Read cisena 1 MAFUMU 4 Bible Online

1 MAFUMU 4 - cisena bible

1 MAFUMU 4

¹Solomoni ndiye akhali mfumu wa dziko yonsene ya Israele,

²tenepo awa ndiye akhali mathubu ache: Nyansembe akhali Azaria mwana Zadoki;

³anyakulemba akhali Elihorefi na Ahia ana achimuna a Shisha; mkulu wakuyang'ana mabukhu akhali Yehosafati mwana wamamuna wa Ahiludi;

⁴mkadamu wa anyankhondo akhali Benaia mwana wamamuna wa Yehoiada; anyansembe akhali Zadoki na Abiatara;

⁵mkadamu wa atsanthemba akhali Azaria mwana Natani; phungu wa mfumu akhali Zabudu nyansembe mwana Natani;

⁶mkadamu wa anyabasa a ku nyumba ya mfumu akhali Ahishari; mkadamu wakuyang'anira mabitchu akhali Adoniramu mwana wamamuna wa Abida.

⁷Solomoni adasankhula amuna khumi na awiri kukhala atsanthemba mu Israele. Iwo basawo ikhali yakudza na phoso kubulukira kunthemba zawo kudzapasa mfumu pabodzi pene na anthu a kunyumba kwache. Munthu onsene akhapereka kuna mfumu pyakudya pyakukwanira mwezi wamumphu kabodzi pachaka.

⁸Ali m'tchindewa ndi madzina akulu-akulu khumi na awiri na nthemba zikhayang'anira iwo: Beni-Huri akhayang'anira dziko ya mapiri ya Eferemu.

⁹Bendekere akhayang'anira mizinda ya Makazi, Shaalibimu, Beti-Shemeshi, Eloni na Beti-Hanani.

¹⁰Beni-Hesedi akhayang'anira mizinda ya Aruboti na Soko pabodzi pene na nthemba yonsene za Hefere.

¹¹Benabinadabu, ule akhadasemba Tafati mwana wamkazi wa Solomoni akhayang'anira nthemba yonsene ya Dori.

¹²Baana mwana Ahiludi akhayang'anira mizinda ya Taanaki, Megido na nthemba yonsene ya Beti-Shani ya chifupi na luwani ya Zaretani kumwera kwa mzinda wa Yezereele mpakana kumzinda wa Abele-Mehola na mzinda wa Yokomeamu.

¹³Bengeberi akhayang'anira mzinda wa Ramoti mu Gileadi na midzi ya nkhonda Yairi mu Gileadi chidzukulu cha Manase na nthemba ya Arigobu m'Bashani. Onsene pabodzi pene akhalipo maluwani makumatanthatu akutchingwa na mpanda yakukhala na misuwo na mphinga zasimbi.

¹⁴Ahinadabu mwana wamamuna wa Ido akhayang'anira nthemba ya Mahanaimu.

¹⁵Ahimaazi ule akhadasemba Basemati mwana unango wa Solomoni akhayang'anira nthemba ya Nafitali.

¹⁶Baana mwana wamamuna wa Hushai akhayang'anira nthemba ya Asheri pontho luwani ya Bealoti.

¹⁷Yehosafati mwana wamamuna wa Parua akhayang'anira nthemba ya Isakara.

¹⁸Shimei mwana wamamuna wa Ela akhayang'anira nthemba ya Benjemani.

¹⁹Geberi mwana wamamuna wa Uri akhayang'anira nthemba ya Gileadi, ile ikhatongwa na Mfumu Sihoni wa Aamori na Mfumu Ogi wa Bashani. Kupambula anthu khumi na awiriwa pakhali mkulu wa boma mbodzi wakuyang'anira dziko yonsene.

²⁰Anthu a ku Yuda na Aisraele akhali azinji pyakwanga ninga tchetcha ya bara; iwo akhadya na kumwa mbakomerwa pyakwanga.

²¹Ufumu wa Solomoni udathimizirika na mitundu yonsene kubulukira kumkulo wa Yufurate kwenda kudziko ya Afilisti mpakana kumadire a Iguputo. Iwo akhakhoma msonkho kuna iye, pontho akhali pansi pa utongi wache ndzidzi onsene wa moyo wache.

²²Pinthu pikhafuna Solomoni pansiku ndi ufa wadidi wa tirigu wakukwana mabekete madzana mawiri na makumashanu na ufa wa mapiramanga wakukwana mabekete madzana mashanu;

²³ng'ombe khumi zakudyeswa m'thanga, ng'ombe makumawiri zakudyeswa kutsanga, pontho na mabira dzana ibodzi; kuthimizapo ngoma, mbala, nyasa, na nkhanga zakunenepa.

²⁴Solomoni adatonga dziko yonsene yakumadokero dzuwa a mkulo wa Yufurate kubulukira ku Tifisa pa Yufurate nkhwenderatu kumadokero dzuwa a mzinda wa Gaza. Mafumu onsene akumadokero dzuwa kwa Yufurate akhali pansi pa utongi wa Solomoni, pontho iye akhakhala mwa mtendere na madziko akuzungulira dziko yache.

²⁵Pikhali iye na moyo anthu onsene a ku Yuda na Israele kutomera ku Dani mpakana ku Beeresheba akhali pa mtendere, mwakuti munthu onsene akhakhala pansi kuchedza pamitawi yache yamfesa na miti yamkuyu.

²⁶Solomoni akhali na nyumba zakukoyeramo akavalo apingolo pyankhondo pikwi makumanayi na anyakupakira akavalowo pikwi khumi na piwiri.

²⁷Atsanthembache khumi na awiri adasankhula iye kada munthu mwezi ubodzi akhadza na phoso kudzapasa mfumu na anthu onsene akhadya m'nyumba ya chifumu ale. Iwo akhaonesesa kuti mfumu aleke sowa chinthu na chibodzi chene.

²⁸Atsanthemba onsene kada munthu akhadza pontho na khundu yache ya barele na maudzu kudyesa akavalo akukhweya pingolo na akavalo anango ale akhali kumbuto kukhafunika ipyo.[5]

²⁹Mulungu adapereka nzeru, udziwisi, na kuvesa pinthu kuna Solomoni mwakuinjipa pyakwanga ninga tchetcha ya pagombe.

³⁰Solomoni akhali na nzeru pyakwanga kupiringana nzeru za anthu onsene akumabulukiro dzuwa pontho kupiringana nzeru za anthu onsene a mu Iguputo.

³¹Iye akhali na nzeru pyakwanga kupiringana munthu onsene: wanzeru kupiringana Etani wa Chiezara, Hemani, Kalikoli na Darida ana achimuna a Maholi. Natenepo kuveka kwache kudadziwika m'madziko onsene akumzungulira.

³²Iye adapeka miyambi pikwi pitatu pontho nyimbo zizinji zakukwana chikwi chibodzi na zishanu.

³³Iye adalonga mwakuveka pya pinthu pyakumera kutomera kumuti wamkungudza wa ku Lebanoni kufikirana kumtawi wakhwasakwasa ule umbamera mbutanthawira mafufu. Iye adalonga pontho pya nyama na mbalame, nyama zakukambadza na nsomba.

³⁴Anthu a kumadziko onsene adadza kudzavesera nzeru za Solomoni. Enewa akhachita kutumwa na mafumu onsene a dziko yapansi, ale akhadava pya nzeru zache.