Read cisena 1 MAFUMU 8 Bible Online

1 MAFUMU 8 - cisena bible

1 MAFUMU 8

¹Kubuluka penepo Mfumu Solomoni adachemeresa akadamu onsene a Israele, akadamu a madzinza na a mabanja onsene, kuti adze kuna iye mu Yerusalemu, towera akwate Bokosi ya Chiverano ya MBUYA kubulukira ku Zioni, mzinda wa Davite, kudza nayo ku Nyumba ya Mulungu.

²Aisraele onsene adagumanyikana pabodzi pene pandzidzi wa Phwando ya Misasa, mwezi wa Etanimu,[16] ule akhali mwezi wachinomwe.

³Pidagumanyikana akadamu onsene a Israele, anyansembe adathukula Bokosi ya Chiverano,

⁴mbadza nayo ku Nyumba ya Mulungu. Alevi na anyansembe adathukula pontho Chikhumbi cha MBUYA pabodzi pene na pyombo pyonsene kwenda napyo ku Nyumba ya Mulungu.

⁵Mfumu Solomoni pabodzi pene na Aisraele onsene adagumanyikana patsogolo pa Bokosi ya Chiverano mbapereka nsembe mabira na ng'ombe zizinji zene zokhonda lengeseka.

⁶Kubuluka penepo anyansembe adapitisa Bokosi ya Chiverano ile m'Nyumba ya Mulungu mbakaiikha m'Mbuto Yakuchenesesa pansi pa pyakulengwa pyakukhala na maphaphido.

⁷Maphaphido awo akufuthuka ale adaphimbira Bokosiyo na miti yache yakuthukulira.

⁸Miti ile ikhali yakulapha pyakwanga mwakuti nkhomo zache zikhakwanisa kuoniwa na m'Mbuto Yakuchenesesa patsogolo pa mbuto yakuchena ile, kwache nee zikhakwanisa kuoniwa na kunja kwa Mbuto Yakuchenesesa tayu; mitiyo na lero ili ponthopo.

⁹M'bwalo mwa Bokosi ya Chiverano ile, mukhali nkhabe chinthu na chibodzi chene tayu kupambula miyala miwiri padalembwa matongero pale, ile idaikha Mose paphiri ya Sinai ndzidzi udachita MBUYA chiverano na Aisraele pidabuluka iwo m'dziko ya Iguputo.

¹⁰Pikhabuluka anyansembe m'Nyumba ya Mulungu ile, kabodzi kene Nyumbayo idadzala na makole,

¹¹mwakuti anyansembe ale hadakwanise tayu kupitamo pontho kuti akaphate basawo thangwi demelero ya MBUYA idadzala m'Nyumbacheyo.

¹²Tenepo Solomoni adapemphera mbati, “Imwe MBUYA mwaikha dzuwa kuthambo,[17] kwache imwe mudasankhula kukhala m'makole na mumdima.

¹³Lero ndakumangirani nyumba ya demelero, mbuto yakuti mukhalemo kwenda na kwenda.”

¹⁴Mwenemo Aisraele onsene mbali chiliri-chiliri penepo, Mfumu Solomoni adazungunukira kuna iwo mbapempha Mulungu kuti atsanzayise.

¹⁵Iye adalonga mbati, “Mbakuzwe MBUYA Mulungu wa Israele! Iye akoya pidadumbira iye kuna babanga Davite pidalonga iye kuna iye kuti,

¹⁶‘Kutomera ndzidzi udabulusa ine anthu anga m'dziko ya Iguputo, ine sidasankhule mzinda na ubodzi ene tayu m'dziko yonsene ya Israele kuti mumangwe Nyumba towera ine ndipembedzwemo. Mbwenye ndidasankhula iwe, Davite kukhala mtongi wa anthu anga.’ ”

¹⁷Solomoni adathimiza kulonga mbati, “Babanga Davite akhali na chipapu kufuna kumanga nyumba kuti MBUYA Mulungu wa Israele apembedzwemo.

