Read cisena 1 MAFUMU 20 Bible Online

1 MAFUMU 20 - cisena bible

1 MAFUMU 20

¹Beni-Hadadi mfumu wa Aramu adagumanyisa anyankhondo ache onsene pabodzi pene na mafumu makumatatu na awiri, pontho na akavalo awo na pingolo pyawo pene. Iye adenda mbakazungulira Samaria mbamenya naye nkhondo.

²Iye adatuma anyamphangwa mumzinda kuna Ahabu mfumu wa Israele mbalonga mbati, “Beni-Hadadi alonga kuti,

³‘Siliva na golidi pina iwepyo mphyanga; akazako na anako ene akubalika makawo mbanga.’ ”

⁴Mfumu wa Israele adatawira mbati, “Ande, ninga montho mwalongera imwe mbuyanga mfumu, ine na pyonsene pina ine mphyanudi.”

⁵Anyamphangwa ale adadza pontho mbalonga mbati, “Beni-Hadadi alonga kuti, ‘Pakutoma ine ndidatumiza mphangwa kuti undipase siliva, golidi, akazako na anako ene.

⁶Mbwenye mangwana ndzidzi ninga ontho uno ndinatuma mathubu anga kudzayang'ana m'nyumba ya chifumu pontho na nyumba za mathubu ako ene. Tenepo chinthu chonsene chakufunika kuna iwe,[30] iwo anachikwata.’ ”

⁷Mfumu wa Israele adachemeresa akulu-akulu a m'dzikomo mbalonga kuna iwo mbati, “Ngayang'anani pinachita munthuyi kufuna kutionesa nyatwa! Ndzidzi udatumiza iye mphangwa kundipokosera akazanga, ananga, siliva na golidi wanga, ine sidamkhondese tayu.”

⁸Akulu-akulu pabodzi pene na anthu onsene adatawira mbati, “Lekani kumvera weneyu penu kuphatizana na pinafuna iyepyo.”

⁹Natenepo Ahabu adatawira pidalonga Beni-Hadadi pile mbati, “Ndokoni mukampange mbuyanga mfumu kuti, ‘Ine nyabasanu ndinachita pyonsene pidalonga imwe pakutoma, mbwenye pyalonga imwe chinchinopi ine nkhabe dzakwanisa kupichita tayu.’ ” Anyamphangwa ale adalamuka mbaenda kalonga pidatawira mfumu ule kuna Beni-Hadadi.

¹⁰Tenepo Beni-Hadadi adatumiza mphangwa zinango kuna Ahabu mbati, “Milungu mbindiphe pyawo ngakhala ine sinadza na amunanga onsene dzavunga Samaria mwakuti dothache nkhabe dzala na m'manja mwene mwa amunanga tayu.”

¹¹Mfumu Ahabu adatawira mbati, “Kampangeni Beni-Hadadi kuti nyankhondo chadi-chadi hambagaya nkhondo idzati mala tayu, mbwenye ingamala.”

¹²Beni-Hadadi adava mphangwa zenezi mwenemo iye na mafumu anango adaphatizana na iye kukhala gulu ibodzi ale, akumwa m'makumbi mwawo, tenepo adatonga anyankhondo ache mbati, “Sasanyikani kamenya nkhondo.” Natenepo iwo adasasanyika kasosa mzinda ule.

¹³Na ndzidzi onthowo mprofeti adadza kuna Ahabu mfumu wa Israele mbalonga mbati, “MBUYA alonga kuti, ‘Ayi gulu yonsene ya anyankhondo ukuiona? Gulu yonseneyi ndinati ndiikhe m'manja mwako lero, tenepo unapidziwa kuti ine ndine MBUYA.’ ”

¹⁴Ahabu adavunza mbati, “Apo mbani anafuna kutsogolera nkhondo yeneyi?” Mprofeti ule adatawira mbati, “MBUYA alonga kuti, ‘Aphale akuphatira basa atsanthemba ndiye anafuna dzatsogolera.’ ” Mfumu adavunza pontho mbati, “Apo mbani anafuna kutoma kamenya pankhondo yeneyi?” Mprofeti ule adatawira mbati, “Iwe ene ndiye unafuna kutoma.”

