Read cisena 1 MAFUMU 6 Bible Online

1 MAFUMU 6 - cisena bible

1 MAFUMU 6

¹Chaka chamadzana manayi na makumasere pidabuluka Aisraele m'dziko ya Iguputo, chaka chachinayi cha utongi wa Mfumu Solomoni, mwezi wa Zivi, ule ukhali mwezi wachiwiri, Solomoni adatoma kumanga Nyumba ya Mulungu.

²Nyumba idamangira Solomoni MBUYA ulaphiache wa m'bwalo ukhali makhono makumawiri na manomwe, umimbache ukhali makhono mafemba, chengo chache chikhali makhono khumi na matatu na kati ya khono.

³Subi ya kumsuwo wa Nyumba, ulaphiache ukhali makhono manayi na kati ya khono, umimbache ukhali makhono mafemba, umimbache ukhali sasawa na umimba wa Nyumba.

⁴Mafufu a Nyumba ya Mulungu akhali na mazhanera, ale akhali akupsipsidika kunja kupiringana m'bwalo.

⁵Kutsamira kunja kwa mafufu a Nyumba ya Mulungu ile, kukhundu ziwiri na kunduli kwache kwene kudamangwa nyumba zitatu mwakuchita kusanjikizana.

⁶Masubi onsene a nyumba yapansiletu umimbache ukhali makhono mawiri na kati ya khono kada subi; masubi onsene a nyumba yapakati umimbache ukhali makhono matatu kada subi; masubi onsene a nyumba ya padzululetu umimbache ukhali makhono matatu na kati ya khono kada subi, thangwi kunja kwa mafufu a Nyumba ya Mulungu adamangwa ninga nsikada zikulu zitatu mwakuti mitandache ya nyumba zitatu zakusanjikizana zile zidatsamira pansikadazo, towera ileke pita m'mafufu a Nyumba ya Mulungu.

⁷Pikhamanga iwo Nyumba yeneyi akhaphatisa basa miyala yadidi yakusemwa kale mwakuti nee kugogoda kwa nyundo, mbadzo, penu talasada kudaveka tayu pikhamangwa Nyumba ya Mulungu ile.

⁸Msuwo wa nyumba yapansiletu[9] ukhali kukhundu yakumwera kwa Nyumba ya Mulungu; m'nyumba yapansiletuyo mukhali nsikada zakukwira nazo m'nyumba yachiwiri na yachitatu.

⁹Natenepo Solomoni adamanga Nyumba ya Mulungu ile mbaimalisa, kuikha mitanda na kuiphimbira na matabwa amkungudza.

¹⁰Nyumba zitatu zakusanjikizana zile, kada nyumba chengo chache chikhali makhono mawiri na dzanja ibodzi, zidamangwa mwakutsamira mafufu akunja kwa Nyumba ya Mulungu, mbachita kuiphataniza kuna mafufuwo pakuphatisa basa mitanda yamkungudza.

¹¹MBUYA adalonga kuna Solomoni mbati,

¹²“Kulonga pya Nyumba yandimangira iweyi, ngakhala unavera pifunziso, mwambo na matongero anga ndinati ndikuchitire pinthu pidadumbira ine kuna babako Davite,

¹³ndinati ndikhale pakati pa anthu anga Aisraele m'Nyumba inamanga iweyi pontho ine nkhabe dzaakhonda pontho tayu.”

¹⁴Natenepo Solomoni adamalisa kumanga Nyumba ya Mulungu ile.

¹⁵Mafufu a Nyumba ya Mulungu ale, m'bwalo mwachemo adaikhwa mapembo a matabwa amkungudza kutomera pansi mpakana kunsoyi. Pansipa padaphophwa na matabwa apaina.

¹⁶Subi ya m'bwaloletu yakuchemerwa Mbuto Yakuchenesesa idagwandwa kunduli m'bwalo mwa Nyumba ya Mulungu ile. Ulaphiache ukhali makhono mafemba pontho ikhali yakusasanywa na mapembo amkungudza kutomera pansi mpakana kunsoyi.[10]

¹⁷Subi ikulu kunkhope kwa subi ya m'bwaloletu ulaphiache ukhali makhono khumi na masere.

¹⁸M'bwalo mwache mukhali mapembo a matabwa amkungudza akuthemeserwa na pyakusema-sema pya ndiko pontho maluwa. Mafufu onsene m'bwalomo adaphophwa na mkungudza mwakuti nkhabe mwala na ubodzi ene udaoneka mwenemo tayu.

