Read cisena 1 MAFUMU 10 Bible Online

1 MAFUMU 10 - cisena bible

1 MAFUMU 10

¹Mfumukazi wa ku Sheba adava mbiri ya Mfumu Solomoni malingana na dzina ya MBUYA, tenepo iye adenda ku Yerusalemu kamuyesa na mivunzo yakunensa.

²Iye adadza na mwinji ukulu wa anyabasache pabodzi pene na ngamila zakuthukula pyakukomesera muliwo, miyala yakudula na golidi mzinji ene. Pikhachedza iye na Solomoni, iye adamvunza mivunzo yonsene ikhali na iye kumtima kwache.

³Solomoni adatawira mivunzo yache yonsene ile; nkhabe mvunzo na ubodzi ene ukhali wakunensa kuna iye kuufuthula tayu.

⁴Mfumukazi wa ku Sheba adava nzeru za Solomoni mbaona nyumba yachifumu ikhadamanga iye.

⁵Iye adaona pyakudya pidaikhirwa iye pathebulu, nyumba zakugona mathubu ache, kudziwa basa kwa anyakuphata basa m'nyumbache yachifumu na pyakuvala pya pabasa pya mtundu ubodzi ene pikhavala iwo, pyakuvala pya anyabasa akhamtumikira pamaphwando ale, pontho na nsembe zidapereka iye m'Nyumba ya Mulungu. Pyonsene pidamchitisa mkazi ule kusowa chakulonga pontho kudodoma.

⁶Iye adalonga kuna Mfumu Solomoni mbati, “Pidava ine m'dziko mwanga pya imwe na nzeru zina imwe, mphyakuonadi!

⁷Kwache ine nee ndikhapikhulupira tayu kufikirana ndadza dzapiona ndekha ene na maso anga. Mphyakuonadi kuti pidapangwa inepyo nee theka pidakwana tayu; nzeru na mfuma pina imwepi pyapiringana pinthu pidava ine.

⁸Ngamwayi pyakwanga akazanu.[20] Ngamwayi pyakwanga anyabasanu, ale ndzidzi onsene ambakhala chifupi na imwe kuvesera mafalanu anzeru!

⁹Mbakuzwe MBUYA Mulungu wanu! Iye aonesa kuti ambakomerwa namwe pakukuchitisani kukhala mfumu kutonga na dzinache. Na thangwi yakuti MBUYA kumfuna kwache Israele nkhokhonda mala, iye akuchitisani kukhala mfumu kuti pakhale kukoya mwambo pontho chilungamo.”

¹⁰Kubuluka penepo mfumukazi ule, adapereka kuna Mfumu Solomoni mitukwa idadza na iye kuna Mfumu Solomoni: golidi wakulemera kupiringana makilogramu pikwi pinayi, pyakukomesera muliwo pizinji pontho na miyala yakudula. Pyakukomesera muliwo pidadza na mfumukazi wa ku Sheba ule, pikhali pizinji pyakwanga kupiringana pyonsene pidatambira iye m'ndulimu.

¹¹Miyadiya mikulu-mikulu ya Mfumu Hiramu idadza na golidi kubulukira ku Ofiri; pontho kubulukira kweneko adadza na mitolo yamphingwe na yamiyala yakudula.

¹²Solomoni adaphatisa basa miti ile kukhala nsanamira za Nyumba ya Mulungu na nyumba yachifumu, kusasanya anyakatangale na malimba pya anyakuimba. Kutomera penepo na lero miti yamphingweyi hidzati oneka pontho mu Israele penu kuchemereswa kubulukira kudziko inango tayu.

¹³Mfumu Solomoni adapereka kuna mfumukazi wa ku Sheba ule pyonsene pidapempha iye, kupambula mitukwa yonsene ikhadapereka iye kuna mkazi ule mwakufuna kwache. Kubuluka penepo mfumukazi ule pabodzi pene na anyabasache adabwerera kudziko ya Sheba.

