Read cisena 1 MAFUMU 13 Bible Online

1 MAFUMU 13 - cisena bible

1 MAFUMU 13

¹Na kupangwa na MBUYA munthu wa Mulungu adadza ku Betele kubulukira ku Yuda pandzidzi ukhaimira Yeroboamu chifupi na guwa yansembe kupereka nsembe.

²Iye adakhuwa pikulu kupokanyisana na guwa yansembe mbalonga mafala akubulukira kuna MBUYA mbati, “Guwa yansembe! Guwa yansembe! Pyalonga MBUYA mphipi: mwana wamamuna dzinache Yosia anati abalwe m'banja ya Davite. Iye anapereka nsembe pana iwe anyansembe onsene akukhala m'mbuto zakupembedzerapo milungu, ale anapereka nsembe panowa, pontho magogodo a anthu anati apiswe pana iwe.”

³Pansiku yeneyo munthu wa Mulungu adapereka chidzindikiro mbalonga mbati, “Chidzindikiro chalonga MBUYA kuti chinachitika ntchichi: guwa yansembeyo inati ididimuke kati na kati, pontho madothache anati akhuthukire pansi.”

⁴Pidava Mfumu Yeroboamu pidalonga munthu wa Mulungu mwakupokanyisana na guwa yansembe ya pa Betele, adafuthulira dzanjache kubulukira pa guwa yansembe pale mbalonga mbati, “Mphateni!” Kwache dzanja ikhadafuthula iye ile kuthonya nayo munthu wa Mulungu, idalamaliratu mwakuti adachimwana kuibweza.

⁵Guwambo yansembe idadidimuka kati na kati, pontho dotha idakhuthukira pansi malingana na chidzindikiro chikhadapereka munthu wa Mulungu chile kuteweza mafala a MBUYA.

⁶Tenepo mfumu adalonga kuna munthu wa Mulungu ule mbati, “Ndipemphererembo kuna MBUYA Mulungu wako kuti dzanjanga ikhale ninga montho mwakale.” Natenepo munthu wa Mulungu ule adampempherera kuna MBUYA, tenepo dzanja ya mfumu idabwerera mbikhala ninga montho mwakale.

⁷Tenepo mfumu adalonga kuna munthu wa Mulungu ule mbati, “Tende pabodzi pene kumusa kwanga kuti ndikakupase pyakudya mbandikakupasa mfupo.”

⁸Mbwenye munthu wa Mulungu ule adatawira mbati, “Podi kwene kuti mbudandipasa pyako theka ya pinthu pyako ine nee mbidatawira tayu basi kwenda nawe kumusa kwako, penu kadya, penu kamwa chinthu na chibodzi chene.

⁹Thangwi MBUYA adandipanga mbati, ‘Leka kadya penu kamwa chinthu na chibodzi chene, penu kubwerera na njira yontho idapita na iwe ile.’ ”

¹⁰Natenepo iye adenda na njira inango mbakhonda kubwerera na njira yontho ikhadapita na iye kwenda ku Betele ile tayu.

¹¹Pakhali mprofeti wakukalamba ule akhakhala ku Betele. Anache[24] akhali na anthu kweneko ale, adadza dzampanga babawo pyonsene pidachita munthu wa Mulungu nsiku yeneyo. Iwo adampanga pontho babawo pinthu pidalonga munthu ule kuna mfumu.

¹²Babawo adavunza mbati, “Aenda na njira ipi?” Ana ale adamthonyeza[25] njira ikhadakwata munthu wa Mulungu wakubulukira ku Yuda ule.

¹³Natenepo iye adalonga kuna anache ale mbati, “Ndiikhireni chakukhalira pabulu pangapo.” Pidamuikhira anawo chakukhalira pabulupo, iye adapakirapo

¹⁴mbathamangira munthu wa Mulungu ule. Iye adamgumana ali khale pansi pa muti wamthundu mbavunza mbati, “Ayi munthu wa Mulungu akhadakubulukira ku Yuda ule ndiwepo?” Iye adatawira mbati, “Ande, ndine pano.”

¹⁵Natenepo mprofeti ule adalonga kuna iye mbati, “Tende pabodzi pene kumusa kwanga ukadye.”

¹⁶Munthu wa Mulungu wa ku Yuda ule adatawira mbati, “Ine nkhabe bwerera m'nduli pabodzi pene nawe, penu kadya penu kamwa pabodzi pene na iwe pambuto pano tayu.

