Read cisena 2 SAMUELE 22 Bible Online

2 SAMUELE 22 - cisena bible

2 SAMUELE 22

¹Pidapulumusa MBUYA Davite kuna Sauli, pontho na kuna anyamalwache anango; Davite adaimbira MBUYA nyimbo:

²MBUYA ndi nyakunditchinjiriza, mpandanga wamphamvu, pontho dombo wanga,

³Mulungu wanga ndi nyakunditchinjiriza, pakubisala panga, pontho chakugedera changa matswimo. Iye ambanditchinjiriza mbandikoya pakupata. Iye ndi Nyankhombo wanga; iye ambanditchinjiriza mbandipulumusa kuna anyamalwanga.

⁴Ine ndimbachemera kuna MBUYA, tenepo iye ambandipulumusa kuna anyamalwanga. MBUYA mbakuzwe.

⁵Mabimbi a imfa andigabikira; mabimbi a kugoswa adandibiza.

⁶Nyatwa za dziko ya anyakufa zidandizungulira, pontho masiye adandikumbira mulindi.

⁷Na nyatwa zanga zene ine ndidachemera MBUYA, ndidachemera Mulungu wanga kuti andiphedze. Kubulukira m'nyumba mwache iye adava falanga, chiliro changa chidafika m'makutu mwache.

⁸Penepo dziko yapansi idatetemera mbitekenyeka, maziko a thambo adatekenyeka, iwo adatetemera thangwi MBUYA adazhangali.

⁹Toloo! Utsi udabuluka m'mphuno mwache, moto wakuvunga pontho makala akuyerima adabuluka m'kanwa mwache.

¹⁰Iye adathalura kati na kati thambo mbatchitha pansi, na makole akuswipa pansi pa manyalo ache.

¹¹Iye akhambuluka nwii papyakulengwa pyakukhala na maphaphido mbapakira pamaphaphido a mphepo.

¹²Iye adapimpsampsika na mdima kuzungulira manungo ache, makole akuswipa akudzala na madontho a mvula,

¹³makala a moto adayerima kubulukira m'njazi pamaso pache.

¹⁴Tenepo MBUYA adaguma kuthambo, fala ya Nyakudzulu-dzulu idaveka.

¹⁵Iye adaponya matswimo mbabalalisa anyamalwache, na ntchasi iye adaathamangisa.

¹⁶Maphedi a bara adauma kakata, pontho maziko a dziko yapansi adasala pamtunda nyimwa pidasumulula MBUYA anyamalwache, pontho pidaabangulira iye thangwi ya kuzhangali kwache.

¹⁷Iye adathambidzira mkono wache kubulukira kudzulu mbandiphata; iye adandinula m'madzi akuzwika.

¹⁸Iye adandipulumusa kuna nyamalwanga wamphamvu, kuna nyakundizonda, ule akhali na mphamvu pyakwanga kupiringana ine pano.

¹⁹Ndzidzi ukhali ine panyatwa, iwo adandiphata, kwache MBUYA adanditchinjiriza.

²⁰Iye adandiwambusa panyatwa; adandipulumusa thangwi adakomerwa nane.

²¹MBUYA ambandifupa thangwi ine ndimbachita pyakulungama; iye ambanditsanzayisa thangwi ndine munthu okhonda dawa.

²²Na thangwi yakuti ine ndavera mwambo wa MBUYA; ine sidampandukire tayu Mulungu wanga.

²³Ine ndateweza matongero ache onsene; ine sidakhonde vera matongero ache tayu.

²⁴Iye ambapidziwa kuti ine nkhabe chinango chakundipokanyisa tayu; kuti ine ndathunda pinthu pyakudawika.

²⁵Natenepo iye ambandifupa thangwi ndimbachita pyakulungama; thangwi ambapidziwa kuti ndine munthu okhonda dawa.