¹⁴Chaka na chaka Mfumu Solomoni akhatambira golidi wakulemera makilogramu pikwi makumawiri na pitatu,

¹⁵kuthimizira pamsonkho ukhakhoma anyamalonda akufamba-famba, kobiri kubulukira kumalonda, pontho kobiri zakubulukira kuna mafumu onsene a Arabia, pontho na akulu a boma a m'nthemba ya Israele.

¹⁶Solomoni adasasanya pyakugedera matswimo pikulu-pikulu pyakukwana madzana mawiri, chonsene chidakukutizwa na golidi wakulemera makilogramu anomwe.

¹⁷Iye adasasanya pontho pyakugedera matswimo ping'ono-ping'ono madzana matatu chonsene chidakukutizwa na golidi wakulemera makilogramu awiri. Iye adaikha pyakugedera matswimo pyonsenepi m'Chinyumba chakuchemerwa Msitu wa Lebanoni.[21]

¹⁸Iye adasasanyisa pontho mpando wachifumu. Khundu ibodzi ya mpandowo idakukutizwa na nyanga za nzowu, pontho khundu inango yakusalirayo idakukutizwa na golidi chadi-chadi.

¹⁹Kafika pampandowo pakhali nsikada zitanthatu, wakukhala na mfanikizo wa nkhalamu pa nsikada yonsene, yonsene ikhalipo mifanikizo khumi na miwiri. Kunduli kwa mpandowo kukhali mfanikizo wa msolo wa ng'ombe imuna, pontho m'khundu mwa pyakutsamizira mikono pyonsene piwiri mukhali mfanikizo wa nkhalamu. Chipo nee padzati oneka mpando unango wachifumu ninga wenewu ufumu unango tayu.

²¹Makhomitcho onsene a Mfumu Solomoni akhali akusasanywa na golidi, pontho pyombo pyonsene pya m'Chinyumba cha Msitu wa Lebanoni pikhali pyakusasanywa na golidi chadi-chadi. Nee na chibodzi chene chidasasanywa na siliva tayu, thangwi pandzidzi wa Solomoni, siliva akhayeswa ninga ntchinthu chakukhonda funika.

²²Iye akhali pontho na miyadiya mikulu-mikulu yakufamba pa bara pabodzi pene na miyadiya ya Hiramu. Tenepo pachaka chachitatu chonsene miyadiyacheyo ikhabwerera, uku yathukula golidi na siliva, nyanga za nzowu, mabongwe na makolo.

²³Mfumu Solomoni akhali wakufuma pontho wanzeru pyakwanga kupiringana mafumu anango onsene,

²⁴tenepo anthu a padziko yonsene yapansi akhafuna kudza dzavesera nzeru zidampasa Mulungu zile.

²⁵Munthu onsene wakudza kuna iye, akhadza na mtukwache kuna iye; pinthu pyakusasanywa na siliva pontho golidi, mikhanjo, pyakukomesera muliwo, pontho akavalo na mabulu. Penepi pikhachitika chaka na chaka.

²⁶Solomoni akhali na pingolo pya nkhondo chikwi chibodzi na pinayi, pontho akavalo pikwi khumi na piwiri. Iye adapikoya pinango mu Yerusalemu, pontho pinango pyonsene adapiikha m'mizinda yakusiyana-siyana.

²⁷Pandzidzi ukhatonga Solomoni, siliva akhali nadza-nadza mu Yerusalemu ninga miyala, pontho miti yamkungudza ikhali dala-dala ninga miti enembo pyayo ya mkuyu yakumera m'tchinde mwa phiri ya Yuda.

²⁸Solomoni akhagula akavalo kubulukira kudziko ya Iguputo na Kue; anyamalonda a mfumu akhachita kuagula kubulukira ku Kue.

²⁹Iwo adagula pingolo na akavalo kubulukira kudziko ya Iguputo, chingolo chibodzi na kobiri zasiliva madzana matanthatu, pontho kavalo mbodzi na kobiri zasiliva dzana na makumashanu. Iwombo akhagulisa akavalo na pingolo pyankhondo kuna mafumu anango onsene Ahiti na Aaramu.