¹⁵Natenepo mfumu adachemeresa aphale akuphatira basa atsanthemba, onsene akhalipo madzana mawiri na makumatatu na awiri. Kubuluka penepo adagumanyisa amuna anango a Aisraele; onsene pabodzi pene akhalipo pikwi pinomwe.

¹⁶Tenepo iwo adalamuka na masikati dzuwa ikuswa miti uku Beni-Hadadi pabodzi pene na mafumu makumatatu na awiri, ale akhadaphatizana na iye kukhala gulu ibodzi ali m'makumbi mwawo kuledzera.

¹⁷Aphale akuphatira basa atsanthemba ndiye adatoma kwenda. Tenepo anyakuzonda akhadatumiza Beni-Hadadi ale adampanga mbati, “Amuna akudza kubulukira ku Samaria.”

¹⁸Tenepo Beni-Hadadi adatawira mbati, “Ngakhala iwo adzera mtendere, aphateni amoyo; podi ngakhala adzera nkhondo aphateni amoyo basi.”

¹⁹Aphale akuphatira basa atsanthemba ale adabuluka mumzinda mule mbatsogolera gulu ya anyankhondo,

²⁰tenepo munthu onsene adapha munthu adamenyana na iyeyo. Pandzidzi wenewo Aaramu adathawa, tenepo Aisraele adaathamangisa. Mbwenye Beni-Hadadi mfumu wa Aramu adathawa pakavalo pabodzi pene na amunache anango akupakira akavalo.

²¹Mfumu wa Israele adathimiza kumenya nkhondo mbaphata anyakupakira akavalo na pingolo, pontho adavunga pikulu pene Aaramu.

²²Pidamala nkhondoyo mprofeti adadza kuna mfumu wa Israele mbalonga mbati, “Kasasanye mwadidi gulu yako ya nkhondo, towera ikhale yamphamvu, pontho uone chinthu chakuthema kuchita thangwi chaka chamangwana ndzidzi wakuphwitha kwa miti mfumu wa Aramu anati adze pontho dzakusosa.”

²³Akadamu a mfumu wa Aramu adalonga kuna iye mbati, “Milungu ya Israele ndi milungu ya mapiri. Ndi thangwi yache adatikunda. Mbwenye ngakhala tinamenyana nawo paphedi pambuto yakusowa mapiri, tinati tiakunde. Chitani ipi:

²⁴Bulusani utongi onsene m'manja mwa mafumu onsene mbamuuikhe m'manja mwa akadamu a nkhondo.

²⁵Musasanye pontho gulu ya nkhondo kukhala ninga yontho idavungika ile, towera nyakavalo amenyane na nyakavalo mnzache, nyachingolo amenyane na nyachingolo mnzache. Natenepo tinakwanisa kumenyana na Aisraele pambuto zakusowa mapiri kuti tikwanise kuakunda.” Mfumu adatawira pidalonga iwo pile mbachita ninga montho mudapangirwa iye.

²⁶Ndzidzi wakuphwitha miti Beni-Hadadi adagumanyisa Aaramu mbaenda ku Afeki kasosa Aisraele.

²⁷Pidagumanyiswa Aisraele mbapaswa pyakufunikira adalamuka kwenda kamenyana na Aaramu. Aisraele adamanga misasawo mwakuyang'anisana nawo mbakhala ninga mikumbi miwiri ing'ono-ing'ono ya mbuzi, mwenemo Aaramu adzaza mbuto yonseneyo.

²⁸Mprofeti adadza mbalonga kuna mfumu wa Israele mbati, “MBUYA alonga kuti, ‘Na thangwi yakuti Aaramu akunyerezera kuti ine ndine Mulungu wa mapiri okha basi nee Mulungu wa maphedi ene tayu, ndinati ndiikhe gulu yonsene m'manja mwako, tenepo unadziwa kuti ine ndine MBUYA.’ ”

²⁹Iwo adakhala pamisasa yawo nsiku zinomwe kuyang'anizana unango na mwanzache, tenepo pansiku yachinomwe nkhondo idaotoka. Aisraele adapha anyankhondo a Chiaramu akufamba na miyendo pikwi dzana ibodzi nsiku yeneyo.

