Read cisena 2 SAMUELE 21 Bible Online

2 SAMUELE 21 - cisena bible

2 SAMUELE 21

¹Pandzidzi ukhatonga Davite pakhali njala ikulu, ile idamala pyaka pitatu pyamumphu. Davite adavunza nzeru kuna MBUYA pya njala yeneyi, tenepo MBUYA adalonga mbati, “Sauli na banjache ene ngakudawa, thangwi ya kuchita pyaupandu; iye adapha anthu a ku Gibeoni.”

²Anthu a ku Gibeoni hakhali Aisraele tayu; iwo akhali gulu ing'ono ya Aamori, anthu ale adadumbira Aisraele kuti anaatchinjiriza, kwache Sauli adayesa kuavunga thangwi ya chipapu chikhali na iye pa Israele na Yuda.

³Natenepo Davite adachemeresa Agibeoni mbaavunza mbati, “Ndikuchitireninji? Ine ndinafuna ndisasanye pyakudawa pidachitwa kuna imwe, towera mutsanzayise anthu a MBUYA.”

⁴Anthu a ku Gibeoni adatawira mbati, “Kukhonda vana kwathu na banja ya Sauli nkhabe kwanisa kumala tayu na siliva penu golidi, penu tinafuna kupha munthu na mbodzi ene wa ku Israele tayu.” Davite adavunza mbati, “Apo ninji chinanyerezera imwe kuti ndikuchitireni?”

⁵Iwo adatawira mbati, “Sauli akhafuna pyakutipha mbakhonda funa pyakusiya munthu na mbodzi ene wa ife na moyo konsene kwene mu Israele muno.

⁶Tenepo perekani kuna ife pinomwe mwa pidzukulu pyache pyachimuna, towera tiaphe pakuamanika pamaso pa MBUYA pa Gibea, luwani ya Sauli, mfumu adasankhulwa na MBUYA ule.” Mfumu adatawira mbati, “Ndinati ndiapereke kuna imwe.”

⁷Davite adasiya na moyo Mefiboseti mwana Yonatani, mdzukuluache Sauli thangwi ya kudumbira kwakupambulika kudachitwa pamaso pa MBUYA pakati pa iye na Yonatani mwana Sauli.

⁸Kwache iye adakwata Arimoni na Mefiboseti, anache achimuna awiri adabala iye na Rizipa mwana wamkazi wa Aia; iye adakwata pontho ana ashanu achimuna a Meriba mwana wamkazi wa Sauli, adambalira Adriele mwana wamamuna wa Barizilai wa ku Mehola.

⁹Davite adaapereka m'manja mwa anthu a ku Gibeoni, ale adaamanika paphiri pamaso pa MBUYA, tenepo onsene anomwe adamala phiwa. Ndzidzi udaphiwa iwowu ukhali kumala kwa mainja, ndzidzi wakutoma kuvuna barele.

¹⁰Mkazi wachibitchu wa Sauli, Rizipa mwana wamkazi wa Aia adathasika sakha kugonerapo paphanzwi. Tenepo iye adakhala penepo kubulukira kutoma kwa kuvuna mpakana kuvumba kwa mvula. Na kumasikati iye akhazwinga mbalame pamitembopo, pontho na mosiku iye akhaitchinjiriza kuna nyama zam'tsanga.

¹¹Pidava Davite pinthu pidachita Rizipa pile,

¹²iye adenda kakwata magogodo a Sauli na a mwanache Yonatani kuna anthu a ku Yabeshi-Gileadi. Iwo akhadaaba kuthando ya mzinda ya Beti-Shani, kudamanika pamtanda Afilisti manungo awo kule, pansiku idaphiwa Sauli paphiri ya Giliboa.

¹³Davite adakwata magogodo a Sauli na a mwanache Yonatani, pontho adagumanyisa magogodo a amuna anomwe adaphiwa ale.

¹⁴Tenepo iwo adafikhira magogodo a Sauli na a mwanache Yonatani m'masiye a Kishi babache Sauli ku Zela m'nthemba ya Benjemani kuchita pyonsene pidatonga mfumu. Kubuluka penepo MBUYA adava kupemphera kwa dziko.

¹⁵Padalamuka pontho nkhondo pakati pa Afilisti na Aisraele, tenepo Davite na amunache adenda kamenya nkhondo na Afilisti mwakuti iye adatopa pyakwanga.

¹⁶Tenepo Ishibi-Benobu mbodzi wa pidzukulu pya Arefaimu, ule dipache ikhalemera makilogramu matatu na theka, pontho ule akhali na talasada itswa adanyerezera kuti iye anakwanisa kupha Davite.

¹⁷Mbwenye Abishai mwana Zeruia adapulumusa Davite; iye adamenya Mfilisti wakukhuma ule mbampha. Tenepo amuna a Davite adadumbira kuna iye mbati, “Imwe nee munaendave nafe kunkhondo tayu, thangwi imwe ndimwe chidikhiro cha Israele pontho ife nkhabe funa kukusowani tayu.”

¹⁸Pidamala penepi pakhali pontho nkhondo na Afilisti pa Gobu. Wenewu ukhali ndzidzi udapha Sibekai wa ku Husha nyakukhuma unango dzinache Safu, chidzukulu cha Arefaimu.

¹⁹Kubuluka penepo pakhali pontho nkhondo na Afilisti pa Gobu. Penepo Elihanani mwana wamamuna wa Yaare-Oregimu wa ku Betelehemu adapha Goliati wa ku Gati, ule akhali na dipache ya ntchindu ninga mtanda wakuphatiswa basa kuluka nguwo.

²⁰Kubuluka penepo pakhali pontho nkhondo inango pa Gati pale pakhali munthu unango wakukhuma wakufuna pyankhondo. Iye akhali na pyala pitanthatu kudzanjache yonsene, pontho pyala pitanthatu kudzinyalo yache yonsene; pabodzi pene akhali na pyala makumawiri na pinayi, pontho iye akhali chidzukulu cha Arefaimu.

²¹Iye adalulupisa Aisraele, tenepo Yonatani mwana Shama mbaleache Davite adampha.

²²Amuna akukhuma anayi ale akhali pidzukulu pya Arefaimu wa ku Gati, tenepo onsene adaphiwa na Davite pontho na amunache.