Read cisena 1 MAFUMU 12 Bible Online

1 MAFUMU 12 - cisena bible

1 MAFUMU 12

¹Rehoboamu adenda ku Shekemu thangwi Aisraele onsene akhadenda kweneko kampitisa ufumu.

²Pidapiva Yeroboamu mwana Nebati, ule akhadenda ku Iguputo kuthawa Mfumu Solomoni, adabwerera kwawo[23]

³Anthu a kumadzinza akumpoto adachemeresa Yeroboamu, tenepo onsene pabodzi pene adenda kuna Rehoboamu mbalonga kuna iye mbati,

⁴“Babako adatichitira pyavinga mbatimangirira goli-goli yakulemera pyakwanga m'khosi mwathu. Natenepo ngakhala iwe unachepesa basa imbaphata ife mwavinga, pontho mbulupisa goli-goli ili m'khosi mwathuyi, if tinati tikutumikire.”

⁵Rehoboamu adatawira mbati, “Ndapiva, kwache banga ndokoni. Mbwenye pangagwanda nsiku zitatu mudze pontho.” Natenepo anthu ale adenda pyawo.

⁶Mfumu Rehoboamu adavunza nzeru kuna akulu-akulu, ale akhadatumikira babache Solomoni pandzidzi ukhali iye na moyo. Iye adavunza mbati, “Kadi penepa anthu ale angadza ndiatawire tani?”

⁷Akulu-akulu ale adatawira mbati, “Ngakhala iwe unafuna kuti iwo akutumikire pontho kukuvera, penepo iwe wathema kuachitira pinakupempha iwo lero. Apange kuti unachitisa basawo kukhala yakukhonda nensa.”

⁸Mbwenye Rehoboamu adakhonda kuvera pidampanga akulu-akulu pile mbavunza nzeru aphale anzache akhadakulirana iye pabodzi, pontho ale chinchino akhamtumikira.

⁹Iye adaavunza mbati, “Ndipangenimbo, ndiatawire tani anthu ale adandipempha kuti, ‘Tibulusire goli-goli m'khosi mwathu idatimangirira babakoyi?’ ”

¹⁰Aphale anzache ale adatawira mbati, “Iwe wathema kuapanga tenepa: ‘Chala changa ching'onochi ntchikulu manungo pyakwanga kupiringana chuno cha babanga!’

¹¹Apange kuti, ‘Babanga adakuthukulisani goli-goli yakulemera, mbwenye ine ndinaichitisa kukhala yakulemera pyakwanga. Babanga adakukwapulani na mitswamu, mbwenye ine ndinakumenyani na mbalamatodya.’ ”

¹²Pidagwanda nsiku zitatu Yeroboamu pabodzi pene na anthu onsene adenda pontho kuna Mfumu Rehoboamu ninga montho mukhadaapangira iye mule.

¹³Mfumu adatawira anthu ale mwaukali. Iye adakhonda kuvera nzeru zidampanga akulu-akulu zile,

¹⁴mbavera nzeru zidampanga aphale anzache zile mbalonga mbati, “Babanga adakuthukulisani goli-goli yakulemera, mbwenye ine ndinaichitisa kukhala yakulemera pyakwanga. Babanga adakukwapulani na mitswamu, mbwenye ine ndinakumenyani na mbalamatodya.”

¹⁵Natenepo hadaikhe konta tayu pyakulonga pya anthu, thangwi penepi pidachitika na kufuna kwa MBUYA kuchitisa mafala adalonga iye kuna Yeroboamu mwana Nebati kudzera muna mprofeti Ahia wa ku Shilo kukwana-kwana.

¹⁶Pidaona Aisraele onsene kuti mfumu akhonda kuikha konta pidalonga iwo pile, adakhuwa mbati, “Ayi Davite tili nayenji ife? Ayi muna mwana Yese tinagumanamonji? Aisraele tonsene tendeni pyathu m'misa mwathu. Mulekeni Rehoboamu apiyang'anire yekha ene.” Natenepo Aisraele adapandukira,

¹⁷mbamsiya Rehoboamu kukhala mfumu wa anthu akhakhala m'nthemba ya Yuda ene ale basi.

