Read cisena 2 SAMUELE 17 Bible Online

2 SAMUELE 17 - cisena bible

2 SAMUELE 17

¹Ahitofelo adalonga kuna Abisalomu mbati, “Nditawiriseni kusankhula amuna pikwi khumi na piwiri mbatisaka-saka Davite mosiku uno.

²Ine ndinati ndimsose mwenemo iye atopa pontho ataya mtima. Iye anachita mantha, tenepo amunache onsene anathawa. Ine ndinati ndiphe mfumu ene basi

³mbandidza na amunache onsene kuna imwe ninga nyakukazhali wamkazi kubwerera kuna mamunache. Kufa kwa munthu mbodzi ene basi kunafuna imweko,[27] kunachitisa kuti anthu onsene abwerere mbukhonda kuwaza anthu anango onsene akusalirawo.”

⁴Wenewu ukhaoneka ninga uphungu wadidi kuna Abisalomu na kuna akadamu a Aisraele.

⁵Abisalomu adalonga mbati, “Chemerani Hushai kuti tive pinafuna iye kulonga.”

⁶Pidafika Hushai, Abisalomu adalonga kuna iye mbati, “Ahitofelo alonga tenepa kuna ife: Ayi ife tathema kuchita pyalonga iyepi? Ngakhala tinaleka kupichita, apo ngatipangenitu pyakuchita?”

⁷Hushai adatawira mbati, “Pyakupangani Ahitofelo akupangani pandzidzi wakuipa.

⁸Imwe mukupidziwa kuti babanu na amunache mbanyankhondo aluso pontho akugoswa ninga mbinzi ukazi wakuberwa mwanache; babako ndi nyankhondo waluso, tenepo iye nkhabe khala na anyankhondo ache mosiku uno tayu.

⁹Pinalonga inepi mwinango iye akubisala kunkhwimba penu ali kumbuto zinango. Sindzidzi Davite nkhusosa amunanu, munthu onsene anapivayo analonga kuti amunanu akundwa.

¹⁰Penepo podi na anyankhondo akuwanga mtima ene, ale mitimawo yakhala ninga nkhalamu ananyunguluka na mantha thangwi Aisraele onsene akudziwa kuti babanu ndi nyankhondo waluso pontho amunache ngakuwanga mtima.

¹¹Uphungu unafuna ine kukupasani ngwakuti mudzese pabodzi Aisraele onsene kubulukira kumadolomero a dziko mpakana kumadolomero anango a dziko akuinjipa ninga tchetcha ya pagombe, tenepo iwe ene wekha uatsogolere kunkhondo.

¹²Ife tinati timenyane na Davite ponsene pene panamgumana ifepo mbatimfitikiza ninga kugwa kwa bume. Nee iye penu mbodzi wa amunache anafuna sala na moyo tayu.

¹³Tenepo ngakhala iye anathawira kumzinda penepo, onsene anadza na nkhambala mbatikweyera mzindawo[28] kuphedi mwakuti paleke salirave na mwala ene penepo tayu.”

¹⁴Abisalomu na amuna onsene Aisraele adalonga mbati, “Uphungu wa Hushai ngwadidi kusiyana na wa Ahitofelo.” MBUYA adanyerezera kuti uphungu wa Ahitofelo uleke phatiswa basa towera kuvungika kudze pana Abisalomu.

¹⁵Hushai adapanga anyansembe Zadoki na Abiatara uphungu udapereka iye kuna Abisalomu na kuna akadamu a Aisraele pontho na uphungu wa Ahitofelo ule.

¹⁶Hushai adathimiza kulonga mbati, “Chinchino chimbizani, tumani mphangwa kuna Davite kuti aleke gona pakuwambukira mkulo m'thando yatchetcha mosiku uno, mbwenye awambuke mkulo wa Yorodani kabodzi kene, towera iye na amunache aleke phatwa mbaphiwa onsenene.”

¹⁷Yonatani mwana Abiatara na Zadoki mwana Ahimaazi akhadikhira pamphuno ya madzi pa Enirogele kunja kwa Yerusalemu, thangwi iwo hadawange mtima kupita mumzinda mwakuoniwa na anthu tayu. Nyabasa wachitsikana ndzidzi onsene akhaenda kaapanga pinthu pikhachitikapyo, tenepo iwo akhaenda kapangambo Mfumu Davite.

¹⁸Kwache nsiku inango pidachitika kuti mphale adaaona mbapanga Abisalomu, tenepo iwo adachimbiza kabisala m'nyumba ya munthu unango dzinache Bahurimu. Iye akhali na mchera chifupi na nyumbache tenepo iwo adabisala mumcheramo.

¹⁹Mkazache Baruhimu adaphopha mcherawo na mphampha mbawaza tchetcha padzulu pache, towera munthu na mbodzi ene aleke dzindikirapo.

²⁰Mathubu a Abisalomu adafika kunyumbako mbavunza mkaziyo mbati, “Ayi Ahimaazi na Yonatani ali kupi?” Iye adatawira mbati, “Iwo awambuka kale mkhwawa.” Amuna ale adaasaka, kwache hadaaone tayu. Tenepo adabwerera ku Yerusalemu.

²¹Pikhaenda iwo, Ahimaazi na Yonatani adabuluka mumchera mule mbaenda kapilonga kuna Davite. Iwo adalonga pinthu pyaupandu pidasasanya Ahitofelo kupichita kuna iye mbati, “Chimbizani, wambukani mkulo.”

²²Tenepo Davite na amunache adautoma ulendo wakuwambuka mkulo wa Yorodani. Pidachena kunja, onsene akhadamala wambuka.

²³Pidaona Ahitofelo kuti anthu hadaphatise basa uphungu wache tayu, iye adapakira pabulu pache mbaenda kumzinda kwache. Pidamala iye kusasanya mwadidi pinthu pyache adapimangirira yekha ene mbafa, tenepo adaikhwa m'masiye a kubanjache.

²⁴Davite adafika kuluwani ya Mahanaimu ndzidzi udawambuka Abisalomu na Aisraele mkulo wa Yorodani.

²⁵Abisalomu adaikha Amasa kukhala mkadamu wa anyankhondo m'mbuto mwa Yoabu. Amasa akhali mwana wamamuna wa Yetere Muishimaele,[29] mache akhali Abigaile mwana wa mkazi wa Nahashi pontho nanache mache Yoabu dzinache Zeruia.

²⁶Abisalomu na amunache adamanga msasa m'nthemba ya Gileadi.

²⁷Pidafika Davite pa Mahanaimu, adagumanikana na Shobi mwana wamamuna wa Nahashi wa kumzinda wa Raba m'nthemba ya Amoni. Iye adagumanikana pontho na Makiri mwana wamamuna wa Amiele wa ku Lodebara mbagumanikana pontho na Barizilai wa ku Rogelimu mu Gileadi.

²⁸Iwo adadza na ndilo, pitomba na pyakugonera pontho na pyakudya pya Davite na amunache; tirigu, barele, ufa, mapiramanga akuotcha, nyemba, nyimo, manyuchi na mayana, pontho mabira na mafuta amkaka wa ng'ombe. Iwo adapidziwa kuti Davite na amunache akhali na njala, nyota pontho adatopa m'thando yatchetcha.