Read cisena 1 MAFUMU 11 Bible Online

1 MAFUMU 11 - cisena bible

1 MAFUMU 11

¹Solomoni adasemba akazi azinji achilendo, padzulu pa mwana wamkazi wa mfumu wa ku Iguputo. Iye adasemba akazi a Chihiti, akazi a ku Moabu, Amoni, Edomu na Sidoni.

²Iye adasemba akazi enewa podi kwene kuti MBUYA akhadalonga kuna Aisraele kuti aleke semberana nawo anthu enewa gopesera Aisraele anakwatika mbatoma kupembedza milungu yawo. Kwache Solomoni adaafuna pikulu akazi enewa.

³Solomoni adasemba ana achikazi a mafumu madzana manomwe pontho akhali na akazi achibitchu madzana matatu. Akazi enewa adamchitisa kuti abauke kubuluka kuna Mulungu.

⁴Natenepo pidakalamba iye iwo adamchitisa kupembedza milungu ya chilendo. Iye hakhalive wakukhulupirika kuna MBUYA Mulungu wache ninga mukhadachitira iye pakutoma tayu.

⁵Iye adapembedza Asitarite, milungu ya Asidoni, pontho Moleki milungu yakuchitisa manyadzo wa Aamoni.

⁶Iye adachita pyakuipa pamaso pa MBUYA, pontho hakhachitave pyakulungama pamaso pache ninga mukhachitira Davite babache tayu.

⁷Paphiri yakumabulukiro dzuwa kwa Yerusalemu adasasanyako mbuto yakupembedzerapo Kemoshi, milungu yakuchitisa manyadzo ya Amoabu, na mbuto yakupembedzerapo Moleki, milungu yakuchitisa manyadzo ya Aamoni.

⁸Iye adasasanya pontho mbuto zakupembedzerapo kuti akazache achilendo onsene akwanise kafukizako pyakununkhira na kupereka nsembe kuna milungu yawo.

⁹Podi kwene kuti MBUYA Mulungu wa Israele, akhadaonekera Solomoni kawiri mbampanga kuti aleke pembedza milungu inango yachilendo, Solomoni hadavere MBUYA tayu, mbwenye adabauka kubuluka kuna MBUYA. Tenepo MBUYA adazhangali naye,

¹¹mbalonga kuna iye mbati, “Na thangwi yakuti iwe wachita dala kuswa chiverano chasasanya ine na iwe mbukhonda kuvera matongero anga, ndinadumbira kuti ufumu ndinaubulusa pana iwe mbandiupereka kuna mbodzi wa mathubu ako.

¹²Kwache na thangwi ya Davite babako, ine sinachita penepi mbuli moyo tayu, mbwenye pandzidzi unafuna dzatonga mwanako.

¹³Kwache si kuti ndinampokosera ufumu onsenewo tayu; m'mbuto mwache ndinamsiyira dzinza ibodzi thangwi ya nyabasanga Davite, pontho thangwi ya Yerusalemu, mzinda wasankhula ine kukhala wanga ene ule.”

¹⁴Natenepo MBUYA adachitisa Hadadi wa m'banja yachifumu ya Edomu kupandukira Solomoni.

¹⁵Na kale ene penepi pidzati chitika tayu, pandzidzi udakunda Davite anthu a ku Edomu, Yoabu mkadamu wa anyankhondo ache akhadenda kweneko kukaikha anthu akufa m'masiye. Iye pabodzi pene na anthu ache adakhala mu Edomu miyezi mitanthatu, tenepo pandzidzi wenewo iwo adapha amuna onsene a mu Edomu,

¹⁷kupambula Hadadi na amuna anango a Chiedomu anyabasa a babache, ale akhadathawira ku Yerusalemu. Pandzidzi wenewo Hadadi akhali mphale.

¹⁸Iwo adabuluka ku Midiani mbaenda ku Parani. Kweneko amuna anango adapita m'gulu mwawo. Kubuluka penepo iwo adenda ku Iguputo mbafika kuna mfumu, mfumuyo adapereka mbuto, nyumba na phoso kuna Hadadi.

¹⁹Hadadi adasanduka shamwaliache mfumu wa Iguputo, tenepo mfumu adapereka Tapenesi kunyadoache, ule akhali mbaleache mfumukazi, kuna Hadadi kuti akhale mkazache.

²⁰Natenepo mkaziyo adambalira Hadadi mwana wamamuna dzinache Genubati, ule akhadalelwa na mfumukazi m'nyumba yachifumu, kule kukhakhala iye pabodzi pene na ana a mfumu.

²¹Pidava Hadadi uku mbali mu Iguputo kuti Davite adagonera mkono, pontho kuti Yoabu mkadamu wa anyankhondo adafambo, adalonga kuna mfumu mbati, “Nditawiriseni kubwerera kudziko ya kwathu.”

²²Mfumu adavunza mbati, “Watani unafuna kubwerera kudziko ya kwanu? Chasowa iwe pano ninji?” Hadadi adatawira mbati, “Nkhabe chasowa ine tayu, mbwenye nditawiriseni kwene kwenda kwathu.”

