Read cisena 2 SAMUELE 20 Bible Online

2 SAMUELE 20 - cisena bible

2 SAMUELE 20

¹Pidachitika kuti ku Giligala kukhali munthu unango wakusowa basa dzinache Sheba mwana Bikiri. Iye akhali wa dzinza ya Benjemani. Iye adaliza ngoma mbachemera mbati, “Ife nkhabe khundu na Davite tayu, pontho ife nkhabe dzatambira chinthu pa mfuma ya mwana Yese tayu. Munthu onsene wa ku Israele aende kumusa kwache!”

²Tenepo Aisraele adathawa Davite mbaenda kuna Sheba, mbwenye amuna a ku Yuda adakhala na mfumu wawo njira yonsene kubulukira ku Yorodani mpakana ku Yerusalemu.

³Pidafika Davite kunyumbache yachifumu mu Yerusalemu, iye adakwata akazi achibitchu khumi adasiya iye m'nduli kuyang'anira nyumbache ale mbaaikha mwakuyang'anirwa m'nyumba mule. Iye adaapasa pyonsene pikhasowa iwo, kwache iye hadagone nawo tayu. Iwo adakoyiwa pakubisala moyo wawo onsene mbakhala ninga amamfelwa.

⁴Mfumu adalonga kuna Amasa mbati, “Gumanyisa pabodzi pene amuna a ku Yuda mbudze nawo kuno mkuchono pano.”

⁵Amasa adenda kaagumanyisa kwache hadadze nawo pansiku idalonga mfumu ile tayu.

⁶Tenepo mfumu adalonga kuna Abishai mbati, “Sheba anati atinense pikulu pene kupiringana Abisalomu. Tenepo kwata amunangawa mbatimsake-sake, gopesera anatipokosera mizinda yakutchingwa na mpanda mbatithawa.”

⁷Tenepo amuna a Yoabu na anyakulondali a Chikereti na a Chipeleti pontho na anyankhondo amphamvu onsene adenda pansi pa utongi wa Abishai. Iwo adabuluka ku Yerusalemu kasaka-saka Sheba mwana Bikiri.

⁸Pidafika iwo paphanzwi mu Gibeoni, Amasa adagumanikana nawo. Yoabu adavala nguwo zankhondo pontho adamangirira talasada kubande yache. Pidenda iye patsogolo talasada idagwa pansi.

⁹Yoabu adavunza Amasa mbati, “Uli tani shamwalianga?” Tenepo Yoabu adaphata ndevu za Amasa na mkono wache wamadyo kuti ampsompsone.

¹⁰Amasa nee akhayang'ana talasada idaphatira Yoabu m'manja mwache ile tayu, tenepo Yoabu adamulasa m'mimba, matumbo mbaphutchukira. Iye adaferatu kabodzi kene, tenepo Yoabu hadamulaseve kachiwiri kache tayu. Yoabu na mbaleache Abishai adenda kasaka-saka Sheba.

¹¹Mbodzi wa amuna a Yoabu adaimira m'khundu mwa mtembo wa Amasa mbakhuwa mbati, “Munthu onsene ali kukhundu ya Yoabu na Davite atewere Yoabu!”

¹²Mtembo wa Amasa ukhali gunundu pakati pa njira uku wasamba chiropa. Pidaona munthu ule kuti munthu onsene akhaimira penepo, iye adagwinyira mtembowo m'munda mbaufinikiza na chakufindika.

¹³Pidabuluswa mtembo ule m'njira mule munthu onsene adatewera Yoabu kusaka-saka Sheba.

¹⁴Sheba adagwanda na m'nthemba yonsene ya madzinza a Israele mbafika kumzinda wa Abele-Beti-Maaka, tenepo mbumba yonsene ya Bikiri adagumanyikana mbamtewera kupita mumzinda.

¹⁵Amuna a Yoabu adava kuti Sheba akhali mwenemo, tenepo iwo adenda kazungulira mzindawo. Iwo adamuluka mataka kutsamira mpanda mbatoma kugomola mpanda na pyakugomolera.

¹⁶Pakhali mkazi unango wanzeru mumzindamo, tenepo iye adakhuwa na pafufu ya mpanda mbati, “Veserani, veserani! Pangani Yoabu kuti adze kuno, ndinafuna ndilonge naye.”

¹⁷Yoabu adenda kuna iye, tenepo adavunza mbati, “Ayi ndimwe Yoabu?” Iye adatawira mbati, “Ndine pano.” Iye adalonga mbati, “Veserani pinafuna longa nyabasanu.” Iye adatawira mbati, “Ndikuvesera.”

¹⁸Mkazi ule adalonga mbati, “Kale ene iwo akhalonga kuti, ‘Ndoko ukave pinafuna iwo katawirwa kumzinda wa Abele’; penepyo ndiye pyontho pidachita iwo.

¹⁹Mzindathu ngukulu, ubodzi mwa mizinda ya mtendere pontho wakukhulupirika mu Israele. Imwe mukuyesa kuvunga mzinda. Thangwi yache ninji munafuna kusakaza mzinda wa MBUYA?”

²⁰Yoabu adatawira mbati, “Nkhabe tayu! Ine sinasakaza penu kuvunga mzinda wa MBUYA tayu.

²¹Pinasasanya ife kupichita si penepyo tayu. Munthu unango dzinache Sheba mwana Bikiri wa kudziko ya mapiri ya Eferemu adapandukira Mfumu Davite. Mperekeni kuna ife munthu weneyu, penepo ife tinabuluka mumzinda muno.” Mkazi ule adalonga kuna Yoabu mbati, “Ife tinati tiponyere msolo wache na pafufu ya mpanda kuna imwe.”

²²Kubuluka penepo iye adenda kuna anthu a mumzinda na pidanyerezera iye kuchita pile. Tenepo iwo adagwanda msolo wa Sheba mbauponyera na pafufu ya mpanda kuna Yoabu. Iye adaliza ngoma ninga chidziwiso kuna amunache kuti abuluke mumzinda mule, tenepo iwo adabwerera kwawo. Yoabu adabwerera ku Yerusalemu kuna mfumu.

²³Yoabu akhali mkadamu wa anyankhondo onsene a Israele; Benaia mwana Yehoiada akhali mkadamu wa anyakulondali a Chikereti na a Chipeleti;

²⁴Adoniramu akhali mkadamu wa anyabasa akukhakhamizwa; Yehosafati mwana Ahiludi akhali nyakulemba pya m'dziko;

²⁵Sheva akhali nyakulemba m'thando ya miseru; Zadoki na Abiatara akhali anyansembe;

²⁶Ira wa kuluwani ya Yairi akhalimbo mbodzi wa anyansembe a Davite.