Read cisena 2 SAMUELE 3 Bible Online

2 SAMUELE 3 - cisena bible

2 SAMUELE 3

¹Nkhondo pakati pa anyakutewera a Sauli na anyakutewera a Davite idathimiza kumenyeka ndzidzi ukulu ene. Pikhasanduka Davite kukhala na mphamvu pyakwanga, anyamalwache akhaenda mbasowa mphamvu.

²Awa mbana achimuna a Davite adabala iye ku Hebroni: Mwanache wautombo akhali Aminoni, mwana adabala iye na Ahinoamu wa ku Yezereele;

³wachiwiri akhali Kileabu ule mache akhali Abigaile, mamfelwa wa Nabali wa ku Karimele; wachitatu akhali Abisalomu, ule mache akhali Maaka mwana wamkazi wa Mfumu Talimai wa ku Geshuri;

⁴wachinayi akhali Adonia ule mache akhali Hagiti; wachishanu akhali Shefatia ule mache akhali Abitali

⁵wachitanthatu akhali Itireamu ule mache akhali Egila. Onsenewa akhali ana a Davite adabala iye ku Hebroni.

⁶Pikhathimiza kumenyeka nkhondo pakati pa anyakutewera a Sauli na anyakutewera a Davite, Abineri adapichitisa yekha ene kukhala wamphamvu pakati pa anyakutewera a Sauli.

⁷Nsiku inango Ishiboseti mwana Sauli adapambizira Abineri kuti akhagona na Rizipa mkazi wachibitchu wa babache, ule akhali mwana wamkazi wa Aia.

⁸Penepi pidazhangalisa pyakwanga Abineri mbalonga mbati, “Ayi ukunyerezera kuti ndine ndidapereka Sauli m'manja mwa anyamalwa? Kani ukunyerezera kuti ndikutumikira Yuda?” Iye adathimiza kulonga mbati, “Kutomera ndzidzi wakutoma ine ndakhulupirika kuna babako Sauli, abale ache na ashamwali ache, pontho ndakutchinjirizani kuti muleke kundwa na Davite; apo lero ukundipambizira pya mkazi weneyu?

⁹MBUYA adadumbira kuna Davite kuti iye anakwata ufumu wa Sauli na pidzukulu pyache, pontho anachitisa Davite kukhala mfumu wa Israele na Yuda ene, kubulukira kumadolomero a dziko mpakana kumadolomero a dziko. Chinchino Mulungu mbandiphe pyache ngakhala sinachitisa penepi kukwana-kwana tayu!”

¹¹Ishiboseti adachita mantha pyakwanga na Abineri mwakuti hadalonge na chinthu chene tayu.

¹²Abineri adatuma anyamphangwa kuna Davite ule ndzidzi wenewu akhali ku Hebroni[2] kalonga mbati, “Mbani anafuna dzatonga dzikoyi. Tende iwe na ine tichite chiverano, tenepo ine ndinakuphedza kuti Israele onsene akhale m'manja mwako.”

¹³Davite adatawira mbati, “Pyakoma, ine ndinati ndichite nawe chiverano ngakhala unachita pinthu ipi: iwe wathema kudza na Mikaela mwana wamkazi wa Sauli ndzidzi unadza iwe kuno dzandiona.”

¹⁴Davite adatumambo anyamphangwa kuna Ishiboseti kumpanga kuti, “Ndibwezere mkazanga Mikaela, ine ndidampagalira nsonga dzana za chimuna za Afilisti kuti ndimsembe.”

¹⁵Tenepo Ishiboseti adamkwata m'manja mwa mamunache Palitiele mwana Laishi.

¹⁶Palitiele adatewera Mikaela mpakana kuluwani ya Bahurumu uku akwenda mbalira. Mbwenye Abineri adampanga mbati, “Bwerera kwanu.” Tenepo iye adabwereradi.

¹⁷Abineri adenda kuna akadamu a Aisraele mbalonga kuna iwo mbati, “Ndzidzi ukulu ene ndapifuna kuti Davite akhale mfumu wanu.

¹⁸Tenepo uno ndi mwayi wanu. Kumbukani pidalonga MBUYA kuti, ‘Ine ndinaphatisa basa nyabasanga Davite kupulumusa anthu anga Aisraele m'manja mwa Afilisti, pontho kuna anyamalwawo anango onsene.’ ”

¹⁹Abineri adalonga pontho kuna anthu a dzinza ya Benjemani. Kubuluka penepo adenda ku Hebroni kapanga Davite pinthu pikhadaphatizana anthu a dzinza ya Benjemani na Aisraele onsene.

²⁰Pidadza Abineri kuna Davite ku Hebroni pabodzi pene a amuna makumawiri, Davite adaasasanyira phwando.

