Read cisena 2 SAMUELE 24 Bible Online

2 SAMUELE 24 - cisena bible

2 SAMUELE 24

¹MBUYA adazhangali pontho na Aisraele mbachitisa kuti Davite adzese nyatwa pana iwo. MBUYA adalonga mbati, “Ndoko ukachitise kalembera wa Israele na anthu a ku Yuda.”

²Tenepo Davite adapanga Yoabu mkadamu wa anyankhondo ache mbati, “Ndoko kuna madzinza onsene kubulukira kunthemba ya Dani mpakana ku Beeresheba na kulembera anthu onsene towera ine ndidziwe kuinjipa kwa anthu anga.”

³Mbwenye Yoabu adatawira mbati, “Mfumu, MBUYA Mulungu wanu mbachitise Aisraele kuinjipa kadzana kupiringana muna iwo chinchino pano, pontho kuti imwe maso anu aone penepi pikuchitika. Apo thangwi yache ninji mbuyanga anafuna kuchita chinthu ninga chenechi?”

⁴Mbwenye mfumu adachitisa Yoabu na mathubu ache kuvera pidalonga mfumu pile; iwo adabuluka pamaso pa mfumu mbaenda kachita kalembera wa Aisraele.

⁵Iwo adawambuka mkulo wa Yorodani mbamanga msasa kumwera kwa Aroeri mzinda wa pakati pa phedi m'nthemba ya Gadi. Kubuluka penepo adenda kumpoto ku Yazere.

⁶Kubuluka penepo adenda ku Gileadi mpakana ku Kadeshi m'nthemba ya Ahiti.[35] Kubuluka penepo adenda ku Dani mpakana kumadokero dzuwa a Sidoni.

⁷Kubuluka penepo iwo adenda kumwera kumzinda wa Turo wakutchingwa na mpanda mpakana kumizinda yonsene ya ku Hivi na Kanani mbamalisira ku Beeresheba m'thando yatchetcha ya Negebu mu Yuda.

⁸Tenepo pidamala iwo kwenda nthemba yonsene miyezi mifemba na nsiku makumawiri iwo adabwerera ku Yerusalemu.

⁹Yoabu adalonga konta yonsene ya amuna akukwanisa kuphata basa ya unyankhondo: Mu Israele akhalipo pikwi madzana masere, ku Yuda akhalipo pikwi madzana mashanu.

¹⁰Mbwenye pidamala Davite kuchitisa kalembera chikumbu mtima chache chidatoma kumnensa mbalonga kuna MBUYA mbati, “Ine ndadawa pikulu pene thangwi ya kuchita penepi! Ndaphata miyendo ndilekerereni. Ine ndachita pinthu pyakupupwa.”

¹¹MBUYA adalonga kuna Gadi mprofeti wa Davite mbati, “Ndoko kampange Davite kuti ine ndikumpasa pinthu pitatu kuti asankhule chibodzi. Ine ndinati ndimpase chinthu chinasankhula iyecho.” Mangwana mwache na machibese pidalamuka Davite,

¹³Gadi adenda kuna Davite mbampanga mafala akhadalonga MBUYA ale. Iye adalonga mbati, “Ntchipi chinafuna imwe? Pyaka pitatu[36] pya njala ikulu m'dziko mwanu, penu miyezi mitatu ya kuthawa anyamalwanu, penu nsiku zitatu za muliri m'dziko mwanu muno. Tenepo nyerezerani, mungamala penepo mundipange chinafuna ine kapanga MBUYA.”

¹⁴Davite adatawira mbati, “Ine ndikusanyika pikulu pene mumtima mwanga! Kwache ine nkhabe funa kutchunyuswa na anthu tayu. MBUYA mwenechiroache ndiye ananditchunyusa podi iye ngwansisi.”

¹⁵Tenepo MBUYA adagwisa muliri mu Israele, ule udakhala kubulukira machibese mpakana pansiku ikhadasankhula iye ile. Kubulukira nkhomo mpakana nkhomo inango ya dziko, anthu pikwi makumanomwe adafa.

¹⁶Pikhali chifupi mngelo wa MBUYA kuvunga Yerusalemu, MBUYA adasanduza manyerezero ache akufuna kutchunyusa anthu mbalonga kuna mngelo akhaapha ule mbati, “Leka pyakwana!” Mngelo akhali pambuwa ya Arauna Myebusi.

¹⁷Davite adaona mngelo akhapha anthu ule tenepo adalonga kuna MBUYA mbati, “Ine ndine nyakudawa. Ndine pano ndidachita pyakudawa. Anthu enembo pyawowa adawanji? Imwe mwathema kuvunga ine pano na banjanga.”

¹⁸Nsiku yeneyo Gadi adenda kuna Davite mbalonga kuna iye mbati, “Ndoko pambuwa ya Arauna ukamangire MBUYA guwa yansembe.”

¹⁹Davite adavera pidampanga MBUYA pile mbachita ninga montho mudampangira Gadi mule.

²⁰Arauna adayang'ana mbaona mfumu na mathubu ache akudza kuna iye. Iye adalamba pamaso pa mfumu

²¹mbalonga mbati, “Mfumu mwatani mwadza kuno?” Davite adatawira mbati, “Ndadza dzagula mbuwako towera ndimangire MBUYA guwa yansembe, towera muliri umale.”

²²Arauna adalonga mbati, “Ikwateni mbamupereke pyonsene pinafuna imwe. Kwatani ng'ombe zimuna zakukweya chingolo mbamuzipereke nsembe paguwapo; magoli-goli na miti yakububudira mupiyese nkhuni.”

²³Arauna adapereka pyonsene kuna mfumu mbalonga kuna iye mbati, “MBUYA Mulungu wanu mbatambire pyakupereka pyanu.”

²⁴Mbwenye mfumu adatawira mbati, “Tayu, ndinati ndikupagali. Ine nkhabe pereka nsembe kuna MBUYA Mulungu wanga okhonda kuzipagalira chinthu tayu.” Tenepo iye adagula mbuwa ile na ng'ombe zene na kobiri zasiliva makumashanu.

²⁵Natenepo iye adamangira MBUYA guwa yansembe mbaperekapo nsembe zakupyerera na nsembe zachiphatizano. MBUYA adava kupemphera kwache, tenepo muliri mu Israele udamala.