²³Mulungu adalamusa pontho nyamalwa unango kuti apandukire Solomoni. Munthu weneyu akhali Rezoni mwana wamamuna wa Eliada, ule akhadathawa pamaso pa mbuyache Hadadezere mfumu wa ku Zoba,

²⁴mbasanduka mkadamu wa gulu yakupandukira boma. Penepi pidachitika pandzidzi udakunda Davite Hadadezere mbapha amuna onsene a ku Zoba, ale akhadasasanya gulu ibodzi ya nkhondo. Rezoni na amunache adenda kakhala ku Damasiko, kule kudapitiswa iye na amunache kukhala mfumu wa Aramu. Iye akhali nyamalwa wa Israele ndzidzi onsene ukhali Solomoni na moyo.

²⁶Munthu unango ule adapandukira Mfumu Solomoni akhali Yeroboamu mwana Nebati wa ku Zereda mbodzi wa mathubu ache m'nthemba ya Eferemu. Mache akhali mamfelwa pontho dzinache akhali Zerua.

²⁷Mbiri yakupandukira ikhali tenepa: Solomoni akhandendemeza khundu yakumabulukiro dzuwa kwa Yerusalemu na kumanga pontho mbuto zakugomoka za mpanda wa mzinda wa babache Davitewo.

²⁸Yeroboamu akhali mphale wakudziwa basache, tenepo pidaona Solomoni kuti Yeroboamu akhaphata basa mwakuwangisa, adamuikha kukhala nyakuyang'anira anyakuphata basa mwakukhakhamizwa m'nthemba ya madzinza a Manase na Eferemu.

²⁹Pansiku inango pikhali Yeroboamu paulendo wakubulukira ku Yerusalemu, adagumanikana na mprofeti wa ku Shilo dzinache Ahia ule akhadavala mkhanjo utswa. Iwo akhali okha uwiriawo kuminda.

³⁰Ahia adadula mkhanjo utswa ukhadavala iye ule mbaung'amba mapindi khumi na mawiri,

³¹mbalonga kuna Yeroboamu mbati, “Kwata mapindi khumi kukhala ako, thangwi MBUYA Mulungu wa Israele, alonga kuna iwe kuti, ‘Yang'ana, ndinati ndipokose ufumu kuna Solomoni mbandiupereka kuna iwe madzinza khumi.

³²Solomoni anasala na dzinza ibodzi, thangwi ya nyabasanga Davite, pontho na thangwi ya Yerusalemu mzinda udasankhula ine kukhala wanga ule pakati pa dziko yonsene ya Israele.

³³Ine ndinati ndichite penepi thangwi Solomoni[22] andikhonda pontho apembedza milungu yachilendo: Asitarite, milungu ya Asidoni; Kemoshi, milungu ya Amoabu; na Moleki, milungu ya Aamoni. Solomoni hadandivere tayu; iye achita pinthu pyakudawika, pontho hadakoye mwambo na matongero anga tayu ninga mukhachitira Davite babache.

³⁴Kwache ine sinampokosera Solomoni ufumu onsene tayu, pontho ndinathimiza basi kumchitisa kukhala na utongi pandzidzi unakhala iye na moyo. Penepi ndinapichita thangwi ya nyabasanga Davite adasankhula ine mbavera mwambo na matongero anga ule.

³⁵Ufumuwu ndinaukwata kuna mwana Solomoni mbandikupasa madzinza khumi,

³⁶mbwenye mwana Solomoni ndinamtawirisa kusala na dzinza ibodzi, towera ndzidzi onsene chidzukulu cha nyabasanga Davite ndiye chitonge mu Yerusalemu, mzinda udasankhula ine kuti ndipembedzwemo ule.

³⁷Iwembo, Yeroboamu, ndinakuchitisa kukhala mfumu wa Israele, pontho unatonga m'nthemba zonsene zinafuna iwe.

³⁸Ngakhala unandivera monsene mwene mbukoya mwambo wanga pontho mbundichitisa kukomerwa nawe pakuchita pinakutonga ine ninga mudachitira nyabasanga Davite, ndzidzi onsene ndinakhala nawe. Ndinakuchitisa kukhala mfumu wa Israele, pontho ndinaonesesa kuti pidzukulu pyako ndiye pidzatonge iwe ungafa, ninga montho mwachitira ine na Davite.

³⁹Na thangwi ya kudawa kwa Solomoni ndinati nditchunyuse pidzukulu pya Davite, kwache si kwenda na kwenda tayu.’ ”

⁴⁰Natenepo Solomoni adayesa-yesa kupha Yeroboamu, mbwenye iye athawira kuna Mfumu Shishaki wa ku Iguputo mbakhala kweneko mpakana kufa kwa Solomoni.

⁴¹Pinango pyonsene pidachitika Solomoni mbali mfumu, pyonsene pidachita iye, pontho na nzeru zache pyalembwa m'bukhu ya mbiri ya Solomoni.

⁴²Iye akhali mfumu wa Israele onsene pyaka makumanayi.

⁴³Iye adagonera mkono mbaikhwa m'masiye a makolo ache mumzinda wa Davite, tenepo Rehoboamu mwanache adapita ufumu m'mbuto mwache.