Read cisena 2 SAMUELE 8 Bible Online

2 SAMUELE 8 - cisena bible

2 SAMUELE 8

¹Pidagwanda ndzidzi pang'ono, Mfumu Davite adasosa pontho Afilist mbaakunda. Iye mbapokosera Metegi-Ama m'manja mwa Afilisti.

²Kubuluka penepo, iye adakunda Amoabu. Iye adaagonesa pansi mbaapima na nkhambala. Tenepo iye adapha anthu awiri pa atatu onsene. Natenepo Amoabu adakhala pansi pa utongi wache mbakhoma msonkho kuna iye.

³Kubuluka penepo iye adakunda mfumu wa ku Zoba, Hadadezere mwana Rehobu, pikhali Hadadezere panjira kamenya nkhondo kuti akwate pontho nthembache ya chifupi na mkulo wa Yufurate.

⁴Davite adaphata amuna akupakira akavalo chikwi chibodzi na madzana manomwe, pontho amuna akufamba pansi pikwi makumawiri. Iye adakoya akavalo kukweya pingolo akukwana dzana ibodzi mbagwanda uzingo wa ntchafu ya anyakusalirawo.

⁵Pidatuma Aaramu a ku Damasiko anyankhondo kaphedza Mfumu Hadadezere, Davite adachita nawo nkhondo mbapha amuna pikwi makumawiri na piwiri.

⁶Kubuluka penepo iye adamanga misasa ya nkhondo[10] m'nthemba yawoyo, tenepo Aaramu adakhala pansi pa utongi wache mbakhoma msonkho kuna iye. MBUYA adachitisa Davite kukunda konsene kwene kukhaenda iye.

⁷Davite adapokosera pyakugedera matswimo pyagolidi pidathukula mathubu a Hadadezere mbaenda napyo ku Yerusalemu.

⁸Iye adakwata pontho nkuwa uzinji ene kubulukira ku Beta na Berotai, mizinda ikhatongwa na Hadadezere ile.

⁹Mfumu Toi wa ku Hamati adava kuti Davite akhadakunda anyankhondo onsene a Hadadezere.

¹⁰Natenepo iye adatuma mwanache Yoramu kapasa mwenyikiro na kuchita makolokoto Mfumu Davite, thangwi ya kukunda kwache Hadadezere, ule akhadachitambo nkhondo na Toi kazinji kene. Yoramu adenda kuna Davite na mitukwa ya golidi, siliva na nkuwa.

¹¹Mfumu Davite adaipambulira kuna MBUYA kuti iphatiswe basa pachipembedzo, pabodzi pene na siliva pontho golidi pikhadakwata iye kuna madzinza adakunda iye ale:

¹²Aedomu, Amoabu, Aamoni, Afilisti na Aamaleki, kuthimizapo khundu ya pinthu pidapokosera iye Hadadezere.

¹³Davite adanyanya kuveka pidabwerera iye kapha amuna pikwi khumi na pisere a ku Edomu m'phedi ya Munyu.

¹⁴Kubuluka penepo iye adamanga misasa ya nkhondo[11] m'nthemba yonsene ya Edomu, tenepo Aedomu onsene adakhala pansi pa utongi wache. MBUYA adachitisa Davite kukunda konsene kwene kukhaenda iye.

¹⁵Davite adatonga dziko yonsene ya Israele mbaonesesa kuti ndzidzi onsene anthu ache akuchitirwa chilungamo pontho pyakuthema.

¹⁶Yoabu ule mache akhali Zeruia akhali mkadamu wa anyankhondo; Yehosafati mwana Ahiludi ndiye akhali nyakulemba pya m'dziko;

¹⁷Zadoki mwana Ahitubu na Ahimeleki mwana Abiatara akhali anyansembe; Seraia akhali nyakulemba m'thando ya miseru;

¹⁸Benaia mwana Yehoiada akhali mkadamu wa anyakulondali a Chikereti na a Chipeleti a[12] Davite; ana achimuna a Davite akhali anyansembe.