¹⁸Mbwenye MBUYA adalonga kuna iye mbati, ‘Ande, mphyadidi kuti iwe udanyerezera pyakundimangira nyumba,

¹⁹kwache anafuna kundimangira nyumbayo si iwe tayu, mbwenye mwanako, ule ndi manungo ako pontho chiropa chako, ndiye anati andimangire nyumba.’

²⁰“Chinchino MBUYA achita pidumbira iye pile: Ine ndapita m'mbuto mwa babanga ninga mfumu wa Israele, pontho ndamanga Nyumba yakupambedzerwamo MBUYA Mulungu wa Israele.

²¹Ndasasanya mbuto yakukhala Bokosi ya Chiverano, mule muna miyala miwiri yakulembwapo chiverano chidachita MBUYA na makolo athu pidaabulusa iye m'dziko ya Iguputo.”

²²Kubuluka penepo Solomoni adaimira patsogolo paguwa yansembe ya MBUYA pamaso pa anthu mbakwiza manjache m'dzulu

²³mbapemphera mbati, “MBUYA Mulungu wa Israele, nkhabe Mulungu unango ninga imwe kudzulu penu pansi pano. Imwe mumbachita kuna anthu anu pinthu pimbadumbira imwe mbamuonesa kuafuna kwanu iwo angathimiza kuchita pinafuna imwe na mtima onsene.

²⁴Imwe mwachita pidadumbira imwe kuna babanga Davite; lero mafalanu onsene akwana-kwana.

²⁵“Tenepo MBUYA Mulungu wa Israele, ndikupemphera kuti munachita pinango pidadumbira imwe kuna babanga pidampanga imwe kuti ndzidzi onsene mbodzi wa pidzukulu pyache anatonga ufumu wa Israele, ngakhala iwo anachita mphole-mphole kukuverani ninga mudachitirambo iye.

²⁶Natenepo MBUYA Mulungu wa Israele, chitisani pyonsene pidadumbira imwe kuna nyabasanu Davite babanga kukwana-kwana.

²⁷“Ayi imwe Mulungu nkhukhaladi pansi pano? Podi na kudzulu kwene nkhabe mbuto yakukwana imwe tayu. Apo ndi tani na nyumba ing'ono yakumangirani ineyi!

²⁸MBUYA Mulungu wanga, ine ndine nyabasanu. Veserani kupemphera kwanga mbamundichitire pinthu pinakupemphani ine leropi.

²⁹Yang'anirani Nyumbayi mosiku na masikati, mbuto yasankhula imwe kuti mupembedzerwemo ile. Ndivesereni pinapemphera ine mwakuyang'ana Nyumbayi.

³⁰Vani kupemphera kwa nyabasanu na kwa anthu anu Israele pa nyumba yeneyi. Vani kweneko kudzulu kumbakhala imweko mbamutilekerere.

³¹Munthu angadawira tsanthembache mbapafunika kudumbira kuti iye hadadawe tayu, tenepo iye mbadza patsogolo pa guwanu yansembe m'Nyumba mwanu muno kudumbira,

³²MBUYA, mvesereni kudzuluko mbamuchitapo pinthu. Nyakudawayo mbatchunyuswe malingana na pinthu pyachita iye, pontho nyakukhonda dawayo mulongeni kuti iye hadadawe tayu.

³³“Anthu anu Aisraele angakundwa kunkhondo na anyamalwawo thangwi yakukudawirani, iwo mbabwerera kuna imwe mbatawira na mulomo wawo kuti ndimwe Mulungu wawo mbapemphera kuna imwe m'Nyumba mwanu muno,

³⁴avesereni kudzuluko mbamulekerera pyakudawa pya anthu anu Aisraele mbamuabweze kudziko idapereka imwe kuna makolo awo ile.

