Read cisena 2 SAMUELE 19 Bible Online

2 SAMUELE 19 - cisena bible

2 SAMUELE 19

¹Yoabu adapangwa kuti Davite akulira na kusintili Abisalomu.

²Natenepo kukomerwa kwa anyankhondo onsene thangwi ya kukunda kudasanduka kutsukwala nsiku yeneyo, thangwi iwo adapiva kuti mfumu akusintili mwanache.

³Iwo adabwerera kumzinda mwakumatama ninga anyankhondo akuchita manyadzo thangwi ya kuthawa kunkhondo.

⁴Mfumu adapsampsika nkhope yache mbalira mbati, “Mwananga! Mwananga Abisalomu! Abisalomu mwananga!”

⁵Tenepo Yoabu adenda kunyumba ya mfumu mbalonga kuna iye mbati, “Lero mwalulupisa amunanu, amuna adapulumusa moyo wanu na moyo wa ananu achimuna na achikazi ene na moyo wa akazanu na akazanu achibitchu.

⁶Imwe mukupokanyisa ale ambakufunani mbamuikhira kunduli anyakukuzondani. Imwe mwapichita kukhala pyakuveka mwadidi mwene kuti mathubu anu na amuna anu kuna imwe si pinthu tayu. Ine ndinakwanisa kuona kuti imwe mbamudakomerwa pyakwanga pene Abisalomu mbadakhala na moyo lero ife tonsenefe mbatidafa.

⁷Chinchino ndokoni muwangise mtima amunanu. Ndinadumbira na dzina ya MBUYA kuti imwe mungakhonda kwenda nee munasala na munthu na mbodzi ene kufikirana mangwana na machibese tayu. Yeneyi inakhala nyatwa yakugoswa pyakwanga kupiringana nyatwa zonsene zaona imwe moyo wanu onsene.”

⁸Tenepo mfumu adalamuka mbaenda kakhala chifupi na msuwo wa mpanda wa mzinda. Amunache adapiva kuti iye akhali penepo, tenepo iwo adagumanyikana mwakumzungulira. Ndzidzi wenewu Aisraele onsene adathawa, munthu onsene kumsuwo kwache.

⁹M'dziko monsenemo iwo adatoma kukangana okha ene mbalonga kuna unango na mwanzache mbati, “Mfumu Davite adatipulumusa kuna anyamalwathu. Iye adatiombola m'manja mwa Afilisti, kwache iye adathawa m'dziko muno kuthawa Abisalomu.

¹⁰Ife tidadzoza Abisalomu kuti akhale mfumu wathu, kwache iye aphiwa pankhondo. Apo thangwi yache ninji nkhabe munthu unango wakubwezera Davite kuno?”

¹¹Pinthu pidalongwa mu Israele monsenepi pidafika m'makutu mwa Mfumu Davite, tenepo iye adatuma Zadoki na Abiatara anyansembe kavunza akadamu a Yuda mbati, “Mwatani munakhala akumalisa kufuna kudzesa mfumu kunyumba kwache?

¹²Imwe ndimwe abale anga; manungo anga pontho chiropa changa. Apo mwatani munakhala akumalisa kundibwezera kuna imwe?”

¹³Davite adaapanga pontho kulonga kuna Amasa kuti, “Iwe ndiwe mbaleanga. Tenepo kutomera lero kwenda m'tsogolo ndakuikha kukhala mkadamu wa anyankhondo m'mbuto mwa Yoabu. Mulungu mbandiphe pyache ngakhala sinachita tenepo tayu!”

¹⁴Natenepo Davite adatenula mtima amuna onsene a mu Yuda, tenepo iwo adatuma mphangwa kumpanga kuti abwerere mumzinda pabodzi pene na mathubu ache onsene.

¹⁵Pikhabwerera mfumu mbafika kumkulo wa Yorodani, adagumanikana na amuna a ku Yuda pa njira, ale adadza dzamtambira pa Giligala mbawambuka naye kukhundu inango ya mkulo.

¹⁶Na ndzidzi onthowo Shimei mwana Gera wa ku Bahurimu adachimbiza kwenda kumkulo wa Yorodani kagumanikana na Mfumu Davite.

¹⁷Iye akhali pabodzi na amuna chikwi chibodzi cha dzinza ya Benjemani. Tenepo Ziba nyabasa wa kubanja ya Sauli adadzambo na anache achimuna khumi na ashanu na anyabasa makumawiri, tenepo iwo adafika pa Yorodani mfumu mbadzati fikapo.

¹⁸Iwo adawambuka mkulo kakwata pyonsene pya mfumu kupiwambusa na kuchita pyonsene pene pikhafuna mfumu. Pikhasasanyika mfumu kuti awambuke mkulo, Shimei adapigwisa yekha ene pamaso pa mfumu,

¹⁹mbalonga mbati, “Mbuyanga mfumu, lekererani kudawa kudachita ine pansiku idabuluka imwe mu Yerusalemu. Lekani kupikoyera mangawa pontho lekani kupikumbukave.

²⁰Ndikupidziwa kuti ine ndadawa, tenepo ndi thangwi yache lero ine ndine nyakutoma kubulukira kumadzinza a Yosefe kudza dzagumanikana namwe, mbuyanga mfumu.”

²¹Abishai, ule mache akhali Zeruia, adalonga mbati, “Shimei athema kuphiwa thangwi iye adatemberera munthu adasankhulwa na MBUYA kukhala mfumu ule.”

²²Mbwenye Davite adalonga kuna Abishai na kuna mbaleache Yoabu mbati, “Ayi imwe ana Zeruia pananji pakati pa imwe na ine? Ayi lero mwandisandukira? Chinchino mfumu mu Israele ndine pano, tenepo nkhabe munthu anafuna kuphiwa lero tayu.”

