Read cisena 1 MAFUMU 22 Bible Online

1 MAFUMU 22 - cisena bible

1 MAFUMU 22

¹Pakati pa Aisraele na Aaramu pakhali mtendere pyaka pitatu.

²Mbwenye chaka chachitatu Yehosafati mfumu wa Yuda adenda kaona Ahabu mfumu wa Israele.

³Mfumu wa Ahabu adavunza mathubu ache mbati, “Ayi imwe nkhabe dziwa tayu kuti nthemba ya Ramoti-Gileadi njathu? Mbwenye ife tikulira khala kwene nee funa kuikwata pontho tayu kubulukira m'manja mwa mfumu wa Aramu.”

⁴Natenepo Ahabu adavunza Yehosafati mbati, “Ayi mfumu, munaenda nane kamenya nkhondo na nthemba ya Ramoti-Gileadi?” Yehosafati adatawira mbati, “Ngakhala iwe wasasanyika na ine enembo ndasasanyika; chibodzi-bodzi anyankhondo anga, na akavalo anga ene.

⁵Mbwenye chakutoma tende tivunze nzeru kuna MBUYA.”

⁶Tenepo Ahabu adachemeresa maprofeti nenene madzana manayi mbaavunza mbati, “Ayi ine ndiende kamenyana na Ramoti-Gileadi penu tayu?” Iwo adatawira mbati, “Ndokoni, thangwi Mbuya anakuchitisani kukunda.”

⁷Mbwenye Yehosafati adavunza mbati, “Ayi pano nkhabe mprofeti unango tayu kuti tinakwanisa kuvunza nzeru kuna MBUYA kudzera muna iye?”

⁸Ahabu adatawira mbati, “Pasala mbodzi, weneyu ndi Mikaia mwana Imila. Kwache ine ndimbamzonda thangwi chipo iye hadzati kundipangambo chinthu chadidi tayu, mbwenye chakuipa ndzidzi onsene.” Yehosafati adatawira mbati, “Mfumu nee athema kulonga mafala ninga enewa tayu.”

⁹Natenepo Ahabu adachemeresa mbodzi wa mathubu ache mbampanga kuti akwate Mikaia mwana Imila kabodzi kene.

¹⁰Uku avala mikhanjo yawo yachifumu, mafumu awiri ale adakhala pamipando yawo yachifumu pambuwa chifupiletu na msuwo wa mpanda wa Samaria, tenepo maprofeti onsene ale akhalonga mphangwa zauprofeti pamaso pawo.

¹¹Tenepo Zedekia mwana Kenaana akhadasasanya nyanga zasimbi mbalonga mbati, “MBUYA alonga mbati, ‘Na ipi munati mumenyane na Aaramu mpakana kuakunda.’ ”

¹²Maprofeti onsene akhalonga chibodzi-bodzi. Iwo akhalonga mbati, “Ndokoni mukasose mzinda wa Ramoti-Gileadi, pontho munaukunda, thangwi MBUYA anakuchitisani kukunda.”

¹³Munthu akhadatumwa kakwata Mikaia ule adalonga kuna Mikaia mbati, “Ngayang'ana maprofeti anango onsene alonga kuti mfumu anati akakunde, tenepo iwe mafalako akaphatizane na pyalonga iwopyo mbukalonge mwakukomera mfumu.”

¹⁴Mbwenye Mikaia adalonga mbati, “Ine ndinadumbira pamaso pa MBUYA wamoyo kuti ndinakampanga chinthu chinafuna kundipanga MBUYA.”

¹⁵Pidafika Mikaia, mfumu adamvunza mbati, “Mikaia, ayi ife tiende kamenya nkhondo na Ramoti-Gileadi, penu tayu?” Iye adatawira mbati, “Ndokoni pontho munati mukakunde, thangwi MBUYA anaupereka m'manja mwanu.”

¹⁶Mfumu adalonga kuna Mikaia mbati, “Ndikudumbirise kangasi, kuti undipange pyakuonadi pyokhokha pyalonga MBUYA?”

