Read cisena 1 MAFUMU 1 Bible Online

1 MAFUMU 1 - cisena bible

1 MAFUMU 1

¹Pidakalamba Mfumu Davite mbakhala na pyaka pizinji pyakubalwa, hadakwanise pontho kuva kukhumbirwa tayu, podi kwene kuti anyabasache amfinikize pyawo magombeza tani.

²Natenepo mathubu ache adalonga kuna iye mbati, “Tendeni tisake-sake mwali kuti ayang'anire mfumu na kumtsalakana mwadidi. Mwana mwaliyo anakwanisa kugona m'khundu mwache, towera Mbuya mfumu wathu ave kukhumbirwa.”

³Kubuluka penepo anyabasa adasaka-saka mu Israele monsene mtsikana wakubalika pyakwanga, tenepo adamgumana Abishagi wa Chishunemu mbadza naye kuna mfumu.

⁴Mtsikanayu akhali wakubalika pyakwanga; iye adayang'anira mfumu mwadidi mwene mbamtumikira, mbwenye mfumu hadapite naye m'bonde tayu mtsikana ule.

⁵Natenepo Adonia, ule mache akhali Hagiti adapithemba yekha ene mbalonga mbati, “Ndinakhala mfumu ndine!” Natenepo iye adakwata pingolo na akavalo mbapanga amuna makumashanu kwenda patsogolo pache.

⁶Chipo babache nee hakhadadzati kumsumulula tayu penu kumvunza pya makhaliro ache. Adonia akhali wakubalika pyakwanga, pontho akhali wachiwiri kubalwa; iye akhali nyamsolo wache Abisalomu.

⁷Adonia adaverana na Yoabu, ule mache akhali Zeruia, pontho na Abiatara nyansembe, tenepo iwo adatawira kuti anamphedza.

⁸Mbwenye Zadoki nyansembe, Benaia mwana Yehoiada, Natani mprofeti, Shimei na Rei pontho na anyakulondali Davite hakhali gulu ibodzi na Adonia tayu.

⁹Kubuluka penepo Adonia adapereka nsembe ya mabira, ng'ombe na anamphulu akunenepa pa Phanzwi ya Zoheleti chifupi na Enirogele. Iye adachemera abale ache onsene, ale mbana achimuna a mfumu, na mathubu onsene a ku Yuda, ale akhali akadamu,

¹⁰mbwenye iye hadachemere Natani mprofeti, penu Benaia penu anyakulondali a mfumu penu mbaleache Solomoni tayu.

¹¹Kubuluka penepo Natani adavunza Batesheba mache Solomoni mbati, “Kadi mwapiva tayu kuti Adonia mwana Hagiti apipitisa yekha ene ufumu mwakukhonda dziwa Mfumu Davite?

¹²Dikhirani, ndikupangeni mule munakwanisa imwe kupulumusa moyo wa mwananu Solomoni.

¹³Ndokoni kunyumba ya Mfumu Davite mbamukampange kuti, ‘Mbuyanga mfumu, si imwe mudadumbira kuna ine, nyabasanu, kuti mwananga Solomoni anakhala mfumu imwe mungafa mbakhala pampando wanu wachifumu? Apo pyatani pontho kuti Adonia akhale mfumu?’

¹⁴Tenepo ine ndinapita m'nyumbamo uku ukulonga naye mbanditsikimizira pyalonga iwepyo.”

¹⁵Natenepo Batesheba adenda kaonana na mfumu kusubi kwache. Iye akhali wakukalamba pyakwanga, tenepo Abishagi wa Chishunemu akhakhala mwenemo kuyang'anira mfumu.

¹⁶Batesheba adalamba pamaso pa mfumu. Tenepo mfumu adamvunza mbati, “Ayi nkhwadidi kwene?”

¹⁷Mkazi ule adatawira mbati, “Mbuyanga mfumu, si imwe mudadumbira kuna ine, nyabasanu, tayu na dzina ya MBUYA Mulungu wanu kuti, ‘Solomoni mwanako anakhala mfumu ine ndingafa mbakhala pampando wanga wachifumu?’

