Read cisena 1 MAFUMU 21 Bible Online

1 MAFUMU 21 - cisena bible

1 MAFUMU 21

¹Pidagwanda ndzidzi ukulu ene chinthu chinango chidachitika. Naboti wa ku Yezereele akhali na munda wamfesa mu Yezereele chifupi na nyumba yachifumu ya Ahabu wa ku Samaria.

²Ahabu adalonga kuna Naboti mbati, “Nditawirisembo kukwata mundako kuti ukhale dimbanga ya masamba thangwi uli chifupi na nyumbanga yachifumu. Ine ndinati ndikupase munda unango wadidi kuchinjisana na munda wenewu, penu ngakhala unafuna kobiri ndinati ndikupase kontache yonsene ya munda wenewu.”

³Mbwenye Naboti adatawira mbati, “Ninga MBUYA wamoyo ine nkhabe kukupasani tayu chinthu chidandisiyira makolo anga.”

⁴Natenepo Ahabu adenda kumusa kwache wakupinda pontho wakuzhangali thangwi Naboti wa ku Yezereele adalonga mbati, “Sinakupasa tayu chinthu chidandisiyira makolo anga.” Iye adagona patalimba pache mbayang'ana kufufu pontho mbakhonda pyakudya.

⁵Yezebele mkazache adapita kusubiko mbamvunza mbati, “Mwatani mwapinda? Mwatani munakhonda kudya?”

⁶Iye adamtawira mbati, “Ine ndidalonga kuna Naboti kuti, ‘Ndigulisembo mundako penu ngakhala unafuna ndikupase munda unango kuchinjisana na wenewu!’ Mbwenye iye adanditawira mbati, ‘Ine sinakupasa tayu mundanga.’ ”

⁷Yezebele mkazache adalonga mbati, “Ayi mwenemu ndiye mwathema kuchitira mfumu wa Israele? Lamukani mudye! Galamukani. Ine ndinati ndikukwatireni munda wa Naboti.”

⁸Natenepo iye adalemba makalata na dzina ya Ahabu mbadindapo chidindo cha Ahabu, tenepo adaatumiza kuna akulu-akulu na anyakulemedzwa, ale akhakhala mumzinda mukhakhala Naboti mule.

⁹M'makalatamo iye adalembamo kuti: “Lalikirani pya nsiku yakupimana kudya mbamugumanyise anthu pabodzi pene, tenepo Naboti mumkhazike pampando wachilemedzo.

¹⁰Khazikani mwakuyang'anisana naye anthu awiri akuipa kuti ampambizire kuti iye atemberera Mulungu na mfumu ene. Kubuluka penepo mumkwate kwenda naye kunja kwa mzinda. Kweneko mumphe na miyala.”

¹¹Natenepo akulu-akulu na anyakulemedzwa ale akhakhala mumzinda wa Naboti adachita ninga montho mukhadaapangira Yezebele m'kalata ikhadaalembera iye.

¹²Kubuluka penepo iwo adalalika pya nsiku yakupimana kudya mbakhazika Naboti pampando wachilemedzo.

¹³Tenepo anthu awiri akuipa adadza mbakhala mwakuyang'anisana na Naboti mbalonga mafala akumpambizira pamaso pa anthu mbati, “Naboti atemberera Mulungu pontho na mfumu ene.” Natenepo adamkwata mbaenda naye kunja kwa mzinda. Kweneko adampha na miyala.

¹⁴Kubuluka penepo akulu-akulu adatumiza mphangwa kuna Yezebele mbati, “Naboti aphiwa na miyala.”

¹⁵Sindzidzi Yezebele nkhuva kuti Naboti aphiwa, adalonga kuna Ahabu mbati, “Lamukani mukakwate munda wamfesa wa Naboti, ule udakukhondesani iye kuugula. Iye hana moyove tayu, mbwenye afa.”

¹⁶Pidava Ahabu kuti Naboti afa adalamuka mbakwata munda wamfesa wa Naboti kukhala wache ene.

¹⁷Tenepo MBUYA adalonga kuna Elia wa Chitishibi mbati,

¹⁸“Ndoko kagumanikane na Ahabu mfumu wa Israele ule ambakhala mu Samaria. Chinchino pano iye ali m'munda wa Naboti kule kwaenda iye kuti akaukwate.

¹⁹Kampange kuti pyalonga ine MBUYA mphipi: ‘Iwe wapha munthu, apo unafuna pontho ukwate chinthu chache?’ Ulonge pontho kuna iye kuti, ‘Pyalonga MBUYA mphipi: Pambuto padanyanguta anambwa chiropa cha Naboti, pontho-ponthopo anambwa anati anyangutembo chiropa chako.’ ”

²⁰Ahabu adalonga kuna Elia mbati, “Iwe, nyamalwanga, wandigumana!” Elia adatawira mbati, “Ande, ndakugumanani, thangwi imwe mwapipereka mwekha ene kuchita pyakuipa pamaso pa MBUYA.

²¹MBUYA alonga kuti, ‘Ndinati ndidzese muliri pana iwe. Ndinati nditswaire pidzukulu pyako na kupha chimalisira bele chachimuna chonsene mu Israele, bitchu penu mtumbe.

²²Ndinati ndichitise anthu a pabanja pako kukhala ninga ale a pabanja ya Yeroboamu mwana Nebati, pontho na ale a pabanja ya Baasha mwana Ahia, thangwi iwe wandichitisa kuzhangali pontho wachitisa Israele kudawa.’

²³Kulonga pya Yezebele MBUYA alonga kuti anambwa anati adye mtembo wa Yezebele chifupi na mpanda ya Yezereele.

²⁴Anambwa anati adye anthu a Ahabu ale anafuna dzafera mumzinda pontho mbalame zinati zidye anafuna dzafera m'minda ale.”

²⁵Chipo nee padzati khala munthu ninga Ahabu tayu wakupipereka yekha ene kuchita pyakuipa pamaso pa MBUYA mwakuchita kupangwa na Yezebele mkazache.

²⁶Iye adachita pinthu pyakunyansa pyakwanga pakupembedza milungu ninga ya Aamori, ale adathamangisa MBUYA pamaso pa Aisraele.

²⁷Pidava Ahabu mafala enewa, adang'amba nguwo zache mbavala masakha pontho adapimana kudya. Iye akhagonera masakha mbafamba-famba mwakukhumata.

²⁸Tenepo MBUYA adalonga kuna Elia wa Chitishibi mbati,

²⁹“Ayi iwe wadziwa mule mwapichepesera Ahabu pamaso panga? Na thangwi yakuti iye apichepesa yekha ene, ine sinadzesa muliri walonga ine ule pandzidzi una iye na moyo tayu, mbwenye ndinati ndiudzese kubanja kwache pandzidzi unafuna dzatonga mwanache.”