Read cisena 1 MAFUMU 18 Bible Online

1 MAFUMU 18 - cisena bible

1 MAFUMU 18

¹Pidagwanda ndzidzi ukulu ene chaka chachitatu cha njala ikulu, MBUYA adalonga kuna Elia mbati, “Ndoko ukaonekere pamaso pa Mfumu Ahabu, tenepo ine ndinavumbisa mvula m'dzikomo.”

²Tenepo Elia adautoma ulendo wakwenda kuna Mfumu Ahabu. Njala mu Samaria idafika pakundendeya,

³natenepo Ahabu adachemeresa Obadia, ule akhali nyakuyang'anira nyumba yachifumu. Obadia akhali munthu wakupipereka kupembedza MBUYA,

⁴pontho pandzidzi udapha Yezebele maprofeti a MBUYA, Obadia adakwata maprofeti dzana mbaabisa kunkhwimba ziwiri, anthu makumashanu kada nkhwimba, mbaapasa pyakudya na madzi.

⁵Ahabu adalonga kuna Obadia mbati, “Tende tikayang'ane[26] mphuno za madzi na m'maphedi monsene, tikaone ngakhala tinagumanamo maudzu akukwana kudyesa akavalo na mabulu athu towera aleke kufa. Mwinango tinakwanisa kupulumusa nyama zathu zonsene.”

⁶Tenepo iwo adaphatizana makhundu a dziko adathema iwo kufambira; Ahabu adendera kukhundu kwache, Obadia kukhundu inango.

⁷Pikhali Obadia panjira, Elia adagumanikana naye. Obadia adamdzindikira mbalamba pamaso pache mbalonga mbati, “Ayi ndimwedi Elia mbuyanga ule?”

⁸Iye adatawira mbati, “Ande, ndine pano. Ndoko kampange mbuyako mfumu kuti Elia ali kuno.”

⁹Obadia adatawira mbati, “Kadi ine ndadawanji kuti imwe mupereke nyabasanune m'manja mwa Ahabu kuti andiphe?

¹⁰Ndinadumbira na dzina ya MBUYA Mulungu wanu wamoyo kuti nkhabe nthemba penu dziko yasiya mfumu okhonda tumizako munthu kakusaka-sakani tayu. Tenepo ndzidzi onsene nthemba penu dziko ingalonga kuti hidakuoneni tayu, Mfumu Ahabu akhaadumbirisa ngakhala mphyakuonadi kuti hidakuoneni tayu.

¹¹Apo lero mukundipanga kuti ndiende kuna mbuyanga kampanga kuti, ‘Elia ali kuno?’

¹²Kunafuna kukuendesani Mzimu wa MBUYA ine sinadziwako tayu ine ndingakusiyani pano. Tenepo ngakhala ine ndinaenda kuna Ahabu kampanga mbakhonda kukugumanani pano, iye anati andiphe. Kwache ine nyabasanu ndimbapembedza MBUYA kutomera uphaleanga.

¹³Ayi imwe mbuyanga mudapive tayu pidachita ine ndzidzi ukhapha Yezebele maprofeti a MBUYA? Ine ndidabisa maprofeti a MBUYA dzana kunkhwimba ziwiri, anthu makumashanu kada nkhwimba, mbandiapasa pyakudya na madzi?

¹⁴Tenepo lero mukundipanga kuti ndiende kuna mfumu kalonga kuti, ‘Elia ali kuno.’ Iye anati andiphe!”

¹⁵Elia adalonga mbati, “Ndinadumbira na dzina ya MBUYA Wamphamvu zonsene ambatumikira ine ule kuti, ‘Lero ndinati ndikaonekere pamaso pa Ahabu.’ ”

¹⁶Natenepo Obadia adenda kaonana na Mfumu Ahabu mbampanga pya Elia, tenepo Ahabu adenda kagumanikana naye.

¹⁷Pidaona Ahabu Elia, adalonga mbati, “Ayi iwe ndiwe Elia nyakuonesa nyatwa Israele ule?”