¹⁸Mbwenye lero Adonia apita ufumu, kwache imwe mbuyanga mfumu nee mukupidziwa penepi tayu.

¹⁹Iye apereka nsembe ng'ombe zizinji, anamphulu akunenepa azinji na mabira ene. Iye pontho achemera ana onsene achimuna a mfumu, Abiatara nyansembe na Yoabu mkadamu wa anyankhondo, mbwenye iye hadachemere Solomoni mwananu tayu.

²⁰Mbuyanga mfumu, maso a Aisraele onsene ali pana imwe kufuna kudziwa kuti mbani anafuna dzakhala pampando wanu wachifumu m'mbuto mwanu.

²¹Mbwenye bibibi, sindzidzi imwe nkhugonera mkono, ine na mwananga Solomoni tinasanyiswa ninga mphandu.”

²²Mwenemo mbali m'kati kulonga na mfumu, Natani mprofeti adafika.

²³Tenepo iwo adapanga mfumu mbati, “Natani mprofeti ali pano.” Natenepo Natani adafedza chifupi mbalamba pamaso pa mfumu.

²⁴Natani adalonga mbati, “Mbuyanga mfumu, ayi mwalonga ndimwe kuti Adonia akhale mfumu imwe mungafa mbakhala pampando wanu wachifumu?

²⁵Lero ene ndzidzi unalonga inewu aenda kapereka nsembe ng'ombe zizinji, anamphulu akunenepa azinji na mabira ene. Iye achemera ana achimuna onsene a mfumu, Yoabu mkadamu wa anyankhondo,[1] na Abiatara nyansembe. Ndzidzi unalonga ine panowu, iwo akudya na kumwa pabodzi na iye pontho akulonga kuti: ‘Dondowe Mfumu Adonia!’

²⁶Mbwenye ine nyabasanu, Zadoki nyansembe, Benaia mwana Yehoiada na nyabasanu Solomoni hatidachemerwe tayu.

²⁷Kadi penepi ndiye pyachita imwe, mbuyanga mfumu, kukhonda na kudziwisa kwene mathubu anu kuti anafuna dzakhala pampando wanu wachifumu m'mbuto mwanu nguyu?”

²⁸Kubuluka penepo Mfumu Davite adalonga mbati, “Kachemere Batesheba apite muno.” Natenepo mkaziyo adadza mbaimira pamaso pa mfumu.

²⁹Tenepo mfumu adadumbira mbati, “Ine ndinadumbira na dzina ya MBUYA wa moyo, ule adandipulumusa panyatwa zanga zonsene,

³⁰kuti lero ndinati ndichite pidadumbira ine kuna iwe na dzina ya MBUYA Mulungu wa Israele, kuti mwanako Solomoni anakhala mfumu ine ndingafa pontho anakhala pampando wanga wachifumu m'mbuto mwanga.”

³¹Batesheba adagodama mbalamba pamaso pa mfumu mbalonga mbati, “Mbuyanga Mfumu Davite mbakhale na moyo kwenda na kwenda.”

³²Mfumu Davite adalonga mbati, “Chemera Zadoki nyansembe, Natani mprofeti na Benaia mwana Yehoiada kuti apite muno.” Pidadza iwo pamaso pa mfumu,

³³iye adalonga mbati, “Kwatani anyabasangawa pabodzi pene na imwe mbamukwizike mwananga Solomoni pabulu wanga ule, mbamumperekeze ku Gihoni.

³⁴Kweneko Zadoki nyansembe na Natani mprofeti amdzoze kukhala mfumu wa Israele. Tenepo lizani ngoma pontho khuwani kuti, ‘Dondowe Mfumu Solomoni.’

³⁵Mungamala penepo dzani naye kuno kuti akhale pampando wanga wachifumu pontho atonge m'mbuto mwanga. Ine ndamsankhula kuti atonge Israele na Yuda ene.”

³⁶Benaia mwana Yehoiada adatawira mfumu mbati, “Pinachitika. MBUYA Mulungu wa mbuyanga mfumu, mbapichitise kukwana-kwana penepi.

³⁷Ninga montho mudachitira MBUYA kukhala na mbuyanga mfumu, mbakhalembo na Solomoni kuchitisa ufumu wache kukhala ukulu kupiringana ufumu wa mbuyanga Mfumu Davite.”

