Read cisena 2 SAMUELE 5 Bible Online

2 SAMUELE 5 - cisena bible

2 SAMUELE 5

¹Kubuluka penepo madzinza onsene a ku Israele adadza kuna Davite ku Hebroni mbalonga kuna iye mbati, “Ife ndife manungo anu pontho chiropa chanu.

²M'ndulimu podi na pikhali Sauli mfumu wathu, imwe mukhatsogolera Aisraele kunkhondo, pontho MBUYA adadumbira kuti imwe munatsogolera anthu ache ninga makabuswa, pontho munakhala mtongi wawo.”

³Natenepo akadamu onsene a Aisraele adadza kuna Mfumu Davite ku Hebroni. Iye adachita nawo chiverano chakupambulika, iwombo adamdzoza kukhala mfumu wa Israele.

⁴Davite akhali na pyaka makumatatu pyakubalwa mukhapita iye ufumu, tenepo iye adatonga pyaka makumanayi.

⁵Iye adatonga dzinza ya Yuda mu Hebroni pyaka pinomwe na theka pontho mu Yerusalemu, madzinza anango onsene a Israele na Yuda pyaka makumatatu na pitatu.

⁶Ndzidzi udafika wakuti Davite na amunache adenda kasosa Yerusalemu. Ayebusi akhakhala kweneko ale adanyerezera kuti Davite hanakwanisa kukunda mzindawo tayu. Tenepo iwo adalonga kuna iye mbati, “Iwe nkhabe kwanisa kupita muno na pang'ono pene tayu; anafuna kukukhondesa ndi maboli-boli na anyakulamala.”

⁷Mbwenye Davite adapokosera Zioni, mbuto yakutchingwa na mpanda, ule mbudziwikaletu na dzina yakuti “Mzinda wa Davite.”

⁸Nsiku yeneyo Davite adalonga kuna amunache mbati, “Ayi pana munthu unango pano ambazonda pyakwanga Ayebusi ninga mumbaazondera ine. Tathema kuapha. Tenepo ndokoni na m'mikhwawa ya madzi mbamukasose maboli-boli na anyakulamalawo.” Ndi thangwi ache pikulongwa kuti, “Maboli-boli na anyakulamala nkhabe kwanisa kupita m'nyumba ya MBUYA tayu.”

⁹Pidamala iye pokosera mbuto yakutchingwa na mpanda ile, Davite adakhalamo mbauthula kuti ndi mzinda wa Davite. Iye adamanga mzinda kuzungulira kubulukira kule kukhali mitumbira mpakana m'bwalo.

¹⁰Iye adasanduka wamphamvu pyakwanga ndzidzi onsene, thangwi MBUYA Wamphamvu Zonsene akhali naye.

¹¹Kubuluka penepo Mfumu Hiramu wa kumzinda wa Turo adatuma anyamphangwa kuna Davite pabodzi pene na mitanda yamkungudza, anyampala matabwa na amisiri akumanga nyumba zamiyala kuti akamange nyumba yachifumu.

¹²Natenepo Davite adadzindikira kuti MBUYA ndiye akhadamkhazikisa kukhala mfumu wa Israele, pontho kuti akhachitisa ufumu wache kufamba mwadidi thangwi ya udidi wa anthu ache.

¹³Pidamala iye fuluka ku Hebroni kwenda ku Yerusalemu, Davite adakwata akazi azinji achibitchu mbabala ana azinji achimuna na achikazi ene.

¹⁴Ana adabala iye ku Yerusalemu mbawa; Shamua, Shobabu, Natani, Solomoni,

¹⁵Ibihari, Elishua, Nefegi, Yafia,

¹⁶Elishama, Eliada na Elifeleti.

¹⁷Afilisti adapangwa kuti Davite apitiswa ufumu mu Israele, tenepo anyankhondo awo adabuluka kachita naye nkhondo. Pidava Davite penepi, iye adatchithira kumbuto yakutchingwa na mpanda ile.

¹⁸Afilisti adafika paphedi ya Refaimu mbaipokosera.

¹⁹Davite adavunza MBUYA mbati, “Ayi, ndichite nawo nkhondo Afilistiwa? Ayi munandichitisa kuakunda?” MBUYA adatawira mbati, “Ndoko kachite nawo nkhondo pontho ndinakuchitisa kuakunda.”

²⁰Tenepo Davite adenda ku Baala-Perazimu kudakunda iye Afilisti kule. Iye adalonga mbati, “MBUYA aswa anyamalwanga ninga madzi makulu.” Natenepo mbuto yeneyo imbachemerwa Baala-Perazimu.[4]

²¹Pidathawa Afilisti, iwo adasiya m'nduli milungu yawo, tenepo Davite na amunache ale adaikwata.

²²Kubuluka penepo Afilisti adabwerera kuphedi ya Refaimu mbakhalamo pontho.

²³Davite adavunza pontho nzeru kuna MBUYA, tenepo MBUYA adamtawira mbati, “Leka kuasosa na kuno, mbwenye zungulira mbusasanyike kaasosa na kukhundu inangoyo chifupi na miti ya balisamu.[5]

²⁴Sindzidzi nkhuva upekete-pekete pansonga pamiti ya balisamu, penepo asose, thangwi ine ndinaenda patsogolo pako kakunda anyankhondo a Afilisti.”

²⁵Davite adachita pidampanga MBUYA, tenepo iye adakwanisa kuthamangisa Afilisti kubulukira ku Geba kwenderatu ku Gezeri.