³⁵“Ngakhala kudzulu kunafungika mbakukhonda kuvumbisa mvula thangwi anthu anu akudawirani, tenepo iwo angapemphera mwakuyang'ana Nyumbayi mbatawira na mulomo wawo kuti ndimwe Mulungu wawo mbaleka pyakudawa pyawo na thangwi yakuti mwaatchunyusa,

³⁶avesereni kudzuluko mbamulekerera pyakudawa pya anyabasanu anthu anu Aisraele, pontho afunziseni makhaliro akulungama. Tenepo MBUYA, vumbisani mvula m'dziko mwanu, idapasa imwe anthu anu kuti ikhale yawo ene ile.

³⁷“Ngakhala m'dziko munagwa njala penu muliri, penu mbewu zavungika na mphepo penu na nyadzombe, penu anthu anu anasoswa na anyamalwa awo, penu pakati pawo pagwa muliri penu utenda wa mtundu onsene,

³⁸veserani kupemphera kwawo. Ngakhala munthu unango ene wa Aisraele anadzidzwa mumtima mwache na penepi, iye mbakwiza manjache m'dzulu kupemphera mwakuyang'ana Nyumbayi,

³⁹vani kupemphera kwawo. Avesereni kudzulu kumbuto kumbakhala imweko. Lekererani pyakudawa pyawo mbamuaphedze. Podi ndimwe ene basi ule ambadziwa pyamumtima mwa munthu, tenepo chitani kuna munthu onsene mwakuthemerana na pinthu pyaphata iye,

⁴⁰towera anthu anu akugopeni ndzidzi onsene unakhala iwo m'dziko idapereka imwe kuna makolo athu ile.

⁴¹“Ngakhala mlendo pyache wakukhala kudziko yakutali anava pya ukulu wanu pontho pinthu pikulu pyachitira imwe anthu anu Aisraele, tenepo adza dzakupembedzani, pontho kupemphera kuna imwe m'Nyumbayi,

⁴²

⁴³mvesereni kupemphera kwache. Kudzulu kumbuto kunakhala imweko, mvesereni mbamuchite pinakupemphani iyepyo, towera madzinza onsene a padziko yapansi akudziweni mbakuverani, ninga mumbachitira anthu anu Aisraele. Penepo iwo anadziwa kuti Nyumba yakumangirani ineyi ndi mbuto yathema imwe kupembedzerwamo.

⁴⁴“Ngakhala anthu anu aenda kunkhondo kamenyana na anyamalwawo konsene kwene kunaatuma imweko mbapemphera kuna imwe MBUYA mwakuyang'ana mzinda udasankhula imwewu pontho Nyumba yakumangirani ineyi,

⁴⁵avesereni kupemphera kwawo. Kudzuluko avesereni mbamuachitise kukunda.

⁴⁶“Ngakhala iwo anakudawirani (thangwi nkhabe munthu na mbodzi ene okhonda dawa tayu) imwe mbamuazhangalira na kuapereka m'manja mwa anyamalwawo, ale anaakwata ninga anyaperezo mbaenda nawo kudziko yakutali penu chifupi,

⁴⁷veserani kupemphera kwa anthu anu. Ngakhala m'dziko iwo anatchunyuka mbapemphera kuna imwe kutawira na mulomo wawo kuti iwo adawadi pontho kuti achitadi pyakudawika, avesereni kupemphera kwawo MBUYA.

⁴⁸Ngakhala m'dzikomo anatawiradi kudawa kwawo na mtima wakuona pontho mwakukhulupirika mbapemphera kuna imwe mwakuyang'ana dziko idapereka imwe kuna makolo athu ile, mzinda wasankhula imwewu, pontho na Nyumba yakumangirani ineyi,

⁴⁹tenepo veserani kupemphera kwawo. Kudzulu kumbuto kumbakhala imweko, vesereni mbamuavere nsisi.

⁵⁰Lekererani pyakudawa pyawo pyonsene, pontho na kukupandukirani kudachita iwo mbamuchitise anyamalwawo kuakomera mtima.

⁵¹Iwo mbanthu anu ene, ale adabulusa imwe m'dziko ya Iguputo dzenje yakunyungulusiramo utale.