¹⁷Mikaia adatawira mbati, “Ndidaona Aisraele onsene akubalalika paphiri ninga mabira akusowa makabuswa, tenepo MBUYA adalonga mbati, ‘Anthu awa nkhabe mbuyawo. Munthu onsene mulekeni pyache aende kwawo na mtendere.’ ”

¹⁸Mfumu wa Israele adalonga kuna Yehosafati mbati, “Ayi sidakupangeni tayu kuti munthu weneyu chipo adzati kundipanga pinthu pyadidi tayu, mbwenye pyakuipa pyokhokha?”

¹⁹Mikaia adathimiza kulonga mbati, “Ngaveserani pinalonga MBUYA! Ine ndidaona MBUYA akhala pampando wache wachifumu kudzulu, mwenemo angelo ache onsene aimira nkhundu mwache.

²⁰Tenepo MBUYA adalonga mbati, ‘Mbani anafuna pyakunyengeza Ahabu kuti aende kamenya nkhondo na Ramoti-Gileadi kuti afere konthoko?’ Mngelo unango adalonga pyachembo, unango adalongambo pyachembo.

²¹Pakumalisira pache mzimu udadza pamaso pa MBUYA mbalonga kuti, ‘Ine ndinati ndikamnyengeze Ahabu.’

²²MBUYA adavunza mbati, ‘Unakamnyengeza tani?’ Mzimuwo udatawira kuti, ‘Ine ndinati ndiende kweneko mbandikakhala mzimu wakunama m'kanwa mwa maprofeti ache onsene.’ MBUYA adalonga mbati, ‘Ande, iwe unati ukamnyengezedi. Tenepo ndoko ukachite penepyo.’ ”

²³Tenepo Mikaia adamalisa kulonga mbati, “Penepi pyachitikadi. MBUYA adaikha mzimu wakunama m'kanwa mwa maprofeti anu onsenewa, thangwi MBUYA akhazikisa kuvungika pana imwe.”

²⁴Penepo Zedekia mwana Kenaana adenda pakhali Mikaia pale mbamgasa mbama. Iye adavunza mbati, “Mzimu wa MBUYA wabuluka tani muna ine mbukalonga na iwe?”

²⁵Mikaia adatawira mbati, “Iwe unapidziwa pansiku inafuna iwe dzabisala m'subi ya m'bwaloletu.”

²⁶Mfumu wa Israele adalonga mbati, “Mkwateni Mikaia mumbweze kuna Amoni, mkulu wa boma mumzinda, na kuna Yoasi mwana mfumu

²⁷mbamukalonge kuti, ‘Mfumu alonga kuti aikhwe m'perezo, pontho lekani kumpasa chinthu chinango, mbwenye mkate na madzi ene basi kufikirana ndibwereko mwadidi.’ ”

²⁸Mikaia adalonga mbati, “Ngakhala munabwerako mwadidi, penepo MBUYA hadalonge kudzera muna ine tayu.” Tenepo iye adathimiza kulonga mbati, “Anthu monsene muli pano phatani pyalonga inepi.”

²⁹Tenepo mfumu wa Israele na Yehosafati mfumu wa Yuda adalamuka kwenda kasosa Ramoti-Gileadi.

³⁰Ahabu adalonga kuna Yehosafati mbati, “Ine ndinapizimbaisa mbandimenya nkhondo ninga mbodzi wa anyankhondo, mbwenye iwe wathema kuvala mkhanjo wako wachifumu.” Natenepo mfumu wa Israele adapizimbaisa mbaenda kamenya nkhondo.

³¹Mfumu wa Aaramu akhadatonga akadamu ache ankhondo makumatatu na awiri akufambisa pingolo nee kamenyana na munthu ene pyache tayu, mbwenye mfumu wa Israele ene basi.

³²Akadamu a pingolo pile pidaona iwo Yehosafati adanyerezera kuti akhali mfumu wa Israele. Natenepo adazungunuka kuti amenyane naye. Mbwenye pidakhuwa Yehosafati,

³³akadamu a pingolo ale adaona kuti iye hakhali mfumu wa Israele tayu, tenepo adaleka kumthamangisa.

³⁴Mbwenye munthu unango adaponya tswimo yache nyamponye-mponye mbalasa mfumu Ahabu m'phindopindo mwa nguwo zache za nkhondo. Mfumu adapanga nyakufambisa chingolo chache mbati, “Zungunusa chingolo kundibulusa kunkhondoyi thangwi ndalaswa!”