²¹Abineri adapanga Davite mbati, “Chinchino ndinati ndiende kakwata dziko yonsene ya Israele kuti ikhale m'manja mwanu, Imwe Mfumu. Iwo anatawira kuti mukhale mfumu penepo imwe munakhala na pinthu pikhafuna imwe, pontho munatonga dziko yonseneyi.” Davite adatsikimizira Abineri kuti anatchinjirizwa, natenepo adamgwinya.

²²Kubuluka penepo Yoabu na mathubu anango a Davite adabwerera kudenda iwo kachita nkhondo kule mbadza na pinthu pizinji pidapokosera iwo pile. Kwache Abineri hakhali ku Hebroni pabodzi pene na Davite tayu, thangwi Davite akhadamgwinya mbamtsikimizira kuti anatchinjirizwa.

²³Pidafika Yoabu na amunache adapangwa kuti Abineri akhadadza kuna Mfumu Davite, tenepo Davite adamgwinya mbamtsikimizira kuti anatchinjirizwa.

²⁴Penepo Yoabu adenda kuna mfumu mbalonga kuna iye mbati, “Chachita imwe ninji? Abineri adadza kuna imwe. Thangwi yache ninji imwe mudamtawirisa kwenda?

²⁵Iye adadza dzakunyengezani pontho dzazonda pyonsene pene pimbachita imwe na konsene kwene kumbaenda imwe. Ndimomwene kuti imwe mukupidziwa penepi.”

²⁶Pidabuluka iye pakhali Davite pale, Yoabu adatuma anyamphangwa kuti akachemere Abineri, natenepo iwo adadza naye kubulukira pa mchera wa Sira. Kwache Davite hadadziwe na chinthu chene tayu pya penepi.

²⁷Pidafika Abineri ku Hebroni, Yoabu adenda naye pakhundu khala ninga akhafuna kulonga naye chibiso-biso, tenepo adamulasa m'mimba. Natenepo Abineri adaphiwa thangwi iye adapha Asahele mbaleache Yoabu.

²⁸Pidapiva Davite adalonga mbati, “Ine na ufumu wanga nkhabe mseru pamaso pa MBUYA tayu thangwi ya kuphiwa kwa Abineri mwana Neri.

²⁹Chiropa chache chigwere pamsolo pa Yoabu na banjache yonsene. Pamifendu yonsene mbapakhale munthu m'banja mwache wakuchucha chiropa, penu wamatanya, penu wakuchimwana kuphata mabasa achimuna, penu wakuphiwa pankhondo, penu wakusowa pyakudya.”

³⁰Tenepo Yoabu na mbaleache Abishai adabwezera Abineri thangwi ya kuphiwa kwa Asahele mbaleawo pankhondo ku Gibeoni.

³¹Kubuluka penepo Davite adalonga kuna Yoabu na kuna anthu onsene akhali na iye ale mbati, “Ng'ambani nguwo zanu mbamuvala masakha kusintili Abineri.” Pandzidzi wa malirowo Mfumu Davite ene adafamba m'nduli mwa baulu.

³²Abineri adaikhwa m'masiye ku Hebroni, tenepo mfumu adalira mwakugaluza fala panthumbipo. Anthu onsene adachitambo chibodzi-bodzi.

³³Davite adaimba nyimbo ishi pamaliro a Abineri: “Thangwi yache ninji Abineri afe ninga pupwe?

³⁴Manjache hadamangwe tayu, pontho miyendo yache hidamangwe tayu; iye adafa ninga munthu wakuphiwa na mapanga!” Anthu onsene adamulira pontho.

³⁵Nsiku yonseneyo anthu adayesera kumkhakhamiza Davite kuti adye. Mbwenye iye adadumbira pikulu pene mbati, “Mulungu mbandiphe pyache ngakhala ndinadya chinthu dzuwa mbidzati thobila!”

³⁶Iwo adaikha penepi mumtima mwamo mbakomerwa. Ndimomwene pyonsene pidachita mfumu pidakomera anthu.

³⁷Nsiku yeneyo anthu onsene a Davite na a ku Israele adavesadi kuti mfumu hadakwatepo khundu pakuphiwa kwa Abineri tayu.

³⁸Mfumu adalonga kuna mathubu ache mbati, “Kadi imwe nkhabe dzindikira tayu kuti mkadamu wamkulu mu Israele lero afa?

³⁹Podi na ine ene mfumu wakusankhulwa na Mulungu, manungo anga nkhabe mphamvu lero tayu. Ana achimuna atatu a Zeruia akundichitira pyaupandu. MBUYA mbatchunyuse mphandu zenezi mwakuthemerana na pyachita iwo.”