⁵²“Mbuya Mulungu, ndzidzi onsene yang'anani mwakuakomera mtima anthu anu Aisraele pontho na mfumu wawo, pontho veserani kupemphera kwawo ndzidzi onsene unalira iwo kuna imwe kuti muaphedze.

⁵³Thangwi imwe mudaasankhula pakati pa madzinza a dziko yonsene yapansi kuti akhale anthu anu ene ninga mudalongera imwe kudzera muna nyabasanu Mose ndzidzi udabulusa imwe MBUYA Mulungu makolo athu m'dziko ya Iguputo.”

⁵⁴Pidamala Solomoni kupemphera pontho kudembetera kuna MBUYA, adalamuka kubuluka patsogolo pa guwa yansembe ya MBUYA, pakhadagodama iye mbakwiza manjache m'dzulu pale.

⁵⁵Iye adaimira mbatsanzayisa gulu yonsene ya anthu a ku Israele mwakugaluza fala mbalonga mbati,

⁵⁶“Mbakuzwe MBUYA ule apereka kupuma kuna anthu ache Israele ninga montho mukhadadumbira iye mule. Nkhabe chibodzi chidakhonda iye kuchichita papinthu pyonsene pidadumbira iye kudzera muna nyabasache Mose tayu.

⁵⁷MBUYA Mulungu wathu mbakhale nafe ninga mudachitira iye na makolo athu; iye mbaleke kutisiya tekha ene penu kutikhonda.

⁵⁸Iye mbachitise mitimathu kuzungunukira kuna iye, kuchita pinafuna iye, kukoya matongero ache, upangizi na mwambo pidapereka iye kuna makolo athu pile.

⁵⁹Pontho mafalanga apemphera ine kuna MBUYA ale mbakhale chifupi na MBUYA Mulungu wathu mosiku na masikati kuti iye avere nsisi nyabasache, pontho anthu ache Aisraele na pinthu pinafuna iwo nsiku na nsiku,

⁶⁰towera anthu a madzinza onsene a padziko yapansi adziwe kuti MBUYA ndi Mulungu, pontho kuti nkhabe unango ninga iye.

⁶¹Mbwenye imwe mwathema kupereka mtimanu onsene kuna MBUYA Mulungu wathu, kuvera mwambo wache na matongero ache ene ninga muna ipyo leromu.”

⁶²Kubuluka penepo Mfumu Solomoni pabodzi pene na anthu onsene akhali penepo ale, adapereka nsembe kuna MBUYA.

⁶³Iye adapereka ng'ombe pikwi makumawiri na piwiri, pontho mabira pikwi dzana na makumawiri ninga nsembe zachiphatizano. Natenepo mfumu pabodzi na anthu onsene adapambulira Nyumba ile kuna Mulungu.

⁶⁴Pansiku yonthoyo mfumu adachitisa mbuto ya pakatiletu pa chintalo kutsogolo kwa Nyumba ya Mulungu kukhala yakupambulika, tenepo adaperekapo nsembe zamumphu zakupyerera, pyakupereka pya mapira na mafuta a nyama za nsembe zachiphatizano zile. Iye adachita tenepo thangwi guwa yansembe yankuwa ile, ikhali ing'ono pyakwanga kukwanapo nsembe zonsenezi.

⁶⁵Penepo pa Nyumba ya Mulungu, Solomoni pabodzi pene na Aisraele onsene adasekera Phwando ya Misasa nsiku zinomwe.[18] Pakhali mgumano ukulu wa anthu akubulukira kumakata a Hamati kumpoto mpakana kumwera kumadire a dziko ya Iguputo.

⁶⁶Pansiku yachisere Solomoni adagwinya anthu ale kwenda m'misa mwawo. Iwo onsene adamsimba mbaenda m'misa mwawo na kukomerwa, thangwi ya mtsanzayiso onsene ukhadapereka MBUYA kuna nyabasache Davite na kuna anthu ache Aisraele.