Read cisena 1 MAFUMU 15 Bible Online

1 MAFUMU 15 - cisena bible

1 MAFUMU 15

¹Chaka chachikhumi na chisere Yeroboamu mwana Nebati mbali mfumu wa Israele, Abia adapita ufumu wa Yuda

²mbatonga pyaka pitatu mu Yerusalemu. Mache akhali Maaka mwana wamkazi wa Abisalomu.

³Iye adachita pontho pyakudawa ninga pyontho pikhachita babache. Iye hadapereke mtimache onsene kuna MBUYA Mulungu ninga mudachitira kholo yache Davite tayu.

⁴Kwache na thangwi ya Davite, MBUYA Mulungu wache adapereka kuna Abia mwana wamamuna kupita m'mbuto mwache iye angafa, towera atonge Yerusalemu na kuutchinjiriza mwadidi.

⁵MBUYA adachita penepi thangwi Davite adachita pyakumkomera, pontho nkhabe matongero na abodzi ene adakhonda iye vera tayu, kupambula pidachita iye kuna Uria Mhiti.

⁶Nkhondo ile idatoma pakati pa Rehoboamu na Yeroboamu idathimiza kumenyeka mpakana moyo onsene wa Abia.

⁷Pinango pyonsene pidachitika Abia mbali mfumu na pyonsene pidachita iye pyalembwa m'bukhu ya mbiri ya mafumu a Yuda. Pakhali nkhondo pakati pa Abia na Yeroboamu.

⁸Abia adagonera mkono mbaikhwa m'masiye a makolo ache mumzinda wa Davite. Tenepo mwanache Asa adapita ufumu m'mbuto mwache.

⁹Chaka chamakumawiri, Mfumu Yeroboamu mwana Nebati mbali mfumu wa Israele, Asa adapita ufumu wa Yuda

¹⁰mbatonga pyaka makumanayi na chibodzi mu Yerusalemu. Mbuyache akhali Maaka mwana wamkazi wa Abisalomu.

¹¹Asa adachita pyakukomera MBUYA ninga montho mukhadachita kholo yache Davite.

¹²Iye adabulusa akazi na amuna ale akhaphata basa yauputa m'mbuto zakupembedzeramo milungu. Iye adabulusa pontho m'dzikomo mifanikizo yonsene yakusasanywa na makolo ache.

¹³Iye adabulusa pa chidzo chache cha ufumukazi mbuyache wamkazi Maaka, thangwi iye adachita chinthu chakudawika chikulu pakusasanya mfanikizo wa milungu Ashera. Asa adagwisa mfanikizo ule mbamala kuupandula, tenepo adaupisa moto m'phedi ya Kidroni.

¹⁴Podi kwene kuti Asa hadavunge mbuto zonsene zakupembedzerapo milungu tayu, iye adathimiza basi kukhala wakukhulupirika pamaso pa MBUYA moyo wache onsene.

¹⁵Iye adaikha m'Nyumba ya Mulungu pinthu pyonsene pidapambulira babache kuna Mulungu pabodzi pene na pyombo pyagolidi na siliva pidapambulirambo iye mwenechiro kuna Mulungu.

¹⁶Pakhali nkhondo pakati pa Mfumu Asa wa Yuda na Baasha mfumu wa Israele ndzidzi onsene wa kutonga kwawo.

¹⁷Baasha mfumu wa Israele adachita nkhondo na Yuda mbamanga mpanda kuzungulira Rama kukhondesa anthu kupita penu kubuluka mu Yuda.

¹⁸Tenepo Asa adakwata siliva na golidi onsene akhadasalira m'Nyumba ya Mulungu, pontho m'nyumba ya chifumu ule mbapitumira mathubu ache anango kwenda napyo kuna Damasiko kuna Mfumu Beni-Hadadi mfumu wa Aaramu mwana Tabirimoni, mdzukuluache Hezioni na mphangwa zakuti:

¹⁹“Mbapakhale ushamwali pakati pa iwe na ine ninga mukhali ipyo pakati pa babanga na babako. Yang'ana, ndinatumiza kuna iwe siliva na golidi. Natenepo malisa ushamwaliako na Baasha mfumu wa ku Israele, towera iye aleke kumenyana nane.”