¹⁸Elia adatawira mbati, “Ine sidaonesa nyatwa Israele tayu; mbwenye imwe na banjanu ndiye mwaonesa nyatwa Israele. Imwe mwakhonda kuvera matongero a MBUYA mbamupembedza milungu Baala.

¹⁹Natenepo chemeresani anthu a kunthemba zonsene za Israele kuti akagumanikane nane paphiri ya Karimele. Pontho mudze na maprofeti a Baala madzana manayi na makumashanu, pontho maprofeti madzana manayi a milungu Ashera, ambadya pathebulu ya Yezebele ale.”

²⁰Natenepo Ahabu adatumiza mphangwa mu Israele monsene kuti maprofeti onsene agumanyikane paphiri ya Karimele.

²¹Elia adenda pamaso pa anthu mbalonga mbati, “Kadi imwe munaleka lini kupenuka-penuka? Ngakhala MBUYA ndi Mulungu mtewereni; mbwenye ngakhala Baala ndiye mulungu mtewereni.” Mbwenye anthu hadalonge chinthu na chibodzi chene tayu.

²²Tenepo Elia adalonga kuna iwo mbati, “Mprofeti wa MBUYA asala ndine ene basi, mbwenye Baala ana maprofeti madzana manayi na makumashanu.

²³Tidzesereni ng'ombe zimuna ziwiri. Apaseni mwayi wakusankhula ng'ombe inafuna iwo, pontho aigwande-gwande m'mapindi mbaiikha pankhuni, kwache aleke phatisapo moto wakuotchera nyamayo. Ine ndinapha ng'ombe inangoyo mbandisanjika pankhuni mbandikhonda phatisapo moto.

²⁴Kubuluka penepo maprofeti a Baala apemphere kuna milungu yawo, inembo ndinati ndipemphere kuna MBUYA, tenepo ule anafuna kutawira pakutumiza moto, weneyo ndiye Mulungu.” Anthu onsene adalonga mbati, “Pyalonga iwepi mphyadidi.”

²⁵Elia adalonga kuna maprofeti a Baala mbati, “Sankhulani ng'ombe inafuna imwe mbamutome ndimwe kupha na kuisasanya thangwi mulipo azinji. Mungamala penepo mupemphere kuna milungu yanu, kwache lekani phatisapo moto.”

²⁶Natenepo iwo adakwata ng'ombe mbaipha kuisasanya mwadidi. Kubuluka penepo iwo adapemphera kuna Baala, milungu yawo, kutomera machibese mpakana masikati mbakhuwa mbati, “Baala! Ngatitawirembo ife.” Mbwenye kukhali lukutu noo, nee mbodzi adatawira tayu. Iwo adavina-vina mwakuzungulira guwa yansembe idasasanya iwo ile.

²⁷Tenepo na masikati Elia adatoma kuasedegula mbati, “Wangisani kukhuwako! Iye ndi milungu! Mwinango akunyerezera pinthu pinango, penu akupambuka, penu ali paulendo. Mwinango ali m'chitulo, tenepo athema kulamuswa.”

²⁸Natenepo iwo adakhuwa mwakugaluza fala mbapicheka-cheka na matalasada pontho madipa ninga mwa mtemo wawo mpakana chiropa kubuluka.

²⁹Masikati a nsiku yeneyo adagwanda, tenepo iwo adathimiza basi kubwebweta kufikirana ndzidzi wakupereka nsembe na mawulo. Kwache kukhali lukutu noo basi, nee mbodzi adatawira tayu, nee mbodzi adaiikha konta tayu.

³⁰Kubuluka penepo Elia adalonga kuna anthu onsene ale mbati, “Bwerani kuna ine kuno.” Iwo adadzadi kukhali iye kule, tenepo iye adasasanya pontho guwa yansembe ya MBUYA ikhadagomolwa ile.

³¹Elia adakwata miyala khumi na miwiri, ubodzi kada dzinza malingana na ana a Yakobo, ule akhadalongwa na MBUYA kuti, “Dzinako inakhala Israele.”