²⁶Kuna anyakukhulupirika, imwe mumbaaonesa kukhulupirika kwanu, mumbamuonesa udidi wanu onsene kuna anthu akusowa chakuapokanyisa.

²⁷Imwe ndimwe wangwiro kuna angwirombo; mbwenye ndimwe wakukala mtima kuna mpheswe.

²⁸Imwe mumbapulumusa anyakupichepesa; kwache mumbatchithisa anyakupithemba.

²⁹Imwe, MBUYA ndimwe nyale yanga. Sandusani mdima wandizungulirawu kukhala cheza.

³⁰Na chiphedzo chanu, ine ndinakwanisa kusosa anyamalwanga. Na Mulungu wanga, ine ndinakwanisa kunumpha mipandawo.

³¹Mulungu weneyu, mabasache ngakuthema monsene mwene, mafalache ngakunyindirika. Iye akhala ninga chakugedera matswimo kuna onsene ambabisala muna iye kuti aatchinjirize ale.

³²MBUYA ene basi ndiye Mulungu; Mulungu ene basi ndiye Phanzwi yathu.

³³Mulungu weneyu ndi mpandanga wamphamvu; iye ambachitisa njiranga kukhala yakuchena.

³⁴Iye ambachitisa manyalo anga kukhala ninga njondo za nyasa; iye ambanditchinjiriza pamapiri.

³⁵Iye ambandifunzisa mamenyero a nkhondo, towera ndikwanise kuphatisa basa uta wamphamvuletu.

³⁶MBUYA, imwe mumbanditchinjiriza mbamundipulumusa; chiphedzo chanu chandichitisa kukhala wamkulu.

³⁷Imwe mwachitisa kuti ndileke phatwa, chipo ine sidagwe tayu.

³⁸Ine ndimbathamangisa anyamalwanga mbandiakunda; ine nkhabe kualeka tayu mpakana ndamala kuavunga.

³⁹Ine ndaavunga monsene mwene mwakuti nkhabe kwanisa kulamuka tayu; iwo ali thasa pamanyalo panga.

⁴⁰Imwe mumbandipasa mphamvu pankhondo, pontho mumbandichitisa kukunda anyamalwanga.

⁴¹Imwe mumbachitisa anyamalwanga kundithawa; ine ndimbakunda anyakundizonda.

⁴²Iwo ambalirira chiphedzo kwache nkhabe munthu na mbodzi ene anaapulumusa tayu; iwo ambachemera kuna MBUYA, kwache hambaatawira tayu.

⁴³Ine ndaapeya, tenepo iwo asanduka fumbi; ine ndimbaapondedza ninga matope m'njira.

⁴⁴Imwe mudandipulumusa kuna anthu akupandukira; imwe mwakoya chidzo changa ninga mfumu wawo; anthu akhakhonda ine dziwa lero ali pansi pa utongi wanga.

⁴⁵Alendo akundilambira; sindzidzi iwo nkhundiona, iwo ambandivera.

⁴⁶Iwo onsene ambataya mtima; iwo ambabuluka na kutetemera m'mipando mwawo yamphamvu.

⁴⁷MBUYA ana moyo! Kuzani Phanzwi yanga! Lalikani pya ukulu wache wa Mulungu, Phanzwi pontho Nyankhombo wanga.

⁴⁸Iye ambandichitisa kukunda anyamalwanga; iye ambaikha madzinza pansi pa utongi wanga,

⁴⁹mbandipulumusa kuna anyakundizonda. MBUYA imwe mumbandichitisa kukunda anyamalwanga mbamunditchinjiriza kuna anthu akuzunguzika.

⁵⁰Natenepo ine ndimbakukuzani MBUYA pakati pa madzinza; ine ndimbaimba nyimbo zakukukuzani nazo.

⁵¹Mulungu ambachitisa mfumu wache kukunda; iye ambamuonesa kumfuna kwache kokhonda mala mfumu adasankhula iye ule, kuna Davite na pidzukulu pyache kwenda na kwenda.