Read cisena 2 SAMUELE 6 Bible Online

2 SAMUELE 6 - cisena bible

2 SAMUELE 6

¹Davite adachemeresa pontho pabodzi anyankhondo aluso a ku Israele, onsene adakwana pikwi makumatatu

²mbaatsogolera kwenda ku Baala mu Yuda, towera akwate kubulukira kweneko Bokosi ya Chiverano ya Mulungu, ile ikhadziwika na dzina yakuti MBUYA Wamphamvu zonsene ule akhala pampando wachifumu padzulu pa pyakulengwa pyakukhala na maphaphido.

³Iwo adakwata Bokosi ya Chiverano ya Mulungu kubuluka nayo kunyumba ya Abinadabu ile ikhali paphiri mbaikwiza m'chingolo chitswa. Uza na Ahio ana achimuna a Abinadabu akhafambisa chingolocho

⁴uku Ahio akhafamba patsogolo.

⁵Davite na Aisraele onsene akhavina na kuimba na mphamvu zawo zonsene[6] kulemedza MBUYA pakuphatisa basa anyakatangale, malimba, ng'oma, pisekese na nkhotcho.

⁶Pikhafika iwo pambuwa ya Nakoni, ng'ombe zidagwegweduka tenepo Uza adafuthula dzanjache mbaphata Bokosi ya Chiverano ya Mulungu ile.

⁷Kabodzi kene MBUYA adazhangalira Uza mbampha thangwi ya kusowa kwache mantha. Uza adafera ponthopo m'khundu mwa Bokosi ya Chiverano ile,

⁸tenepo na lero mbuto yeneyo imbachemerwa Perezi-Uza.[7] Davite pidampha mtima thangwi MBUYA adamtchunyusa Uza mwakuzhangali.

⁹Tenepo Davite adachita mantha na MBUYA mbalonga mbati, “Apo ndinakwanisa tani kukwata Bokosi ya Chiverano?”

¹⁰Natenepo iye adanyerezera kuleka kuikwata kwenda nayo kumzinda wa Yerusalemu; m'mbuto mwache adabauka mbaenda nayo kunyumba ya Obedi-Edomu mzika ya mzinda wa Gati.

¹¹Bokosi ya Chiverano ile idakhala kweneko miyezi mitatu, tenepo MBUYA adatsanzayisa Obedi-Edomu na banjache.

¹²Mfumu Davite adapiva kuti MBUYA adatsanzayisa Obedi-Edomu na pinthu pyache pyonsene pikhali na iye thangwi ya Bokosi ya Chiverano. Natenepo iye adenda kakwata Bokosi ya Chiverano kubulukira kunyumba ya Obedi-Edomu kudza nayo kumzinda wa Davite na kusekera kukulu.

¹³Pidafamba amuna akhathukula Bokosi ya Chiverano ale mathanyo matanthatu, Davite adaapanga kuti aimire, tenepo iye adapereka nsembe ng'ombe imuna na mwanamphulu wakunenepa.

¹⁴Davite adavala kwene kapundu[8] basi mbavina na mphamvu zache zonsene kulemedza MBUYA.

¹⁵Iye na Aisraele onsene adakwata Bokosi ya Chiverano kwenda nayo ku Yerusalemu uku akukhuwa mwakukomerwa na kuliza ngoma.

¹⁶Pikhapitiswa Bokosi ya Chiverano mumzinda wa Davite mule, Mikaela mwana wamkazi wa Sauli adasuzumira pazhanera mbaona Mfumu Davite akuvina na kunumpha-numpha pamaso pa MBUYA, tenepo penepi pidamchitisa manyadzo.

¹⁷Iwo adadza na Bokosi ya Chiverano ile mbaiikha pambuto pache m'chikhumbi chikhadamanga Davite chile. Tenepo iye adapereka nsembe na pyakupereka pyachiphatizano kuna MBUYA.

¹⁸Pidamalisa iye kupereka nsembe zakupyerera na pyakupereka pyachiphatizano, iye adatsanzayisa anthu na dzina ya MBUYA Wamphamvu zonsene.

¹⁹Kubuluka penepo iye adagawa pyakudya kuna anthu onsene. Iye adapasa mamuna na mkazi onsene mu Israele mkate ubodzi na phindi ya nyama yakuotcha, na pitumbuwa pya mfesa zakuuma. Pidamala penepi munthu onsene adenda kwawo.

²⁰Tenepo Davite adenda kamwenyika banjache. Mikaela adabuluka panja kagumanikana naye mbalonga mbati, “Mfumu wa Israele kupilulupisa yekha ene lero, iye adula nguwo zache ninga pupwe pamaso pa atsikana achibitchu a mathubu ache.”

²¹Davite adatawira mbati, “Ine ndikhavina kulemedza MBUYA, ule adandisankhula m'mbuto mwa babako na banjache mbandipitisa kukhala nyakutsogolera anthu ache Aisraele. Tenepo ine ndinati ndithimize kuvina kulemedza MBUYA,

²²pontho ndinati ndinyanye kupilulupisa ndekha ene. Ine ndinati ndioneke wakupupwa pamaso pako mbwenye nyakulemedzwa pamaso pa atsikana achibitchu ale.”

²³Mikaela, mwana wamkazi wa Sauli, akhali wakusowa ana mpakana kufa kwache.