³⁰Anango onsene adathawira mumzinda wa Afeki, kule kudagwa fufu ya mpanda wa mzinda kugwera anango a iwo pikwi makumawiri na anomwe. Tenepo Mfumu Beni-Hadadi adathawira mumzinda mule mbakabisala m'nyumba m'subi ya m'bwaloletu.

³¹Akadamu a Beni-Hadadi adalonga kuna iye mbati, “Ife tava kuti mafumu a Israele ngansisi pyakwanga. Apo tendeni kuna Mfumu wa Israele uku tavala masakha m'chuno mwathu na nkhambala kupyangirira m'khosi mwathu. Mwinango anakulekani khonda kukuphani.”

³²Kubuluka penepo iwo adavala masakha m'chuno mwawo na kupyangirira nkhambala m'khosi mwawo mbaenda kuna mfumu wa Israele mbakalonga mbati, “Nyabasanu Beni-Hadadi alonga kuti: ‘Ndaphata miyendo lekani kundipha.’ ” Mfumu wa Israele adatawira mbati, “Ayi iye na lero ana moyo basi? Iye ndi mbaleanga!”

³³Tenepo amuna ale adachiyesa chinthu cha mwayi mbatawira kabodzi kene kuphatisa basa mafalache onthowo mbalonga mbati, “Ande, mbaleanu Beni-Hadadi.” Tenepo Mfumu Ahabu adalonga mbati, “Ndokoni mukamkwate.” Pidadza Beni-Hadadi, Ahabu adamkwizika m'chingolo mwache.

³⁴Beni-Hadadi adalonga kuna iye mbati, “Ndinati ndibwezere kuna imwe mizinda idakwata babanga m'manja mwa babanu. Imwe munakwanisa kukhazikisa misikanu mu Damasiko ninga mudachitira babanga mu Samaria.” Ahabu adalonga mbati, “Thangwi ya pinthu pyalonga iwepi, ndinati ndikusudzule.” Natenepo uwiriawo adachita chiverano, tenepo Ahabu adamuleka kwenda pyache.

³⁵Na kupangwa na MBUYA mbodzi wa m'gulu ya maprofeti adalonga kuna mwanzache mbati, “Ndikhamwadze.” Mbwenye mwanzache ule adakhonda.

³⁶Tenepo mprofeti ule adalonga mbati, “Na thangwi yakuti iwe wakhonda kuvera MBUYA, sindzidzi iwe nkhundisiya pano, nkhalamu inakupha.” Pidenda munthu ule nkhalamu idagumanikana naye mbimpha.

³⁷Mprofeti ule adagumanikana na munthu unango mbampanga mbati, “Ndaphata miyendo, ndikhamwadze.” Natenepo iye adamkhamwadza mbamkuwaza.

³⁸Kubuluka penepo mprofeti ule adabuluka mbakaimira m'nkhwerekwete mwa njira kudikhira mfumu. Iye adapibisa yekha ene pakumanga chitambayi kunkhope kwache.

³⁹Pikhagwanda mfumu ule, mprofeti adakhuwa kuna iye mbati, “Ine nyabasanu ndikhadenda kunkhondo yakugoswa, tenepo nyankhondo unango adadza kuna ine na munthu wakuphatwa mbalonga mbati, ‘Londali munthuyu. Ngakhala iye anathawa, unapagali moyo wako penu kobiri zakukwana masiliva pikwi pitatu.’

⁴⁰Tenepo pikhali ine nyabasanu yakali-yakali, munthuyo adathawa.” Mfumu adatawira mbati, “Iwe wakonwa pyako, pontho wathema kupagali pyathema iwe kupagalipyo.”

⁴¹Mprofeti ule adachimbiza kukunundula chitambayi chikhadamanga iye kunkhope kwache chile, tenepo mfumu wa Israele adamdzindikira kuti akhali mbodzi wa maprofeti.

⁴²Mprofetiyo adalonga kuna mfumu mbati, “MBUYA alonga kuti, ‘Iwe wasudzula munthu ule akhadatonga ine kuti athema kuphiwa. Natenepo iwe wathema kupagali moyo wako thangwi ya moyo wache, pontho anthu ako thangwi ya anthu ache.’ ”

⁴³Mwakupinda pontho mwakuzhangali mfumu wa Israele adenda kunyumba kwache ku Samaria.