Read cisena 2 SAMUELE 9 Bible Online

2 SAMUELE 9 - cisena bible

2 SAMUELE 9

¹Nsiku inango Davite adavunza mbati, “Ayi pana unango asalira na moyo m'banja ya Sauli. Ngakhala alipo, ndinafuna ndimkomere mtima thangwi ya Yonatani.”

²Pakhali nyabasa m'banja ya Sauli dzinache Ziba, tenepo iye adapangwa kwenda kuna Davite. Mfumu adamvunza mbati, “Ayi iwe ndiwe Ziba?” Iye adatawira mbati, “Ndine pano nyabasanu.”

³Mfumu adamvunza mbati, “Ayi alipo unango nyakusalira na moyo m'banja ya Sauli anafuna ine kumkomera mtima ninga mudadumbira ine kuna Mulungu.” Ziba adatawira mbati, “Alipo mbodzi basi wa ana achimuna a Yonatani; iye ngwakulamala miyendo yonsene miwiri.”

⁴Mfumu adavunza mbati, “Ali kupi iye?” Ziba adatawira mbati, “Ali kumsuwo wa Makiri mwana Amiele wa ku Lodebara.”

⁵Natenepo Mfumu Davite adamtumira mphangwa mbadzeswa pamaso pache kubulukira ku Lodebara kumusa kwa Makiri mwana Amiele.

⁶Pidafika Mefiboseti mwana Yonatani pontho chidzukulu cha Sauli pamaso pa Davite, adalamba kumulemedza. Davite adalonga mbati, “Mefiboseti.” Tenepo iye adatawira mbati, “Ndine pano nyabasanu.”

⁷Davite adalonga mbati, “Leka chita mantha. Ine ndinafuna kukukomera mtima thangwi ya babako Yonatani. Ine ndinati ndibwezere kuna iwe minda yonsene ya mbuyako Sauli, pontho ndzidzi onsene iwe unadya pathebulu panga.”

⁸Mefiboseti adalamba pontho mbalonga mbati, “Mwanambwa ene wakufa ali pyadidi kupiringana ine pano. Apo thangwi yache ninji kuti mundichitire udidi ninga wenewu?”

⁹Tenepo mfumu adachemera Ziba nyabasa wa Sauli mbalonga mbati, “Ndikupasa Mefiboseti mwana mbuyako pinthu pyonsene pikhali pya Sauli na banjache pile.

¹⁰Iwe, anako na anyabasako munalimira banja ya mbuyako Sauli mbamudza na pyakuvunapyo kuna iwo kuti pikhale pyawo. Mbwenye Mefiboseti makayo ndzidzi onsene anadya pathebulu panga.” Ziba akhali na ana khumi na anomwe achimuna na anyabasa makumawiri.

¹¹Ziba adatawira mbati, “Ine ndinachita pyonsene pene pinanditonga imwe mfumu.” Tenepo Mefiboseti adadya pathebulu ya mfumu[13] ningambo mbodzi wa ana a mfumu.

¹²Mefiboseti akhali na mwana wamamuna dzinache Mika. A m'banja yonsene ya Ziba adasanduka anyabasa a Mefiboseti.

¹³Natenepo Mefiboseti, ule akhali wakulamala miyendo yonsene miwiri, adakhala mu Yerusalemu kudya pathebulu ya mfumu.