¹⁷Ine ndapangwa na MBUYA kuti, ‘Leka kadya penu kumwa kweneko penu kubwerera na njira yonthoyo idadza na iweyo.’ ”

¹⁸Mprofeti wakukalamba wa ku Betele ule adatawira mbati, “Inembo ndine mprofeti ninga iwepo. Mngelo adadza kuna ine na mphangwa zakubulukira kuna MBUYA zakuti, ‘Ndoko ukambweze mbudze naye pabodzi kumusa kwako towera adye mkate na kumwa madzi.’ ” Kwache iye akhamnamiza.

¹⁹Natenepo munthu wa Mulungu wa ku Yuda adabwerera pabodzi na mprofeti ule mbakadya na kumwa m'nyumba mwache.

²⁰Pikhali iwo pathebulu pale, MBUYA adalonga kuna mprofeti wakukalamba akhadabweza munthu wa Mulungu ule.

²¹Iye adakhuwa kuna munthu wa Mulungu wa ku Yuda ule mbati, “Pyalonga MBUYA mphipi: ‘Iwe wakhonda kuvera MBUYA pontho hudakoye matongero adakupasa MBUYA Mulungu wako tayu.

²²Iwe udabwerera mbudya na kumwa pambuto idapangwa iwe kuti uleke kudya penu kumwa. Natenepo mtembo wako nkhabe ikhwa m'masiye a makolo ako tayu.’ ”

²³Pidamala munthu wa Mulungu ule kudya na kumwa, mprofeti akhadambweza ule adakwata chakukhalira mbachimangirira pabulu kuti munthu wa Mulungu ule apakirepo.

²⁴Pikhaenda munthu wa Mulungu ule, nkhalamu idagumanikana naye panjira mbimpha, tenepo mtembo wache udaponywa mumsewu uku bulu wache na nkhalamu pikhali dzololo m'khundu mwachemo.

²⁵Anthu anango ale akhagwanda kwene pyawo adaona mtembowo uli gwenjere penepo, uku nkhalamu yaimira m'khundu mwache. Tenepo iwo adenda kapilonga mumzinda mukhakhala mprofeti wakukalamba ule.

²⁶Pidava mprofeti akhadambweza paulendo wache ule penepi, adalonga mbati, “Weneyo ndi munthu wa Mulungu, ule adakhonda kuvera mafala a MBUYA, natenepo MBUYA ampereka kuna nkhalamu, ile idamphata mbimpha ninga montho mukhadamcheuzira MBUYA.”

²⁷Mprofeti ule adalonga kuna anache mbati, “Ndimangirirenimbo chakukhalira pabulupo.” Iwo adachitadi tenepo.

²⁸Iye adalamuka kwenda mbakagumana mtembowo uli gwenjere mumsewu uku bulu na nkhalamu pyaimira m'khundu mwachemo. Nkhalamuyo hidadye mtembowo penu kukuwaza bulu ule tayu.

²⁹Natenepo mprofeti ule adathukula mtembo wa munthu wa Mulungu ule mbabwerera nawo mumzinda kukhakhala iye kule, towera akamulire mbamuikha m'masiye.

³⁰Kubuluka penepo iye adaikha mtembowo m'masiye ache ene, tenepo iwo adamulira mbati, “Mama ine, mbaleanga!”

³¹Pidamala iwo kumuikha m'masiye, mprofeti ule adalonga kuna anache mbati, “Ndingafa, dzandiikheni m'masiye aikhwa munthu wa Mulunguyi; magogodo anga agone chifupi na magogodo ache.

³²Thangwi mphangwa zidalonga iye kubulukira kuna MBUYA zakupokanyisana na guwa yansembe mu Betele, pontho nyumba za pambuto zakupembedzerapo mumzinda wa Samaria pinachitikadi.”

³³Podi kwene kuti pinthu penepi pidachitika Yeroboamu hadaleke makhaliro ache akuipa tayu, mbwenye adathimiza basi kusankhula anyansembe kuphata basa m'mbuto zakupembedzerapo kubulukira kuna anthu akusiyana-siyana. Munthu onsene wakufuna unyansembe akhamchitisa kukhala wakupambulika kuphata basa m'mbuto zakupembedzerapo.

³⁴Kweneko ndiye kukhali kudawa kwa Yeroboamu, kule kudachitisa banjache na ufumu wache kugwa na kuvungika.