Read cisena 2 SAMUELE 2 Bible Online

2 SAMUELE 2 - cisena bible

2 SAMUELE 2

¹Pidamala penepi, Davite adavunza MBUYA mbati, “Ayi ndiende katonga luwani ibodzi mu Yuda?” MBUYA adalonga mbati, “Ndoko.” Davite adavunza mbati, “Apo luwani yacheyo njipi?” MBUYA adalonga mbati, “Hebroni.”

²Natenepo Davite adenda ku Hebroni mbakwata akazache awiri, Ahinoamu wa ku Yezereele na Abigaile mamfelwa wa Nabali wa ku Karimele.

³Iye adakwata pontho amunache na mabanjawo ene mbakakhazikika m'maluwani akuzungulira Hebroni.

⁴Tenepo amuna a ku Yuda adadza ku Hebroni mbamdzoza Davite kukhala mfumu wa Yuda. Pidava Davite kuti anthu a ku Yabeshi-Gileadi adaikha m'masiye Sauli,

⁵adatuma amuna anango kwenda kweneko na mphangwa izi: “MBUYA mbakutsanzayiseni pakuonesa kukhulupirika kwanu kuna mfumu pakumuikha m'masiye.

⁶Natenepo MBUYA mbakuoneseni kukufunani kwache kokhonda mala na kukhulupirika kuna imwe. Inembo ndinakhala namwe mwadidi thangwi ya pinthu pyachita imwepi.

⁷Chinchino wangisani pontho wangani mtima! Sauli mfumu wanu afa, tenepo anthu a ku Yuda andidzoza kukhala mfumu wawo.”

⁸Mkadamu wa anyankhondo a Sauli, Abineri mwana Neri adathawira kumtunda unango wa Yorodani kwenda ku Mahanaimu pabodzi pene na Ishiboseti.

⁹Kweneko Abineri adapitisa Ishiboseti ufumu wa nthemba za Gileadi, Asheri,[1] Yezereele, Eferemu na Benjemani, pontho na Israele onsene.

¹⁰Iye akhali na pyaka makumanayi pyakubalwa pidapita iye ufumu wa Israele, tenepo iye adatonga pyaka piwiri. Mbwenye dzinza ya Yuda idakhulupirika kuna Davite,

¹¹tenepo iye adatonga Hebroni mu Yuda pyaka pinomwe na theka.

¹²Abineri na mathubu a Ishiboseti adenda kumzinda wa Gibeoni kubulukira ku Mahanaimu.

¹³Yoabu ule mache akhali Zeruia pabodzi pene na mathubu anango a Davite adagumanikana nawo pathawale, pale padakhala iwo pansi onsene, gulu ibodzi kukhundu inango ya thawale, gulu inango kukhundu inangombo ya thawaleyo.

¹⁴Abineri adalonga kuna Yoabu mbati, “Tendeni tisankhule aphale kubulukira kukhundu zonsene ziwiri kuti amenyane pamaso pathu.” Yoabu adatawira mbati, “Pyakoma.”

¹⁵Natenepo amuna khumi na awiri akuimirira Ishiboseti na dzinza ya Benjemani adamenyana na amuna khumi na awiri a Davite.

¹⁶Munthu onsene adaphata msolo wa mwanzache akhamenyana na iye mbamtchokomeza talasada m'mbavu mwakuti onsene makumawiri na anayi adagwa pansi mbafa pabodzi pene. Natenepo mbuto yeneyo mu Gibeoni imbachemerwa “Munda wa talasada.”

¹⁷Kubuluka penepo nkhondo yakugoswa idalamuka, tenepo Abineri na Aisraele adakundwa na amuna a Davite.

¹⁸Ana achimuna atatu a Zeruia akhali penepo: Yoabu, Abishai na Asahele. Asahele, ule akhathamanga pyakwanga ninga nyasa,

¹⁹adathamangisa Abineri mbakhonda baukira kumadyo penu kumabzere.

²⁰Abineri adacheuka m'nduli mbavunza mbati, “Ayi ndiwe Asahele?” Iye adatawira mbati, “Ande, ndine pano.”

²¹Abineri adalonga mbati, “Leka kundithamangisa! M'mbuto mwache thamangisa mbodzi wa anyankhondo mbukwata pina iyepyo.” Mbwenye Asahele adathimiza kumthamangisa basi.

²²Abineri adalonga pontho mbati, “Leka kundithamangisa! Thangwi yache ninji unafuna kundichitisa kuti ndikuphe? Ayi ndinakwanisa tani kufika pamaso pa mbaleako Yoabu?”

²³Mbwenye Asahele hadaleke tayu kumthamangisa, tenepo Abineri na kuchikumbu kwa dipache adamenya m'mimba mwa Asahele mbiphutchukira kunduli kwache. Asahele adagwa pansi mbafa, tenepo munthu onsene akhadza pambuto pakhali iye tambza pale, akhaimira.

²⁴Mbwenye Yoabu na Abishai adalamuka kasaka Abineri, tenepo pakuthobila dzuwa iwo adafika paphiri ya Ama ile ili kumabulukiro dzuwa a Gia panjira yakwendera m'thando yatchetcha ya Gibeoni.

²⁵Amuna a dzinza ya Benjemani adagumanyikana pontho mwakuzungulira Abineri mbaimira pansonga ya phiri.

²⁶Abineri adachemera Yoabu mbati, “Ayi ife tathema kumenyana kwenda na kwenda? Kadi iwe nkhabe dzindikira kuti penepi mamalisiro ache nkhutsukwala? Amunako analeka lini kuthamangisa abale awo?”

²⁷Yoabu adatawira mbati, “Ndinadumbira na dzina ya Mulungu wamoyo kuti mbudakhonda kwene kulonga amunanga mbadathimiza kukuthamangisa mpakana mangwana na machibese.”

²⁸Tenepo Yoabu adaliza ngoma ya chidziwiso, natenepo amunache onsene adasiya kuthamangisa Aisraele, tenepo nkhondoyo idamaliratu.

²⁹Abineri na amunache adafamba mosiku onsenewo m'phedi yonsene ya Yorodani. Iwo adawambuka mkulo wa Yorodani, tenepo pidamala iwo famba pamulikiti mangwana mwache na machibese iwo onsene adabwerera mbafika ku Mahanaimu.

³⁰Pidaleka Yoabu kuathamangisa, iye adagumanyisa amunache onsene mbagumana kuti amuna khumi na afemba akhasowapo kuthimizapo Asahele.

³¹Amuna a Davite adapha amuna madzana matatu na makumatanthatu a Abineri kubulukira m'dzinza ya Benjemani.

³²Yoabu na amunache adakwata mtembo wa Asahele mbamuikha m'masiye a m'banja mwawo ku Betelehemu. Tenepo iwo adafamba pamulikiti mosiku onsenewo, tenepo m'makalakwecha adabwerera mbafika ku Hebroni.