³²Iye adamanga guwa yansembe ya MBUYA pakuphatisa basa miyala ile mbakumba mgelo kuzungulira guwa wakukwanisa kupita madzi akukwana bekete ibodzi.[27]

³³Iye adasanjikiza mwadidi nkhuni paguwapo. Kubuluka penepo adapha ng'ombe inango ile mbaigwanda m'mapindi-mapindi, tenepo adaisanjika pankhuni pale. Iye adalonga kuna anthu ale mbati, “Dzazani madzi pitomba pyanu pikulu-pikulupi mbamuakhuthule pansembe na nkhuni zenezo.” Iwo adachitadi tenepo.

³⁴Tenepo iye adalonga kuna iwo mbati, “Chitani pontho kachiwiri.” Iwo adachitadi kachiwiri. Iye adalonga pontho kachitatu mbati, “Khuthuliranipo kachitatu.” Tenepo iwo adakhuthuliradi kachitatu.

³⁵Madzi adatayikira paguwa ponsene pale mbadzaza na mumgelo mwene mule.

³⁶Pidakwana ndzidzi wakupereka nsembe mprofeti Elia adenda kutsogolo mbapemphera mbati, “MBUYA, Mulungu wa Abrahamu, Isake, Israele, lero pichitiseni mwekha ene kudziwika kuti ndimwe Mulungu wa Israele, pontho kuti ine ndine nyabasanu, pontho kuti ndachita pyonsenepi na utongi wanu.

³⁷Nditawireni MBUYA, nditawireni towera anthuwa apidziwe kuti imwe, MBUYA, ndimwe Mulungu, pontho kuti imwe mukuabweza kudza pontho kuna imwe.”[28]

³⁸Tenepo moto wa MBUYA udagwa kudzulu mbupisa nsembe ile, nkhuni, miyala, mataka na kuumisa madzi akhali mumgelo ale.

³⁹Pidaona anthu ale penepi adalamba mbakhuwa mbati, “MBUYA ndi Mulungu! MBUYA ndi Mulungu!”

⁴⁰Tenepo Elia adapanga anthu ale mbati, “Phatani maprofeti onsene a Baala. Lekani lekerera mbodzi wa iwo kuthawa!” Tenepo iwo adaphatadi maprofeti a Baala ale. Elia adaakwata mbadza nawo ku phedi ya Kishoni mbaapha onsene pakuchita kuagwanda makhosi.

⁴¹Natenepo Elia adalonga kuna Mfumu Ahabu mbati, “Ndokoni mukadye na kumwa thangwi ndikuva kuula kwa mvula ikulu.”

⁴²Tenepo Ahabu adenda kadya na kumwa kwene, mbwenye Elia adakwira pansonga ya phiri ya Karimele. Iye adatchulima mbaikha msolo wache pakati pa mabondo ache.

⁴³Elia adalonga kuna nyabasache mbati, “Ndoko kayang'ane kubara.” Nyabasa ule adenda kayang'ana; tenepo iye adalonga mbati, “Nkhabeko chinthu na chibodzi chene.” Elia adatuma nyabasache ule kanomwe kuti aende kayang'ana basi.

⁴⁴Tenepo ulendo wachinomwewo nyabasa wa Elia adalonga mbati, “Ndaona kwene pimakole ninga dzanja ya munthu pikupuchira kubulukira m'nyanza.” Natenepo Elia adalonga mbati, “Ndoko kapange Ahabu kuti, ‘Chimbizani kumanga chingolo chanu mutchithe gopesera mvula inakufungirani.’ ”

⁴⁵Sindzidzi, thambo idagudumirwa na makole akuswipa, mphepo idagundika tenepo mvula yakugoswa idadza. Ahabu adathamanga kwenda ku Yezereele.

⁴⁶Mphamvu za MBUYA zidadza pana Elia, tenepo iye adapitisira mwadidi mayalache kumanga bande mbathamanga pyakwanga kupiringana Ahabu mpakana ku Yezereele.