Read cisena 1 MAFUMU 17 Bible Online

1 MAFUMU 17 - cisena bible

1 MAFUMU 17

¹Mprofeti unango dzinache Elia wa Chitishibi m'nthemba ya Gileadi adalonga kuna Mfumu Ahabu mbati, “Ndinadumbira na dzina ya MBUYA, Mulungu wamoyo wa Israele, ambatumikira ine ule, kuti pyaka piwiri penu pitatu pinadzapi nee panakhala mvula penu bume tayu kufikirana nditonge kuti pigwe.”

²Tenepo MBUYA adalonga kuna Elia mbati,

³“Buluka pambuto pano mbuende kumabulukiro dzuwa mbukabisale kweneko chifupi na mkulo wa Keriti, ule uli kumabulukiro dzuwa a Yorodani.

⁴Mkulo wenewo unakupasa madzi akumwa pontho ndatonga makhungubwe kuti adze kuti akupase pyakudya kweneko.”

⁵Elia adavera pidampanga MBUYA mbaenda kakhala kumkulo wa Keriti kumabulukiro dzuwa a mkulo wa Yorodani.

⁶Tenepo iye akhamwa mumkulo mule, makhungubwembo akhamdzesera mikate pontho nyama machibese na mawulo onsene.

⁷Pidagwanda ndzidzi ene mkulo ule udauma thangwi ya kusowa kwa mvula.

⁸Kubuluka penepo MBUYA adalonga kuna Elia mbati,

⁹“Lamuka kabodzi kene mbuende kuluwani ya Zarefati chifupi na Sidoni mbukakhale kweneko. Ine ndatonga mamfelwa, ule ambakhala mwenemo kakudyesa.”

¹⁰Natenepo Elia adenda ku Zarefati; pikhadza iye chifupi na msuwo wa luwani ile adaona mamfelwa akulokotera nkhuni. Iye adalonga kuna mkaziyo mbati, “Ngandipasembo madzi akumwa.”

¹¹Tenepo pikhaenda mkazi ule katunga madzi akumwa, Elia adakhuwa mbati, “Ngandipase pontho mikate pang'ono.”

¹²Mkazi ule adatawira mbati, “Ine ndinadumbira pamaso pa MBUYA Mulungu wanu wa moyo kuti nkhabe mkate na ubodzi ene tayu. Pina ine m'thenthe mphiufa pang'ono pyakukwana kwene m'manjamu basi na dontho ibodzi ya mafuta m'buyawo. Ine ndadza kuno kuti ndilokotere nkhuni kwenda nazo kumusa kuti ndikaphike pyakuchepa pina inepyo, towera ine na mwananga tidye mbatifa pyathu na njala thangwi mphyakudya pyakumalisa.”

¹³Elia adalonga kuna mkaziyo mbati, “Leka swipa mtima, ndoko kasasanye pyakudya pyaako, kwache chakutoma ndisasanyire kamkate mbudze nako kuna ine kuno. Kubuluka penepo uphike pyakusalapyo kuti mudye iwe na mwanako.

¹⁴Thangwi MBUYA Mulungu wa Israele alonga kuti, ‘Ufa nkhabe dzamala tayu m'thenthe, pontho mafuta nkhabe dzamala tayu m'buyawo kufikirana nsiku inafuna MBUYA dzavumbisa mvula m'dziko muno.’ ”

¹⁵Kubuluka penepo mkazi ule adenda mbakachita pidampanga Elia pile, tenepo onsene utatuawo akhali na phoso yakukwana kudya nsiku zizinji.

¹⁶Ninga montho mukhadalongera MBUYA kudzera muna Elia, ufa hudamaledi tayu m'thenthe mule, pontho mafuta hadamalemo tayu m'buyawo mule.

¹⁷Pidagwanda ndzidzi ene mwana mamfelwa ule adafeluka, tenepo kufeluka kule kudanyanya pakumalisira pache mbafa.

¹⁸Mkaziyo adalonga kuna Elia mbati, “Imwe munthu wa Mulungu mphyanji pyachita imwe kuna inepi? Ayi mwadza kuno dzabulusa pakwecha kudawa kwanga mbamuchitisa mwananga kufa?”

¹⁹Elia adalonga mbati, “Ndipase kuno mwanakoyo.” Iye adathukula mwanayo m'manja mwache mbaenda naye kusubi yapadzulu kukhakhala iye kule mbamgonesa patalimba.

²⁰Iye adalira mwakugaluza fala mbati, “MBUYA Mulungu wanga, thangwi yache ninji mwachita pinthu pyakugoswapi kuna mamfelwayi. Iye ngwakukoma mtima pyakwanga mwakuti akundidyesa, apo lero mukumphera basi mwanache?”

²¹Tenepo Elia adapumira mwana ule katatu mbapemphera mbati, “MBUYA Mulungu wanga bwezerani moyo wa mwanayi.”

²²MBUYA adava kulira kwa Elia; mwanayo adatoma pontho kupuma mbakhala pyadidi.

²³Elia adakwata mwanayo kutchitha naye pansi mbambwezera kuna mache mbalonga mbati, “Ngayang'ana mwanako ana moyo.”

²⁴Mkaziyo adatawira mbati, “Chinchino ndapidziwadi kuti ndimwe munthu wa Mulungu, pontho kuti MBUYA ambalongadi kudzera muna imwe!”