Read cisena 1 MAFUMU 3 Bible Online

1 MAFUMU 3 - cisena bible

1 MAFUMU 3

¹Solomoni adaphatizana na mfumu wa ku Iguputo kukhala gulu ibodzi mbasemba mwanache wamkazi. Solomoni adadza naye mkaziyo mumzinda wa Davite mpakana iye adamalisa kumanga nyumbache yachifumu, Nyumba ya Mulungu, pontho na mpanda wakuzungulira Yerusalemu.

²Kwache anthu akhathimiza basi kupereka nsembe pambuto zakupembedzerapo zakusiyana-siyana, podi kwene kuti pandzidzi wenewo Nyumba ya Mulungu yakupembedzeramo MBUYA ikhadadzati mangwa tayu.

³Solomoni adaonesa kumfuna kwache MBUYA pakuteweza matongero adampanga babache Davite ale, kupambula kuti iye akhapereka nsembe na kufukiza pyakununkhira pambuto zakupembedzerapo zakusiyana-siyana.

⁴Nsiku inango Mfumu Solomoni adenda ku Gibeoni kapereka nsembe, thangwi kweneko ndiye kukhali mbuto yakupambulikaletu yakupembedzerapo, natenepo Mfumu Solomoni adapereka nsembe zakupyerera chikwi paguwa yansembe.

⁵Pa Gibeonipo MBUYA adaonekera Solomoni na mosiku kundoto, tenepo Mulungu adalonga mbati, “Pempha chinthu chonsene chinafuna iwe kuti ndikupase.”

⁶Solomoni adatawira mbati, “Ndzidzi onsene imwe mwaonesa kumfuna kwanu kukulu nyabasanu, babanga Davite, thangwi iye akhali wadidi, wakukhulupirika pontho wakuona mtima kuna imwe. Tenepo imwe mwathimiza basi kumuonesa kumfuna kwanu kukulu pontho kokhonda mala pakumpasa mwana, ule lero akutonga ninga mfumu m'mbuto mwache.

⁷MBUYA Mulungu wanga, imwe mwandichitisa ine nyabasanu kukhala mfumu kupita m'mbuto mwa babanga Davite. Mbwenye ine ndine mwana ene pyanga, pontho nkhabe kupidziwa mule munafuna ine phata basanga tayu.

⁸Ine nyabasanu ndili pano pakati pa anthu anu asankhula imwe, dzinza ikulu, anthu akuinjipa pyakwanga okhonda lengeseka.

⁹Natenepo mpaseni nyabasanu nzeru kuti nditonge mwadidi anthu anuwa pontho kuti ndikwanise kusiyanisa pakati pa chadidi na chakuipa. Thangwi mbani anakwanisa kutonga dzinzanu ikuluyi?”

¹⁰Mbuya adakomerwa pyakwanga kuti Solomoni akhadapempha chinthu chenechi.

¹¹Natenepo Mulungu adalonga kuna iye mbati, “Na thangwi yakuti iwe wapempha chinthu chenechi, nee kupipemphera moyo wakulapha penu mfuma penu kupempha kuti anyamalwako afe tayu, mbwenye wapempha nzeru pabasa yakutonga anthu anga mwachilungamo,

¹²ine ndinati ndichite pyapempha iwepyo. Ndinakupasa nzeru pontho udziwisi, towera paleke khala munthu unango wakukhala ninga iwepo, penu dzakhalave unango ninga iwepo.

¹³Padzulu pa penepi ndinakupasa na pinthu pene pyakhonda iwe pempha; mfuma na chilemedzo chene, towera ndzidzi onsene wakukhala kwako na moyo uleke dzakhala sasawa na unango pakati pa mafumu.

¹⁴Pontho ngakhala iwe unachita pinafuna ine mbuvera pinakupanga ine na matongero anga ene ninga montho mudakupangira babako Davite, ine ndinati ndikupase moyo wakulapha.”

¹⁵Kubuluka penepo Solomoni adalamuka mbadzindikira kuti Mulungu akhadalonga naye kundoto. Tenepo adabwerera ku Yerusalemu. Kweneko iye adaimira patsogolo pa Bokosi ya Chiverano ya MBUYA mbapereka nsembe zakupyerera na nsembe zachiphatizano kuna MBUYA. Kubuluka penepo adachita phwando kuchitira mathubu ache onsene.

¹⁶Nsiku inango maputa mawiri adadza pamaso pa Mfumu Solomoni.

¹⁷Mbodzi wa iwo adalonga mbati, “Mbuyanga, mkaziyu na ine timbakhala nyumba ibodzi ene. Ine ndidabala mwana wamamuna mwenemo ndili naye pabodzi.

¹⁸Pansiku yachitatu pidabalwa mwananga, mkazi mwanzangayu adabalambo wache mwana. M'nyumbamo tikhali tekha ene, mukhali nkhabe munthu na mbodzi ene tayu, mbwenye tikhalimo uwiriathu ene basi.

¹⁹“Na mosiku mwache mwanzangayu mwanache adafa thangwi adamgonera.

²⁰Natenepo pachiti-chiti iye adalamuka mbakwata mwananga m'khundu mwanga mwenemo ine nyabasanu ndili m'chitulo. Iye adakwata mwanangayo mbamuikha kumabele kwache mbakwata mwanache wakufayo mbamuikha kumabele kwanga.

²¹Mangwana mwache na machibese ndidalamuka kuti ndimuyamwise mwananga mbandigumana kuti mwanayo akhali wakufa. Mbwenye pidachena kunja ndidamuyang'anisisa mwanayo mbandigumana kuti hakhali wanga tayu.”

²²Tenepo mkazi unango ule adalonga mbati, “Nkhabe! Mwana wamoyoyi ngwanga; wakufayo ngwako.” Mbwenye mkazi wakutoma ule adakakamira kulonga mbati, “Nkhabe! Mwana wakufayi ndiye wako; wamoyoyi ngwanga.” Natenepo iwo adapokosana pamaso pa mfumu.

²³Tenepo mfumu adalonga mbati, “Uyu akulonga kuti mwana wamoyoyi ngwanga; wakufayo ngwako, uku unangombo akulonga kuti, ‘Nkhabe! Wakufayi ngwako; wamoyoyi ngwanga.’ ”

²⁴Tenepo mfumu adalonga mbati, “Ngandipasireni talasada kuno.” Natenepo iwo adadzadi na talasada kuna mfumu.

²⁵Mfumu adatonga mbati, “Mgwandeni mwana wamoyo kati na kati; kwatani phindi ibodzi muipereke kuna mbodziyo mbamupereke phindi inangomboyo kuna unangoyo.”

²⁶Mache chadi-chadi mwana wamoyo ule adava naye nyambalo pyakwanga mwanache mbalonga mbati, “Mbuyanga, ndaphata miyendo mpaseni pyache mwanzanga mwana wamoyoyo! Lekani kumpha!” Mbwenye mkazi unango ule adalonga mbati, “Tayu! Mgwandeni basi kati na kati, towera tinyalire pabodzi.”

²⁷Natenepo mfumu adatonga mseruwo mbati, “Lekani kumpha mwanayo. Perekani mwana wamoyo kuna mkazi wakutomayo mache ngweneyo.”

²⁸Pidava Aisraele onsene kutonga mseru kudachita mfumu pamseru wenewu, adamulemedza pikulu pene mfumu ule, thangwi adaona kuti akhali na nzeru zakubulukira kuna Mulungu zakukwanisa kutonga miseru mwachilungamo.