²³Tenepo mfumu adalonga kuna Shimei mbati, “Ndinadumbira kuti iwe hunaphiwa tayu.”

²⁴Mefiboseti chidzukulu cha Sauli adadzambo dzagumanikana na mfumu. Iye hakhadatsuka manyalo ache penu kuchinga ndevu zache penu kufula nguwo zache tayu kubulukira ndzidzi udabuluka mfumu mu Yerusalemu mpakana adabwerera mwadidi mwene.

²⁵Pidafika Mefiboseti kubulukira ku[30] Yerusalemu dzagumanikana na mfumu, mfumuyo adalonga kuna iye mbati, “Mefiboseti, iwe hudende nane pabodzi tayu, thangwi yache ninji?”

²⁶Iye adatawira mbati, “Ine ndine nyakulamala ninga munapidziwira imwe mfumu. Ine ndidapanga nyabasanga kuti aikhe chakukhalira pabulu panga towera ndikwanise kwenda namwe pabodzi pene. Kwache Ziba nyabasanga adandisandukira.

²⁷Iye adalonga pyakunama pya ine kuna imwe mfumu, kwache imwe mwakhala ninga mngelo wa Mulungu; tenepo chitani pyonsene pinakukomeranipyo.

²⁸Onsene a m'banja ya babanga adathema kuphiwa na imwe mfumu, kwache imwe mudandipasa utumbe wakudya pathebulu panu. Ine nkhabe pontho utongi wakupempha kuti imwe mundikomere pontho mtima tayu.”

²⁹Mfumu adatawira mbati, “Iwe nkhabe funika kulonga na chinthu chene tayu. Ine ndanyerezera kuti iwe na Ziba mugawane mfuma ya Mfumu Sauli.”

³⁰Mefiboseti adalonga mbati, “Mulekeni pyache Ziba akwate pyonsenepyo. Mfumu, ine ndakwana napyo kuti mwadza kumusa kwanu na mtendere.”

³¹Barizilai wa ku Gileadi akhadadzambo kubulukira ku Rogelimu dzaperekeza mfumu kumuwambusa mkulo wa Yorodani.

³²Barizilai adakalamba pyakwanga pontho akhali na pyaka makumasere pyakubalwa. Iye akhali nyakufuma pyakwanga pontho akhadapasa mfumu pyakudya ndzidzi ukhakhala iye ku Mahanaimu.

³³Mfumu adalonga kuna iye mbati, “Tende pabodzi pene na ine ku Yerusalemu. Ine ndinati ndikuyang'anire mwadidi.”

³⁴Mbwenye Barizilai adatawira mbati, “Ine sinakhalave na moyo ndzidzi ukulu ene tayu. Apo thangwi yache ninji kuti ndiende namwe pabodzi mfumu ku Yerusalemu?

³⁵Ine ndina kale pyaka makumasere pyakubalwa, pontho ine nkhabe kwanisa kusiyanisa pakati pa chadidi na chakuipa tayu. Ine nkhabe kwanisa kudzipirwa na chinthu chinadya ine na kumwa ine tayu. Ine nkhabe kwanisa kuva fala ya anyakuimba tayu. Apo thangwi yache ninji ndithimize kukunensani imwe, mbuyanga mfumu.

³⁶Nyabasanu anawambuka mkulo wa Yorodani pabodzi pene na mfumu nsinzo wakuchepa basi. Apo thangwi yache ninji mfumu anafuna pyakundifupa na njira yeneyi?

³⁷Mulekeni pyache nyabasanu abwerere kuti akafere kuluwani ya kwawo chifupi na masiye a kwawo a babache na mache. Mbwenye mwananga Kimuhamu ali pano. Mtawiriseni kuwambuka pabodzi pene na mbuyanga mfumu, iye anakakutumikirani pontho mchitireni pile mphyadidi pamaso panu.”

³⁸Mfumu adatawira mbati, “Ine ndinati ndiende naye mbandimchitira pyonsene pinafuna iwe. Ine ndinakuchitira pyonsene pene pinapempha iwepyo.”

³⁹Tenepo Davite na amunache onsene adawambuka mkulo wa Yorodani. Iye adampsompsona Barizilai mbamtsanzayisa, natenepo Barizilai adabwerera kwawo.

⁴⁰Pidawambuka mfumu mkulo wa Yorodani mwakuperekezwa na amuna onsene a ku Yuda na amuna anango pang'ono a ku Israele, iye adenda ku Giligala, tenepo Kimuhamu adenda naye pabodzi.

⁴¹Kubuluka penepo Aisraele onsene adenda kuna mfumu mbalonga kuna iye mbati, “Mfumu, thangwi yache njanji abale athu a ku Yuda adanyerezera kuti iwo akhali akuthema kwenda namwe kakuperekerani chibiso-biso imwe, banjanu na amunanu ene kuwambuka mkulo wa Yorodani?”

⁴²Amuna a ku Yuda adatawira mbati, “Ife tidachita tenepo thangwi mfumu ndi mbaleathu chadi-chadi. Apo thangwi yache ninji penepi pyakuzhangalisani? Ife nee tidadye pya mfumu tayu, pontho iye hadatipagali na chinthu chene tayu pyakudya pidampasa ife pile.”

⁴³Aisraele adatawira mbati, “Ife ndife akufunika kakhumi kuna mfumu kupiringana imwe podi kwene kuti akhale pyache mbaleanu chadi-chadi tani. Apo thangwi yache njanji imwe mukutilulupisa tenepa? Lekani duwalira kuti ife ndiye tikhali akutoma kulonga pyakubwezera mfumu kuno.” Kwache amuna a ku Yuda akhadapichita mwavinga pikulu pene kupiringana Aisraele.