³⁵Pansiku yeneyo nkhondo idakaka pyakwanga, tenepo mfumu adakhazikwa m'chingolo mwache kuyang'anisana na Aaramu. Chiropa chikhabuluka padalaswa iye pale chikhachucha mpakana pansi pa chingolo chile mwakuti mosiku wenewo adafa.

³⁶Pikhadoka kunja mphangwa zidaveka pakati pa anyankhondo onsene kuti, “Munthu onsene mbaende kuluwani kwache; munthu onsene mbabwerere m'mudzi.”

³⁷Natenepo mfumu adafa. Mtembo wache udadzeswa ku Samaria, pontho adaikhwa m'masiye kweneko.

³⁸Iwo adatsuka chingolo chache na madzi pathawale mu Samaria, kule kukhasamba maputa, tenepo anambwa adanyanguta chiropa chache ninga montho mukhadalongera MBUYA.

³⁹Kulonga pya pinthu pinango pidachitika Ahabu mbali mfumu, pyonsene pidachita iye, nyumba yachifumu idamanga iye yakuthemeserwa na nyanga za nzowu, pontho na mizinda idamanga iye pyalembwa m'bukhu ya mbiri ya mafumu a Israele.

⁴⁰Ahabu adagonera mkono, tenepo Ahazia mwanache adapita ufumu m'mbuto mwache.

⁴¹Yehosafati mwana Asa adapita ufumu wa Yuda, chaka chachinayi Ahabu mbali mfumu wa Israele.

⁴²Yehosafati akhali na pyaka makumatatu na pishanu pyakubalwa mukhapita iye ufumu. Tenepo iye adatonga mu Yerusalemu pyaka makumawiri na pishanu. Mache akhali Azuba mwana Shilihi.

⁴³Ninga mudachitira Asa babache, iye adachitambo pinthu pyakulungama pamaso pa MBUYA; kwache mbuto zakupembedzerapo milungu nee zidavungwe tayu, tenepo anthu adathimiza basi kwenda kweneko kapereka nsembe na kafukiza pyakununkhira.

⁴⁴Yehosafati akhalimbo pamtendere na mfumu wa Israele.

⁴⁵Pinango pyonsene pidachita Yehosafati, kuwanga kwache mtima pontho nkhondo zidamenya iye, pyalembwa m'bukhu ya mbiri ya mafumu a Yuda.

⁴⁶Iye adabulusa m'dziko monsene maputa achimuna na achikazi ene akuphata basa m'mbuto zakupembedzeramo milungu, ale adasalira basi pandzidzi udafa Asa babache.

⁴⁷Mu Edomu mukhali nkhabe mfumu tayu, mbwenye ikhatongwa na thubu wakuchita kusankhulwa na mfumu wa Yuda.

⁴⁸Yehosafati adasasanya miyadiya mikulu-mikulu kwenda pabara ku Tarisisi kuti ikathukule golidi ku Ofiri. Mbwenye hidafikeko tayu thangwi idamala panduka na mabimbi pa Ezioni-Geberi.

⁴⁹Penepo Ahazia mwana Ahabu adalonga kuna Yehosafati kuti amunache aende pabodzi na amuna a Yehosafati pamiyadiya mikulu-mikulu yakoyi, mbwenye Yehosafati adakhonda.

⁵⁰Tenepo Yehosafati adagonera mkono mbaikhwa m'masiye a makolo ache mumzinda wa Davite babache. Natenepo Yehoramu mwanache adapita ufumu m'mbuto mwache.

⁵¹Ahazia mwana Ahabu adapita ufumu wa Israele chaka chakhumi na chinomwe Yehosafati mbali mfumu wa Yuda mbakhala mu Samaria; iye adatonga kwene Israele pyaka piwiri basi.

⁵²Iye adachita pyakuipa pamaso pa MBUYA, thangwi iye akhateweza pikhachita babache na mache, pontho na pikhachita Yeroboamu mwana Nebati, ule adachitisa Aisraele kudawa.

⁵³Iye adatumikira na kupembedza milungu Baala, natenepo adazhangalisa MBUYA Mulungu wa Israele ninga montho mudachitira babache.