²⁰Beni-Hadadi adaphatizana na manyerezero a Mfumu Asa wa Yuda ale. Tenepo iye adatuma akadamu ankhondo na anyankhondo awo kachita nkhondo m'maluwani a Israele. Iwo adakunda Iyoni, Dani, Abele-Beti-Maaka, na nthemba ya chifupi na Nyanza ya Galilea, kuthimizapo nthemba yonsene ya Nafitali.

²¹Pidava Baasha pidachitika pile, adaleka kumanga mpanda kuzungulira Rama mbaenda ku Tiriza.

²²Tenepo Mfumu Asa adatonga anthu onsene a Yuda, nee kupambulapo unango tayu kuti aende kathukula miyala na matabwa pikhaphatisa basa Baasha kumangira Rama pile. Mfumu Asa adaphatisambo basa pyonthopyo kumangira Geba m'nthemba ya Benjemani pontho na Mizipa.

²³Pinango pyonsene pidachitika Asa mbali mfumu, na pyonsene pidachita iye mwakuwanga mtima, pontho na maluwani adamanga iye pyalembwa m'bukhu ya mbiri ya mafumu a Yuda. Mbwenye dzinyalo yache idalamala mbali nkhalamba.

²⁴Asa adagonera mkono mbaikhwa m'masiye a makolo ache mumzinda wa Davite. Tenepo mwanache Yehosafati adapita ufumu m'mbuto mwache.

²⁵Chaka chachiwiri, Asa mbali mfumu wa Yuda, Nadabu mwana Yeroboamu adapita ufumu wa Israele mbatonga pyaka piwiri.

²⁶Ninga mudachitira babache, iyembo adachita pyakuipa pamaso pa MBUYA mbatsogolera Aisraele kuchita pyakudawa.

²⁷Baasha mwana Ahia wa dzinza ya Isakara, adasasanya pyakupha Nadabu, tenepo adampha pa Gibetoni, luwani ya Afilisti, pandzidzi ukhaizungulira Nadabu na anyankhondo ache onsene kamenyana nayo.

²⁸Baasha adapha Nadabu chaka chachitatu Asa mbali mfumu wa Yuda. Tenepo Baasha adapita ufumu m'mbuto mwache.

²⁹Sindzidzi iye nkhutoma kutonga, adapha banja yonsene ya Yeroboamu. Iye hadasiye na moyo munthu na mbodzi ene wa m'banja ya Yeroboamu tayu, mbwenye onsene adamaliratu kuavunga ninga montho mudalongera MBUYA kudzera muna nyabasache Ahia wa ku Shilo.

³⁰Penepi pidachitika thangwi Yeroboamu adalamusa ukali wa MBUYA Mulungu wa Israele, na kudawa kwache pontho kuti iye adachitisa Aisraele onsene kudawambo.

³¹Pinango pyonsene pidachitika Nadabu mbali mfumu na pyonsene pidachita iye pyalembwa m'bukhu ya mbiri ya mafumu a Israele.

³²Pakati pa Asa mfumu wa Yuda na Baasha mfumu wa Israele pakhali nkhondo ndzidzi onsene wa kutonga kwawo.

³³Chaka chachitatu Asa mbali mfumu wa Yuda, Baasha adapita ufumu wa Israele. Iye adatonga pyaka makumawiri na pinayi mbakhala mu Tiriza.

³⁴Ninga mudachitira Mfumu Yeroboamu, iye adachita pyakuipa pamaso pa MBUYA mbachitisa Aisraele onsene kuchita pyakudawa.