Read cisena 1 MAFUMU 5 Bible Online

1 MAFUMU 5 - cisena bible

1 MAFUMU 5

¹Pidava Hiramu mfumu wa Turo kuti Solomoni apitiswa ufumu m'mbuto mwa babache Davite, iye adatuma aimiriri a dziko kuna Solomoni; thangwi ndzidzi ukulu ene iye akhali shamwaliache Davite.

²Tenepo mphangwa zidabwezera Mfumu Solomoni kuna Mfumu Hiramu nsizi:

³“Imwe mukupidziwa kuti na thangwi ya nkhondo idamenya babanga Davite kumenyana na anthu akukhundu zonsene, iye hadakwanise kumangira MBUYA Mulungu wache Nyumba tayu, kufikirana MBUYA adaikha anyamalwache pansi pa manyalo ache.

⁴Mbwenye lero MBUYA Mulungu wanga andichitisa kukhala pamtendere kukhundu zonsene mwakuti nkhabe pontho anyamalwa, penu unango wakundisokosa tayu.

⁵Natenepo ine ndanyerezera kumangira Nyumba MBUYA Mulungu wanga ninga montho mudalongera MBUYA kupanga babanga Davite kuti, ‘Mwanako ule anafuna ine dzamuikha pampando wachifumu m'mbuto mwako weneyo ndiye anafuna dzandimangira Nyumba.’

⁶“Natenepo tonga kuti miti yamkungudza mu Lebanoni igwandwe kuti ndiiphatise basa. Amunanga anati aphate basa pabodzi pene na amunako, pontho ndinati ndikupagali konta yonsene inalonga iweyo thangwi ya amunako anafuna dzaphata basawo. Iwe ukupidziwa kuti ife kuno nkhabe munthu na mbodzi ene wa luso kucheka matabwa ninga anthu a ku Sidoni tayu.”

⁷Pidava Mfumu Hiramu mphangwa zidatumiza Mfumu Solomoni kuna iye, adakomerwa pyakwanga mbalonga mbati, “Mbakuzwe MBUYA lero, thangwi iye apereka kuna Davite mwana wa nzeru pyakwanga kutonga dzinza ikuluyi.”

⁸Tenepo Hiramu adatumiza mphangwa kuna Solomoni zakuti: “Ndatambira mphangwa zanditumizira iwe, pontho ndinati ndichite pyonsene pinafuna iwe pakukupasa miti yamkungudza na mitanda yapaina.

⁹Amunanga anaithukula kubulukira ku Lebanoni kwenda nayo ku bara, tenepo anaimanga m'mitolo mbandiichitisa kubeluka na madzi mpakana ifike pambuto pasankhula iwepo. Kweneko anaisudzula tenepo amunako anaikwata kubulukira penepo. Tenepo iwembo wathema kuchita pinafuna ine pakupereka phoso kuna anthu anga.”

¹⁰Na njira yeneyi Hiramu akhapereka kuna Solomoni miti yamkungudza na mitanda yapaina ikhafuna iye ile.

¹¹Solomoni akhaperekambo kuna Hiramu tirigu wakudzala pingolo[6] pikwi makumanayi pontho na pigubu[7] pya mafuta aolivi chadi-chadi pikwi makumawiri[8] chaka na chaka kudyesa amunache kubwezera pikhamchitira iye pile.

¹²MBUYA adapereka nzeru kuna Solomoni ninga montho mukhadadumbira iye. Tenepo pakhali mtendere pakati pa Hiramu na Solomoni, pontho uwiriawo adachita chiverano.

¹³Mfumu Solomoni adatonga amuna kuti aphate basa mwakukhakhamizwa kubulukira m'dziko yonsene ya Israele akukwana pikwi makumatatu.

¹⁴Tenepo iye adaagawa m'magulu atatu a amuna pikwi khumi mbaatuma ku Lebanoni kaphata basa mwakuchita buswa-buswa mwezi ubodzi. Angamala penepo aende mudzi mbakakhala miyezi miwiri, uku gulu inango ikuphata basa. Adoniramu ndiye akhali nyakuyang'anira basa yeneyi.

¹⁵Solomoni akhali na anyakucheketeza miyala m'phiri pikwi makumasere na amuna akuthukula mitolo pikwi makumanomwe,

¹⁶pontho na anyakuyang'anira basa yeneyi kupanga anyakuphata basa ale pyakuchita akhalipo pikwi pitatu na madzana matatu.

¹⁷Mfumu Solomoni adaapanga kuti aseme miyala mikulu-mikulu yadidi kuti ikhale yakumangira nayo maziko a Nyumba ya Mulungu.

¹⁸Amisiri a matabwa a Mfumu Solomoni na a Mfumu Hiramu na amuna a ku Gebali adagwanda miti mbacheka matabwa na kusema miyala kuti pikhale pyakumangira Nyumba ya Mulungu.