Read cisena 2 SAMUELE 7 Bible Online

2 SAMUELE 7 - cisena bible

2 SAMUELE 7

¹Mfumu Davite adakhazikika m'nyumba mwache yachifumu, tenepo MBUYA adamtchinjiriza kuna anyamalwache onsene.

²Tenepo mfumu adalonga kuna Natani mprofeti mbati, “Ine ndikukhala m'nyumba yakumangwa na matabwa amkungudza mbwenye Bokosi ya Chiverano ya Mulungu ikukhala m'chikhumbi!”

³Natani adatawira mbati, “Chitani pyonsene pinanyerezera imwe thangwi MBUYA ali namwe.”

⁴Mbwenye na mosiku mweche MBUYA adalonga kuna Natani mbati,

⁵“Ndoko kampange nyabasanga Davite kuti ine ndikulonga kuna iye kuti, ‘Si iwe anafuna dzandimangira nyumba yakuti ine ndikhalemo tayu.

⁶Kubulukira ndzidzi udapulumusa ine Aisraele kuna anthu a ku Iguputo mpakana lero ine sidakhale m'nyumba tayu. Ine ndaenda mbuto na mbuto mbandikhala m'chikhumbi.

⁷Kufamba-famba kwanga konsene na Aisraele ine sidalonge tayu na kuna mbodzi ene wa akadamu adasankhula ine kutsogolera anthu anga kuti, “Thangwi yache ninji mwakhonda kundimangira nyumba ya matabwa amkungudza?” ’

⁸“Chinchino panga nyabasanga Davite kuti, ‘Ine MBUYA Wamphamvu zonsene ndikulonga kuti: Ine ndidakukwata kumpovu kukhadyesa iwe mabira kule kuti ukhale mtongi wa anthu anga Aisraele.

⁹Ine ndakhala nawe konsene kwene kwaenda iwe, pontho ndakunda anyamalwako onsene pamaso pako. Ine ndinakuchitisa kukhala munthu wakuveka pyakwanga ninga akadamu akuveka pyakwanga padziko yapansi.

¹⁰Ine ndasankhulira anthu anga Aisraele mbuto mbandiachitisa kukhazikikamo, kule kunafuna iwo khala okhonda ponderezwa na pang'ono pene. Kutomera ndzidzi udapita iwo m'dziko yeneyi, iwo asoswa na anthu akuzunguzika, kwache penepi nkhabe dzachitika pontho tayu. Ine ndinadumbira kukutchinjiriza kuna anyamalwako onsene pontho kukupasa pidzukulu.

¹²Ungafa mbuikhwa m'masiye a makolo ako, ndinachitisa mbodzi wa anako achimuna kukhala mfumu mbandichitisa ufumu wache kukhala wamphamvu.

¹³Iye ndiye anafuna dzandimangira nyumba, pontho ndinaonesesa kuti ufumu wache ukhale wakwenda na kwenda.

¹⁴Ine ndinakhala babache, iye mbakhala mwananga. Iye angachita chakudawika ine ndinamtchunyusa ninga mumbachitira baba kutchunyusa mwanache.

¹⁵Kwache ine nkhabe dzaleka kumuonesa kumfuna kwanga kokhonda mala ninga mudachitira ine kuna Sauli, adabulusa ine ule kuti iwe ukhale mfumu.

¹⁶Ndzidzi onsene iwe unakhala na pidzukulu pontho ndinachitisa ufumu wako kukhala wakwenda na kwenda pamaso panga. Ufumu wako nkhabe dzamala tayu.’ ”

¹⁷Natani adapanga Davite pyonsene pidatchulula Mulungu kuna iye.

¹⁸Tenepo Mfumu Davite adenda pamaso pa MBUYA m'Chikhumbi. Iye adakhala pansi mbapemphera mbati, “MBUYA Mulungu, ndine animbo ine, pontho banjangambo ninji kuti munditsanzayise ninga tenepa?

¹⁹Kwache chinchino imwe mukuchita pikululetu, MBUYA Mulungu; imwe mwadumbiraletu pya pidzukulu pyanga pinafuna kudza m'tsogolo muno. Tenepo imwe MBUYA Mulungu, mumbachitisa munthu kuti aone pinthu penepi!

²⁰Ninji pontho chinafuna ine kulonga kuna imwe MBUYA Mulungu! Imwe mumbandidziwa ine nyabasanu.

²¹Imwe mudapichita mwakufuna kwanu; imwe mwachita pinthu pyonsene pikulupi kuti mundifunzise.

²²Imwe ndimwe wamkulu MBUYA Mulungu! Nkhabe unango ninga imwe; ndzidzi onsene ife tapidziwa kuti imwe ene ndimwe Mulungu.

²³Nkhabe dzinza inango padziko yapansi ninga Israele, dzinza idapulumusa imwe paubitchu kuti akhale anthu anu ale. Pinthu pikulu pontho pyakudodomesa pidaachitira imwe pyachitisa kuti muveke padziko yapansi. Imwe mudathamangisa[9] madzinza anango na milungu yawo ndzidzi ukhaenda anthu anu, anthu adasudzula imwe paubitchu kudziko ya Iguputo kuti akhale anthu anu ale.

²⁴Imwe mudachitisa Israele kukhala anthu anu kwenda na kwenda, pontho imwe MBUYA mwasanduka Mulungu wawo.

²⁵“Tenepo chinchino MBUYA Mulungu chitisani kudumbira kwanu kuna ine na kuna pidzukulu pyanga kukwana-kwana, pontho chitani pidadumbira imwe pile.

²⁶Tenepo kuveka kwanu kunakhala kukulu kwenda na kwenda, pontho ndzidzi onsene anthu anati alonge kuti, ‘MBUYA Wamphamvu zonsene ndi Mulungu wa Israele!’ Pontho munachitisa ufumu wanga kukhala wakukhazikika pamaso panu!

²⁷MBUYA Wamphamvu zonsene, Mulungu wa Israele, ine ndawanga mtima kupemphera tenepa kuna imwe, thangwi imwe mwatchulula pinthu pyonsenepi kuna ine nyabasanu, pontho mwandipanga kuti munachitisa pidzukulu pyanga kukhala mafumu.

²⁸“Tenepo chinchino MBUYA Mulungu imwe ndimwe Mulungu; ndzidzi onsene imwe mumbachita pinthu pimbadumbira imwe, pontho chinchino mwadumbira pinthu pyadidipi kuna ine, nyabasanu.

²⁹Ndikupemphera kuti mutsanzayise pidzukulu pyanga, towera iwo athimize kukomerwa na kuakomera kwanu mtima. Imwe MBUYA Mulungu mwadumbira penepi, tenepo mtsanzayiso wanu unakhala pana pidzukulu pyanga kwenda na kwenda.”