Read cisena 1 MAFUMU 9 Bible Online

1 MAFUMU 9 - cisena bible

1 MAFUMU 9

¹Pidamalisa Mfumu Solomoni kumanga Nyumba ya Mulungu, pontho kumanga nyumba yachifumu, pontho na pinango pyonsene pikhafuna iye kumanga,

²MBUYA adamuonekera pontho ninga mukhadamuonekera iye ku Gibeoni.

³MBUYA adalonga kuna iye mbati, “Ine ndava kupemphera kwako. Ine ndinachitisa Nyumba yandimangira iwe kuti ndipembedzwemoyi kukhala yakupambulika kwenda na kwenda. Ndinaiyang'anira pontho kuitchinjiriza ndzidzi onsene.

⁴Ngakhala iwe unanditumikira na mtima wakuona pontho chakukupokanyisa ninga mudachitira babako, pontho ngakhala unavera matongero anga mbuchita pyonsene pyakutonga ine,

⁵ndinachita pidadumbira ine kuna babako Davite, pidampanga ine kuti ndzidzi onsene pidzukulu pyache pinatonga mu Israele.

⁶Mbwenye ngakhala iwe penu pidzukulu pyako munabauka kubuluka kuna ine mbamukhonda vera mwambo na matongero akupasani inewa mbapembedza milungu inango,

⁷penepo ine ndinaabulusa Aisraele m'dziko idaapasa ineyi, pontho ndinaikhonda Nyumba yapambula ineyi kukhala mbuto yanga yakupembedzerwamo. Konsene kwene anthu Israele anamuesa chinthu chakusekesa mbamchitira pyakuseluka.

⁸Nyumbayi inasanduka madembe mwakuti munthu onsene wakugwanda na njira anatutumuka na kusedegula mbavunza mbati, ‘Thangwi yache ninji MBUYA achita penepi kuna dzikoyi, pontho kuna Nyumbayi?’

⁹Anthu anatawira kuti, ‘Ndi thangwi yakuti iwo adamkhonda MBUYA Mulungu wawo, ule adabulusa makolo awo m'dziko ya Iguputo. Iwo apipereka okha ene kuna milungu inango mbaipembedza. Ndi thangwi yache MBUYA adzesa kuvungikaku pakati pawo.’ ”

¹⁰Solomoni kumanga Nyumba ya Mulungu na nyumba yachifumu kudamkwatira pyaka makumawiri.

¹¹Mfumu Hiramu wa ku Turo akhadapereka kuna Solomoni matabwa amkungudza na paina pontho na golidi onsene akhafuna iye pabasa yeneyi. Pidamala iye basa yonseneyi, Mfumu Solomoni adapereka kuna Mfumu Hiramu maluwani makumawiri a m'nthemba ya Galilea.

¹²Mfumu Hiramu adenda kaona maluwaniwo kwache iye hadakomerwe nawo tayu.

¹³Natenepo iye adalonga kuna Solomoni mbati, “Mbaleanga ayi maluwani andipasa iwe mbenewa?” Na thangwi yeneyi na lero nthemba yeneyi imbachemerwa Kabulu.[19]

¹⁴Mfumu Hiramu akhadatumiza kuna Solomoni golidi wakulemera kupiringana makilogramu pikwi pinayi.

¹⁵Mfumu Solomoni adaphatisa basa anyakuphata basa mwakukhakhamizwa kumanga Nyumba ya Mulungu pontho na nyumba yachifumu, kundendemeza khundu yakumabulukiro dzuwa ya mzinda, kumanga mafufu a mzinda wa Yerusalemu, pontho kumanga mizinda ya Hazori, Megido na Gezeri.

¹⁶Mfumu wa ku Iguputo adasosa mzinda wa Gezeri mbaukunda. Iye adapha onsene akukhala mwenemo mbaupisa moto. Kubuluka penepo mzinda wenewu adaupereka kuna mwanache wamkazi ninga mtukwa pandzidzi ukhakazhali iye na Solomoni,

¹⁷tenepo Solomoni adaumanga pontho. Pakuphatisa basa anyakuphata basa mwakukhakhamizwa Solomoni adamanga pontho Beti-Horoni wa ku phedi,

¹⁸Baalati, Tamara m'thando yatchetcha ya Yuda,

¹⁹mizinda yakukoyeramo pinthu pyache, mizinda ya akavalo ache na pingolo pyache, pontho na pyonsene pikhafuna iye kumanga mu Yerusalemu, Lebanoni na konsene kwene m'nthemba mwachemo.

²⁰Anyakuphata basa mwakukhakhamizwa a Solomoni akhali pidzukulu pya Akanani, ale Aisraele haadaaphe tayu pandzidzi ukhakwata iwo dziko yawo ile. Enewa akhali Aamori, Ahiti, Aperizi, Ahivi, na Ayebusi, ale pidzukulu pyawo na lero ndi mabitchu basi.

²²Solomoni hadakwate Aisraele kukhala mabitchu tayu. Iwo akhaphata basa ninga anyankhondo ache, mathubu, akadamu a nkhondo, anyakufambisa pingolo na anyakupakira akavalo.

²³Pakhali akadamu madzana mashanu na makumashanu kuyang'anira anthu, akhaphata basa yakumanga-manga ya Solomoni ale.

²⁴Solomoni adakwata mkazache, mwana wamkazi wa mfumu wa ku Iguputo ule, kumbulusa mumzinda wa Davite kwenda naye kunyumba yachifumu ikhadammangira Solomoni ile. Kubuluka penepo iye adandendemeza khundu yakumabulukiro dzuwa a mzinda wa Yerusalemu.

²⁵Solomoni akhapereka nsembe zakupyerera na nsembe zachiphatizano paguwa yansembe ikhadamangira iye MBUYA ile, katatu pachaka mbafukiza pontho pyakununkhira kuna MBUYA. Natenepo iye adamalisa basa yonsene yakumanga Nyumba ya Mulungu.

²⁶Solomoni adasasanya pontho miyadiya mikulu-mikulu pa Ezioni-Geberi chifupi na Elati mu Edomu pagombe ya Nyanza Yakufira.

²⁷Natenepo Mfumu Hiramu adatuma amunache, anyakufambisa miyadiya, ale adazolowera kufamba panyanza kaphata basa pabodzi na amuna a Solomoni.

²⁸Iwo adadza na miyadiyayi kunthunda ya Ofiri, mbadza pontho na golidi wakulemera makilogramu pikwi khumi na pinayi kupipereka kuna Solomoni.