Read cisena 2 SAMUELE 18 Bible Online

2 SAMUELE 18 - cisena bible

2 SAMUELE 18

¹Mfumu Davite adagumanyisa amunache onsene pabodzi mbaagawa m'magulu-magulu a pikwi na a dzana mbaikhamo akadamu kuyang'anira magulu enewa.

²Davite adatuma anyankhondo ache m'magulu atatu; Yoabu adatsogolera gulu ibodzi; Abishai mbaleache Yoabu adatsogolera gulu ibodzi; Itai wa ku Gati adatsogolerambo gulu inangomboyo. Tenepo mfumu adalonga kuna amunache mbati, “Ine ene ndinati ndiende namwe.”

³Iwo adatawira mbati, “Lekani kwenda nafe, thangwi nkhabe dzaoneka kusiyana tayu kuna anyamalwathu ngakhala anango tonsenefe tinathawa penu anango a ife anaphiwa; mbwenye imwepo ndimwe anthu pikwi khumi pya ife pano. Mbapidakhala pyadidi mbamudasala pyanu mumzinda mbamutitumizira pinthu pyakuti pitiphedze.”

⁴Mfumu adatawira mbati, “Ine ndinati ndichite chinaona imwe kuti ntchadidicho.” Tenepo iye adaimira m'khundu mwa msuwo wa mpanda pikhabuluka amunache pamulikiti m'magulu-magulu a chikwi na a dzana.

⁵Iye adapanga Yoabu, Abishai na Itai mbati, “Na thangwi ya ine lekani kumkuwaza mphale Abisalomu.” Tenepo magulu onsene adamva Davite akupereka matongero enewa kuna mathubu ache.

⁶Anyankhondo a Davite adabuluka kunja kwa mzinda mbamenya nkhondo na Aisraele mumsitu wa Eferemu.

⁷Aisraele adakundwa na amuna a Davite. Nkhondo idakaka pyakwanga mwakuti amuna pikwi makumawiri adaphiwa nsiku yeneyo.

⁸Nkhondo idafalikira kumidzi yonsene, tenepo anthu azinji adafa m'misitu kupiringana ale adaphiwa pankhondo.

⁹Pidachitika kuti Abisalomu adagumanikana na amuna a Davite. Iye akhali pamwana bulu, tenepo pikhafamba mwanabulu ule pansi pa muti wakupata wamkungudza msolo wa Abisalomu udakoloweka pamuti. Tenepo iye adadedzuka pabulu pache mbakhala lenga-lenga mwenemo bulu ule akwenda pyache.

¹⁰Pidaona mbodzi wa amuna ale adapanga Yoabu mbati, “Ndaona Abisalomu akoloweka m'muti wamkungudza.”

¹¹Yoabu adalonga mbati, “Ngakhala wamuonadi, apo watani kumpheratu ponthopo? Ine mbidakupasa kobiri zasiliva khumi na bande.”

¹²Mbwenye munthu ule adatawira mbati, “Podi kwene kuti mbamudandipasa kobiri zasiliva chikwi chibodzi ine nee mbidakwanisa kukhuya mwana mfumu tayu. Tonsenefe tidapiva kuti mfumu adakutongani imwe, Abishai na Itai mbati, ‘Na thangwi ya ine lekani kupha mphaleyu Abisalomu.’

¹³Mbwenye ine mbidachita chinthu chakugoswa kuna iye (nkhabe chinthu chakubisika kuna mfumu tayu), penepo imwe nee mbamudanditchinjiriza tayu.”

¹⁴Yoabu adalonga mbati, “Ine nkhabe taya ndzidzi wanga na iwe tayu.” Tenepo iye adakwata madipa matatu mbalasa nawo pagangafuwa pa Abisalomu mwenemo iye mbali moyo pontho ali lenga-lenga m'muti.

¹⁵Penepo khumi mwa anyankhondo a Yoabu adazungulira Abisalomu mbammaliza kumpha.

¹⁶Yoabu adalonga kuti ngoma ilizwe kuti nkhondo imale, tenepo anyankhondo ache adaleka kuthamangisa Aisraele.

¹⁷Iwo adakwata manungo a Abisalomu mbaaponyera m'dzenje yakuzwika mumsitu mbauikha pansi pa mulu wa miyala. Aisraele onsene adathawa munthu onsene kumusa kwache.