¹⁸Mfumu Rehoboamu adatumiza Adoniramu, ule akhali mkadamu wakuyang'anira basa yakuphatwa mwakukhakhamiza, kwenda kuna Aisraele, mbwenye Aisraele adamponyera miyala mbafa. Kwache Mfumu Rehoboamu adachimbiza kukwira chingolo chache mbathawira ku Yerusalemu.

¹⁹Natenepo dzinza ya Israele njakupandukira kuna banja ya Davite mpakana lero.

²⁰Pidava Aisraele kuti Yeroboamu akhadabwerera, adamtumira mphangwa kumchemeresa kumgumano, tenepo iwo adamuikha kukhala mfumu wa Israele. Mbwenye dzinza ya Yuda ene basi ndiye idasalira yakukhulupirika kuna banja ya Davite.

²¹Pidafika Rehoboamu mu Yerusalemu adachemeresa amuna a madzinza a Yuda na Benjemani. Onsene pabodzi pene akhalipo pikwi dzana na makumasere kuti akamenye nkhondo na Aisraele, towera ufumuwo ubwerere kuna Rehoboamu mwana Solomoni.

²²Mbwenye Mulungu adapanga Shemaia, munthu wa Mulungu,

²³kulonga kuna Rehoboamu mwana Solomoni mfumu wa Yuda na kuna dzinza yonsene ya Yuda na Benjemani pontho na kuna anthu onsene kuti,

²⁴“Pyalonga MBUYA mphipi: Lekani kwenda kamenyana na abale anu Aisraele. Monsene ndokoni m'misa, thangwi penepi pyachitika na kufuna kwanga.” Natenepo iwo adavera mafala a MBUYA mbabwerera kumisa kwawo, ninga montho mukhadaapangira MBUYA.

²⁵Mfumu Yeroboamu wa Israele adamanga pontho Shekemu, luwani m'dziko ya mapiri ya Eferemu mbakhala kweneko ndzidzi pang'ono basi. Kubuluka penepo adamanga pontho luwani ya Penuele.

²⁶Iye adalonga yekha ene mbati, “Ninga mwakhalira pinthu chinchinomu, ngakhala anthu anga anaenda ku Yerusalemu mbakapereka nsembe kweneko kuna MBUYA, m'Nyumba ya Mulungu, anati abuluse mtimawo pana ine mbazungunukira kuna Mfumu Rehoboamu wa Yuda, tenepo iwo anandipha.”

²⁸Pidamala iye vunza nzeru kuna mapungu ache, mfumuyo adasasanya na golidi mfanikizo wa ng'ombe zimuna ziwiri. Iye adalonga kuna anthu mbati, “Ntchinthu chakutopesa pyakwanga kuti imwe muende kafika ku Yerusalemu. Aisraele monsene yang'anani milungu yanu njishi, ile idakutsogolerani kubuluka m'dziko ya Iguputo.”

²⁹Mfanikizo wa mwanamphulu mbodzi adauikha mu Betele, unangombo adauikha mu Dani.

³⁰Tenepo chinthu chidachitikachi chidasanduka pyakudawa; anthu akhaenda mpakana ku Dani kapembedza chinthu chidaimiswa chile.

³¹Yeroboamu adamanga nyumba zizinji pambuto zakupembedzerapo mbasankhula anyansembe kubulukira kuna anthu akusiyana-siyana, podi kwene kuti iwo hadabulukire m'banja ya unyansembe ya Levi tayu.

³²Mfumu Yeroboamu adakhazikisa phwando pansiku yakhumi na chishanu ya mwezi wachisere, ninga phwando idachitika mu Yuda ile mbapereka nsembe paguwa yansembe. Penepi adapichita mu Betele kupereka nsembe kuna pinthu pyakusemwa pidasasanya iye pile. Iye adaikha anyansembe mu Betele m'mbuto zakupembedzerapo zikhadasasanya iye zile.

³³Pansiku yakhumi na chishanu ya mwezi wachisere, mwezi udasankhula iye yekha ene ule, adapereka nsembe paguwa yansembe ikhadamanga iye mu Betele ile. Natenepo iye adakhazikisa phwando kuti Aisraele aichite mbaenda paguwa yansembe kapereka nsembe.