¹⁹M'bwalo mwa Nyumba ya Mulungu iye adasasanya Mbuto Yakuchenesesa kuti Bokosi ya Chiverano ya MBUYA ikhale mwenemo.

²⁰Mbuto Yakuchenesesa ya m'bwalomo ulaphiache ukhali makhono mafemba, umimbache ukhali makhono mafemba, pontho chengo chache chikhali makhono mafemba; iye adaphopha m'bwalo monsene na golidi chadi-chadi, mbakukutiza na golidi guwa yakufukizirapo pyakununkhira yakusasanywa na matabwa amkungudza ya m'Mbuto Yakuchena.

²¹Solomoni adaphopha m'bwalo monsene mwa Nyumba ya Mulungu ile na golidi chadi-chadi pontho iye adagwangwanyisa nkhambala yagolidi pamsuwo wakupitira m'Mbuto Yakuchenesesa, ile ikhali pontho yakuphophwa na golidi.

²²M'bwalo monsene mwa Nyumba ya Mulungu ile mukhadaphophwa na golidi, pontho guwa yonsene yakufukizirapo pyakununkhira ya m'Mbuto Yakuchenesesa ikhadakukutizwa na golidi.

²³Pyakulengwa piwiri pyakukhala na maphaphido pidasasanywa kubulukira kumuti waolivi mbapiikhwa m'Mbuto Yakuchenesesa. Chibodzi thungache ikhali makhono manayi na manja mawiri.

²⁴Pyonsene piwiri pikhaoneka sasawa, pontho thungawo ikhali ibodzi ene. Ipyo pikhali na maphaphido awiri awiri; phaphido ibodzi ulaphiache ukhali makhono mawiri na dzanja ibodzi mwakuti ulaphi wa maphaphido onsene awiri akufuthulwa ukhali makhono manayi na manja mawiri.

²⁷Ipyo pikhadaikhwa pakati na kati m'Mbuto Yakuchenesesa na maphaphido awo akufuthuka mwakuti phaphido ya chibodzi idadima fufu, chinangocho idadimambo kufufu inango, pontho maphaphido awiri anango adagumana pakati.

²⁸Pyakulengwa piwiri pyakukhala na maphaphido pidakukutizwa na golidi.

²⁹Mafufu onsene a m'Nyumba ya Mulungu, subi ikulu na subi ya m'bwaloletu, mudamala themeserwa na pyakusema-sema pya pyakulengwa pyakukhala na maphaphido, pontho na miti yamchindu na maluwa.

³⁰Iye adaphopha pontho pansi subi ikulu na subi ya m'bwaloletu ya Nyumba ya Mulungu na golidi.

³¹Msuwo wakukhala na misuwo miwiri yakusasanywa na matabwa aolivi idaikhwa pamsuwo wakupitira ku Mbuto Yakuchenesesa; padzulu pa msuwo pakhaoneka ninga uta.

³²Misuwo miwiriyo idathemeserwa na pyakulengwa pyakukhala na maphaphido, miti wamchindu na maluwa. Misuwo pontho na pyakukhala na maphaphido pontho miti yamchindu idakukutizwa na golidi.

³³Msuwo wakupitira m'subi ikulu udasasanywa na matabwa aolivi nkhomo zache zonsene zinayi.

³⁴Pamsuwo pakhali misuwo miwiri yakuchitwa kufunya kati na kati yakusasanywa na matabwa apaina.

³⁵Pontho pyakuthemesera na pyakusema-sema pya pyakulengwa pyakukhala na maphaphido, miti yamchindu na maluwa, pyonsenepi pikhali pyakukukutizwa na golidi.

³⁶Chintalo cham'bwalo kunkhope kwa Nyumba ya Mulungu ile, ikhadazungulirwa na mpanda wakukhala na matabwa amkungudza pamzera onsene wachitatu wa miyala.

³⁷Maziko a Nyumba ya Mulungu adamangwa mwezi wa Zivi, chaka chachinayi Solomoni mbali mfumu.

³⁸Mwezi wa Buli,[11] ule ukhali mwezi wachisere, chaka chakhumi na chibodzi Solomoni mbali mfumu, Nyumba ya Mulungu idamala mangwa monsene mwene mwakuti idabuluka ninga montho mukhadapisasanyira iwo. Basayi idamkwatira Solomoni pyaka pinomwe kuti Nyumba ile imaliswe kumangwa yonsene.