene Abisalomu adapita m'khumbimo mbakagona na akazi achibitchu a babache.

²³Uphungu ukhapereka Ahitofelo nsiku zenezo ukhayeswa ninga mafala chadi-chadi a Mulungu mwakuti Davite na Abisalomu akhapivera.