³⁸Natenepo Zadoki nyansembe, Natani mprofeti, Benaia mwana Yehoiada, anyakulondali a Chikereti na Chipeleti adakwizika Solomoni pabulu wa Mfumu Davite mbamperekeza ku Gihoni.

³⁹Zadoki nyansembe adakwata ntchupa ya mafuta kubulukira m' Chikhumbi cha Mulungu mbadzoza nawo Solomoni. Kubuluka penepo adaliza ngoma, tenepo anthu onsene adakhuwa mbati, “Dondowe Mfumu Solomoni!”

⁴⁰Tenepo anthu onsene adamperekeza kwawo pamulikiti uku akuimba pitoliro na kusekera kukulu. Natenepo mataka adadidimuka na kukhuwa kwa anthu ale.

⁴¹Adonia pabodzi pene na anyakuchemerwa kuphwando onsene adava penepi pikhamalisa iwo phwando yawo ile. Pidava Yoabu mkadamu wa anyankhondo kulira kwa ngoma adavunza mbati, “Kadi kusokosa konsene kunaveka mumzindamu mkhwanji?”

⁴²Pikhalonga iye tenepo, Yonatani mwana Abiatara nyansembe adafika. Adonia adalonga mbati, “Pita muno, munthu wakulemedzwa ninga iwe athema kudza na mphangwa zadidi.”

⁴³Yonatani adatawira mbati, “Nkhabe na pang'ono pene tayu. Mbuyathu Mfumu Davite apitisa Solomoni ufumu.

⁴⁴Mfumu amtuma pabodzi pene na Zadoki nyansembe, Natani mprofeti, Benaia mwana Yehoiada, anyakulondali a Chikereti na Chipeleti, pontho iwo amkwizika pabulu wa mfumu,

⁴⁵pontho Zadoki nyansembe na Natani mprofeti adamdzoza pa Gihoni kukhala mfumu. Kubulukira kweneko adamperekeza kwawo uku akusekera, natenepo mzinda onsene watekenyeka. Kweneku nkhusokosa kunava imweku.

⁴⁶Kuthimiza penepa Solomoni akhala pampando wachifumu.

⁴⁷Pontho mathubu akulemedzwa adadza kudzachita makolokoto kuna mbuyathu Mfumu Davite, kulonga mbati, ‘Mulungu wanu mbachitise dzina ya Solomoni kuveka pikulu pene kupiringana yanu, pontho ufumu wache mbukhale ukulu pyakwanga kupiringana wanu!’ Tenepo Mfumu Davite adalamba uku ali patalimba pache

⁴⁸mbalonga mbati, ‘Mbalemedzwe MBUYA Mulungu wa Israele, ule anditawirisa lero kuona na maso anga nyakukhala pampando wanga wachifumu kupita m'mbuto mwanga.’ ”

⁴⁹Na thangwi ya penepi anyakuchemerwa kuphwando onsene ya Adonia adachita mantha mbabalalika pyawo.

⁵⁰Mbwenye Adonia na thangwi ya kuchita mantha na Solomoni, adenda ku Chikhumbi cha Mulungu mbakaphata nyanga za guwa yansembe.[2]

⁵¹Natenepo Solomoni adapangwa mbati, “Adonia akuchita mantha na mfumu, natenepo iye ali kakaka kunyanga za guwa yansembe. Iye alonga kuti, ‘Mbadumbire Mfumu Solomoni kuti lero hanandipha tayu na talasada ine nyabasache.’ ”

⁵²Solomoni adatawira mbati, “Ngakhala iye ndi munthu wakundilemedza podi na tsisi ene ya mumsolo mwache nkhabe dzagwa pansi tayu, mbwenye ngakhala anagumanwa kuti ngwakudawika anati afe.”

⁵³Natenepo Mfumu Solomoni adatuma amuna kweneko mbadza naye kumbulusa paguwa yansembepo. Adonia adadza mbalamba pamaso pa mfumu, tenepo mfumu adalonga kuna iye mbati, “Unakwanisa kwenda kumusa kwako.”