¹⁸Pandzidzi wa moyo wache Abisalomu adamanga chiguwa ninga chikumbuso chache m'phedi ya mfumu, thangwi iye akhali nkhabe mwana wamamuna ninga mbewu yache. Natenepo adachithula chiguwacho na dzinache, tenepo na lero chiguwachi chikudziwika na dzina yakuti chiguwa cha Abisalomu.

¹⁹Ahimaazi mwana Zadoki adalonga kuna Yoabu mbati, “Ndithamange kuna mfumu ndikampange mphangwa zadidizi kuti MBUYA ampulumusa kuna anyamalwache.”

²⁰Yoabu adalonga mbati, “Tayu, si iwe anafuna kwenda na mphangwa zadidizi lero tayu. Iwe unakwanisa kuchita tenepo nsiku inango ene, mbwenye lero tayu thangwi mwana mfumu afa.”

²¹Tenepo iye adalonga kuna bitchu wache wa ku Kushi mbati, “Ndoko ukapange mfumu pyaona iwe.” Bitchu ule adalamba mbathamanga kwenda.

²²Ahimaazi adakakamira kulonga mbati, “Ine nkhabe pinthu na pinafuna dzachitikapyo tayu; ndilekeni ndiendembo ndikasiye mphangwazi.” Yoabu adavunza mbati, “Mwananga thangwi yache ninji ukufuna kwendambo? Iwe nkhabe dzatambira mfupo pakuchita tenepo tayu.”

²³Ahimaazi adalonga pontho mbati, “Podi chichitike pyacho ninji, ine ndikufuna kwenda basi.” Yoabu adalonga mbati, “Ndoko.” Tenepo Ahimaazi adathamanga mbagwanda na m'phedi ya Yorodani mbampiringana bitchu ule.

²⁴Davite akhakhala pakati pa msuwo wa m'bwalo na msuwo wa kunja wa mpanda. Nyakulondali adenda mpakana pansonga yafufu mbaimira pansoyi ya nyumba ya pa msuwo wa mpanda. Tenepo iye adayang'ana kunja mbaona munthu akudza mbathamanga yekha ene.

²⁵Nyakulondali ule adachemera mfumu mbalonga pidaona iyepyo. Mfumu adalonga mbati, “Ngakhala iye ali yekha penepo akudza na mphangwa zadidi.” Munthu akhathamanga ule adafika chifupiletu.

²⁶Tenepo nyakulondali ule adaona munthu unango akudza mbathamanga pontho yekha ene, tenepo iye adachemera nyakuyang'anira pamsuwo wa mpanda mbampanga mbati, “Yang'ana, munthu unango akudza pontho mbathamanga yekha ene.” Mfumu adalonga mbati, “Weneyu pontho akudza na mphangwa zadidi.”

²⁷Nyakulondali ule adalonga mbati, “Ndikuona munthu wakutoma kuthamangayi akuoneka ninga Ahimaazi.” Mfumu adalonga mbati, “Iye ndi munthu wadidi pontho akudza na mphangwa zadidi.”

²⁸Ahimaazi adakhuwa kummwenyika mfumu, adapiponya pansi pamaso pache mbalonga mbati, “Kuzani MBUYA Mulungu wanu ule akuchitisani kukunda amuna adakupandukirani mfumu ale.”

²⁹Mfumu adavunza mbati, “Ayi mphale Abisalomu hadakuwazwe tayu?” Ahimaazi adatawira mbati, “Mbuya, pikhandituma thubu wanu Yoabu, ine ndidaona chimpiningu chikulu, kwache ine sidadziwa kuti chikhachitika ninji tayu.”

³⁰Mfumu adalonga mbati, “Imira apo.” Tenepo adenda mbaimira penepo.

³¹Penepo bitchu wa ku Kushiule adafika mbalonga kuna mfumu mbati, “Mfumu ndadza na mphangwa zadidi. Lero MBUYA akuchitisani kukunda anyamalwanu onsene adakupandukirani ale!”

³²Mfumu adavunza mbati, “Ayi, mphale Abisalomu hadakuwazwe tayu?” Bitchu ule adatawira mbati, “Ndikhapifuna pyakwanga kuti pyachitika kuna iyepyo mbapidachitikambo kuna anyamalwanu onsene na kuna onsene akupandukirani ale.”

³³Mfumu adaphatwa na nsisi pyakwanga. Iye adakwira subi ya padzulu ya nyumba ya pamsuwo wa mpanda mbalira. Iye akhalira mukhakwira iye mbati, “Mwananga! Mwananga Abisalomu! Abisalomu mwananga! Mbandidafa ndine m'mbuto mwako mbapidakhala pyadidi mwananga! Abisalomu mwananga!”